ថៃទទួលបានភ្ញៀវទេសចរបរទេសជាង១ម៉ឺននាក់ក្នុងមួយថ្ងៃ ក្រោយអាជ្ញាធរបានបញ្ឈប់ការធ្វើតេស្ដលើអ្នកដំណើរ

លោក គីតទីពុង គីតទីកាចន (Kittipong Kittikachorn) នាយកអាកាសយានដ្ឋានសុវណ្ណភូមិ មានប្រសាសន៍ថា ចំនួនភ្ញៀវអន្តរជាតិមកដល់តាមអាកាសយានដ្ឋានរបស់ថៃ បានកើនឡើង ៦៥% បើធៀបនឹងតួលេខកាលពីខែមុន។

ចាប់តាំងពីមានការការលុបចោលការតម្រូវការធ្វើតេស្ត កូវីដ-១៩ (Covid-19) នៅមុនការធ្វើដំណើរមកដល់ប្រទេសថៃ តាំងពីថ្ងៃទី ១ ខែមេសាមក ចំនួនភ្ញៀវទេសចរអន្តរជាតិបានកើនឡើងដល់ជាង ១ម៉ឺននាក់ ក្នុងមួយថ្ងៃ។ លោកបន្ថែមថា កាលពីខែមុន គិតជាមធ្យមតួលេខអ្នកចំណើរមានចំនួនត្រឹមតែជាង ៧ពាន់នាក់ប៉ុណ្ណោះ ក្នុងមួយថ្ងៃ។ ចំនួនជើងហោះហើរអន្តរជាតិវិញ ក៏បានកើនឡើងដល់១៤១ ក្នុងមួយថ្ងៃ កើនឡើង ៣% ធៀបនឹងកាលពីខែមុន។ 

បើគិតជារួម ទាំងជើងហោះហើរជាតិ និងអន្តរជាតិ ក្នុងមួយថ្ងៃ អាកាសយានដ្ឋានសុវណ្ណភូមិរបស់ថៃ មានជើងហោះហើរសរុប៥៣៦ជើង ក្នុងនោះ ជើងហោះហើរក្នុងស្រុកមាន២៥៤ជើង កើនឡើង១០%។

លោក គីតទីពុង (Kittipong) បាននិយាយបន្តថា ចាប់តាំងពីថ្ងៃទី ១ ខែមេសា ចំនួនអ្នកដំណើរឆ្លងកាត់អាកាសយានដ្ឋានទាំងជើងហោះហើរក្នុងស្រុក និងអន្តរជាតិបានកើនឡើងដល់ជាង ៥ម៉ឺន ជាមធ្យមក្នុងមួយថ្ងៃ កើនឡើង ២៧% ធៀបនឹងខែមុន។ 

ជាមួយគ្នាដែរ អាកាសយានដ្ឋានសុវណ្ណភូមិ នឹងដាក់ពង្រាយក្រុមការងារបន្ថែមទៀត ដើម្បីស្តារសមត្ថភាពអាកាសយានដ្ឋានឡើងវិញ និង រក្សាការកើនឡើងនៃចលនាហោះហើរ និងចរាចរណ៍ ខណៈដែលអាកាសយានដ្ឋានមួយនេះ ពិតជាដើរតួនាទីយ៉ាងសំខាន់ក្នុងការពន្លឿនការស្តារសេដ្ឋកិច្ចឡើងវិញផងដែរ។

សូមបញ្ជាក់ថា ប្រទេសថៃ កំពុងចាប់ផ្ដើមបើកដកចេញនូវការដាក់កំហិតលើការធ្វើដំណើរជាបណ្ដើរៗដើម្បីឈានទៅរកការបើកប្រទេសពេញលេញឡើងវិញចាប់ពីដើមខែកក្កដាខាងមុខនេះតទៅ។ បើតាមមន្ត្រីជាន់ខ្ពស់រារដ្ឋាភិបាលថៃ ធ្លាប់បានលើកឡើងថា នៅឆ្នាំនេះ ថៃរំពឹងទទួលបានភ្ញៀវទេសចរអន្តរជាតិ៥លាននាក់ ដោយភាគច្រើនជាមកពីអឺរ៉ុប និងអាមេរិក ហើយក្នុងករណីដែលប្រទេសចិន និងឥណ្ឌា ដកវិធានការរឹតត្បិតលើលើការធ្វើដំណើរអន្តរជាតិឡើងវិញ នោះថៃរំពឹងថា នឹងអាចទទួលបានភ្ញៀវទេសចរអន្តរជាតិដល់ ៩លាននាក់នៅឆ្នាំនេះ៕

អត្ថបទ៖ ម៉ុន សុកែវ