ថៃ គ្រោងដំឡើងថ្លៃសេវាសម្រាប់អ្នកដំណើរចេញក្រៅប្រទេសពី២៣ដុល្លារទៅ៣៥ដុល្លារ

លោកស្រី ប៉ាវីណា ចារិយ៉ាធិទិផុង (Pavina Jariyathitipong) ប្រធានក្រុមហ៊ុនអាកាសយានដ្ឋានថៃ បានបញ្ជាក់ថា ក្រុមប្រឹក្សាភិបាលអាកាសចរណ៍ស៊ីវិល បានអនុម័តលើគោលការណ៍ដំឡើងសេវាអ្នកដំណើរខាងលើនេះរួចរាល់ហើយ កាលពីថ្ងៃទី៣ ខែធ្នូ ឆ្នាំ២០២៥ កន្លងទៅ។ តាមរយៈការសម្រេចនេះ ថ្លៃសេវានឹងត្រូវកើនឡើងប្រមាណ១២ដុល្លារ បន្ថែមលើតម្លៃចាស់ប្រមាណ២៣ដុល្លារ ដែលនាំឱ្យតម្លៃសរុបហក់ឡើងដល់៣៥ដុល្លារ។

បច្ចុប្បន្ន គម្រោងនេះកំពុងរង់ចាំការអនុម័តចុងក្រោយពីរដ្ឋមន្ត្រីក្រសួងដឹកជញ្ជូនថៃ ដើម្បីប្រកាសអនុវត្តជាផ្លូវការនៅអំឡុងពាក់កណ្តាលឆ្នាំ២០២៦។ លោកស្រីបានបន្ថែមថា ផ្អែកតាមលទ្ធផលនៃការសិក្សាការដំឡើងថ្លៃសេវានេះនឹងមិនជះឥទ្ធិពលអវិជ្ជមានដល់ការសម្រេចចិត្តធ្វើដំណើររបស់ភ្ញៀវទេសចរនោះទេ។

គួរបញ្ជាក់ថា ការដំឡើងថ្លៃសេវាអ្នកដំណើរថ្មីនេះ នឹងត្រូវអនុវត្តចំពោះអាកាសយានដ្ឋានអន្តរជាតិទាំង៦ ក្រោមការគ្រប់គ្រងរបស់ AOT រួមមានសុវណ្ណភូមិ, ដនមឿង, ភូកេត, ហាតយ៉ៃ, ឈៀងម៉ៃ និងឈៀងរ៉ៃ។ ទន្ទឹមនឹងនេះ AOT ក៏កំពុងសិក្សាអំពីការកំណត់ថ្លៃសេវាសម្រាប់អ្នកដំណើរឆ្លងកាត់ និងអ្នកដំណើរផ្ទេរជើងយន្តហោះឱ្យកាន់តែមានប្រសិទ្ធភាពផងដែរ៕

អត្ថបទៈ សួន ឡង់ទី​