ថៃ កំពុងល្បួងវិនិយោគិនជប៉ុន ឱ្យមកបោះទុនវិនិយោគនៅប្រទេសខ្លួនឡើងវិញ បន្ទាប់ពីធ្លាក់ចុះនៅមួយទសវត្សរ៍ចុងក្រោយ

រដ្ឋមន្ត្រីក្រសួងពាណិជ្ជកម្មថៃ លោក ពិឆៃ ណារីបថាផន (Pichai Naripthaphan) បានជួបពិភាក្សាការងារជាមួយលោក អូតាកា ម៉ាសាតូ (Otaka Masato) ឯកអគ្គរាជទូតជប៉ុនប្រចាំប្រទេសថៃ កាលពីសប្តាហ៍មុន ក្នុងគោលបំណងដើម្បីទាក់ទាញក្រុមវិនិយោគិនជប៉ុន ឱ្យត្រឡប់មកវិនិយោគក្នុងប្រទេសថៃ ឡើងវិញ ខណៈប្រទេសជប៉ុន នៅតែជាអ្នកវិនិយោគឈានមុខគេនៅក្នុងប្រទេសថៃ បើទោះបីជាមានការធ្លាក់ចុះការវិនិយោគនៅមួយទសវត្សរ៍ចុងក្រោយ បន្ទាប់ពីមានរដ្ឋប្រហារឆ្នាំ២០១៤ ក៏ដោយ។

រដ្ឋមន្ត្រីក្រសួងពាណិជ្ជកម្មថៃ រូបនេះ បានអះអាងថា ជំនួបខាងលើ បានជួយពង្រឹងទំនាក់ទំនងសេដ្ឋកិច្ច ពាណិជ្ជកម្ម និងវិនិយោគ ហើយ​លោក ក៏បានជំរុញឱ្យឯកអគ្គរាជទូតជប៉ុន ជួយទាក់ទាញវិនិយោគិនជប៉ុន ឱ្យបង្កើនការវិនិយោគក្នុងវិស័យដែលជប៉ុន មានសក្តានុភាពខ្ពស់ដូចជាឧស្សាហកម្មយានយន្ត បន្ទះឈីប បញ្ញាសិប្បនិម្មិត មជ្ឈមណ្ឌលទិន្នន័យ ឱសថ និងបច្ចេកវិទ្យាមនុស្សយន្តជាដើម។

បើតាមការអះអាងរបស់លោក ពិឆៃ ប្រទេសថៃ ដាក់គោលដៅអភិវឌ្ឍន៍ខ្លួនឱ្យក្លាយជាមជ្ឈមណ្ឌលពាណិជ្ជកម្ម និងការវិនិយោគនៅក្នុងខ្សែច្រវាក់ផ្គត់ផ្គង់ដ៏ទំនើប និងជាអ្នកផលិតនូវផលិតផល និងសេវាកម្មដែលមិនប៉ះពាល់ដល់បរិស្ថាន។

ក្រៅពីជំនួបជាមួយឯកអគ្គរាជទូតជប៉ុន លោក ពិឆៃ ក៏បានជួបជាមួយប្រធាន និងអនុប្រធានក្រុមហ៊ុន Toyota Motor Thailand ដើម្បីពិភាក្សាអំពីផែនការបស់ររដ្ឋាភិបាលថៃ ដើម្បីលើកកម្ពស់ប្រទេសថៃ ឱ្យក្លាយជាមជ្ឈមណ្ឌលផលិតកម្មយានយន្តនៅតំបន់អាស៊ីអាគ្នេយ៍ផងដែរ៕

អត្ថបទ៖ សុខ មង្គល