តើអ្វីខ្លះជាកត្តាប្រឈមរបស់កម្ពុជាក្នុងការទាក់ទាញវិនិយោគជប៉ុន?

ទោះយ៉ាងណាឯកឧត្តម មិកាមិ ម៉ាសាហ៊ីរ៉ូ ជឿជាក់ថា កម្ពុជានឹងក្លាយជាគោលដៅដំបូងគេសម្រាប់ក្រុមហ៊ុនជប៉ុនក្នុងការធ្វើពិពិធកម្មនៃមូលដ្ឋានផលិតកម្ម និងការផ្គត់ផ្គង់ក្នុងទម្រង់បូកជាមួយប្រទេសជិតខាង ព្រោះកម្ពុជាមានទីតាំងភូមិសាស្ត្រល្អសម្រាប់ការដោះដូរពាណិជ្ជកម្មនៅក្នុងតំបន់។

ក្នុងបទសម្ភាសន៍ផ្តាច់មុខជាមួយសារព័ត៌មានខេមបូណូមីស ឯកឧត្តម មិកាមិ ម៉ាហាហ៊ីរ៉ូ ឯកអគ្គរាជទូតជប៉ុនប្រចាំនៅកម្ពុជា បានលើកឡើងពីសក្តានុពល និងបញ្ហាប្រឈមមួយរបស់កម្ពុជាក្នុងការទាក់ទាញវិនិយោគិនបរទេសឲ្យមកបោះទុនវិនិយោគ និងពង្រីកអាជីវកម្មលើវិស័យនានានៅកម្ពុជា។ ឯកឧត្តមបានគូសបញ្ជាក់ថា បញ្ហាប្រឈមដែលវិនិយោគិនជប៉ុនបានជួបប្រទះសម្រាប់ការវិនិយោគនៅកម្ពុជា មានដូចជាបញ្ហាដឹកជញ្ជូននិងអគ្គិសនីនៅមានតម្លៃខ្ពស់ជាដើម។ ជាពិសេស ឧបសគ្គធំបំផុតសម្រាប់វិនិយោគិនជប៉ុនក្នុងការពង្រីកការវិនិយោគនៅកម្ពុជា គឺកង្វះធនធានមនុស្សគុណភាពខ្ពស់ ដែលធ្វើឲ្យអ្នករកស៊ីជនជាតិជប៉ុនពិបាកក្នុងការស្វែងដៃរកគូវិនិយោគលើវិស័យឧស្សាហកម្មផលិតកម្ម ដែលជាវិស័យសក្តានុពលរបស់ជប៉ុន។ កត្តានេះហើយដែលធ្វើឲ្យក្រុមហ៊ុនឧស្សាហកម្មផលិតកម្មរបស់ជប៉ុននៅមានចំនួនតិចតួចនៅកម្ពុជា។

តែយ៉ាងណាឯកឧត្តម មិកាមិ ម៉ាសាហ៊ីរ៉ូ ជឿជាក់ថា កម្ពុជានឹងក្លាយជាគោលដៅដំបូងគេសម្រាប់វិនិយោគិនជប៉ុនក្នុងការធ្វើពិពិធកម្មមូលដ្ឋានផលិតកម្ម និងការផ្គត់ផ្គង់បូកជាមួយប្រទេសជិតខាងដូចជាថៃ និងវៀតណាមជាដើម។ ព្រោះបើមើលទៅលើភូមិសាស្ត្រនយោបាយប្រទេសកម្ពុជាស្ថិតនៅចំកណ្តាលនៃតំបន់មេគង្គ ដែលធ្វើឲ្យកម្ពុជាមានសក្តានុពលខ្ពស់សម្រាប់ការវិនិយោគលើវិស័យផលិត និងនាំចេញ។ លើសពីនេះនៅក្នុងអំឡុងវិបត្តិកូវីដ-១៩ កន្លងមកកម្ពុជានៅតែអាចមានសមត្ថភាពផលិតគ្រឿងបន្លាស់សម្រាប់ផ្គត់ផ្គង់ទីផ្សារជំនួសឲ្យប្រទេសដទៃ។

ឯកឧត្តម មិកាមិ ម៉ាសាហ៊ីរ៉ូ បានគូសបញ្ជាក់ថា បើតាមការធ្វើសម្រង់សំណួរស្ថិតិរបស់ស្ថានទូតជប៉ុនប្រចាំនៅកម្ពុជា គិតត្រឹមឆ្នាំ២០២១ មានក្រុមហ៊ុនជប៉ុនប្រមាណ៤០០ បាននិងកំពុងធ្វើប្រតិបត្តិការនៅកម្ពុជា។ ហើយបើតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា គិតត្រឹមដំណាច់ឆ្នាំ២០២០ ក្រុមហ៊ុនជប៉ុនវិនិយោគនៅកម្ពុជាមានទំហំប្រមាណ២,៩ពាន់លានដុល្លារអាមេរិក។ បើក្រឡេកទៅមើលការធ្វើពាណិជ្ជកម្មទ្វេភាគីរវាងប្រទេសទាំងពីរវិញឃើញថា កាលពីឆ្នាំ២០២១ ទំហំពាណិជ្ជកម្មរវាងប្រទេសទាំងពីរបានឈានដល់ជាង២ពាន់លានដុល្លារអាមេរិកក្នុងនោះកម្ពុជាបាននាំចេញទៅជប៉ុនមានតម្លៃជាង១ពាន់៧រយលានដុល្លារខណៈជប៉ុននាំចូលទំនិញមកកម្ពុជាមានជាង៦រយលានដុល្លារអាមេរិកតែប៉ុណ្ណោះ។ នេះបើតាមការគូសបញ្ជាក់របស់ឯកឧត្តម មិកាមិ ម៉ាសាហ៊ីរ៉ូ។

បើតាមរបាយការណ៍របស់អគ្គនាយកដ្ឋានគយ និងរដ្ឋាករនៅ៥ខែឆ្នាំ២០២២ ទំហំពាណិជ្ជកម្មទ្វេភាគីកម្ពុជាជប៉ុនសម្រេចបានជាង៧៧៨លានដុល្លារអាមេរិកកើនឡើងជាង១៣% បើធៀបនឹងរយៈពេលដូចគ្នាកាលពីឆ្នាំ២០២១ ដែលមានត្រឹមតែជិត៧រយលានដុល្លារអាមេរិក។ ក្នុងនោះកម្ពុជានាំទំនិញចេញទៅជប៉ុនមានតម្លៃជាង៤៦២លានដុល្លារ ខណៈជប៉ុននាំទំនិញចូលមកម្ពុជាមានតម្លៃជាង៣១៦លានដុល្លារ៕