សារព័ត៌មាន The Nation Thailand បានស្រង់សម្ដីរបស់ លោក Anutin Charnvirakul ដែលបាននិយាយនៅថ្ងៃព្រហស្បតិ៍ ទី២៥ ខែមិថុនានេះថា ក្រសួងសុខាភិបាលសាធារណៈថៃ កំពុងធ្វើការងារជាមួយនឹងក្រុមហ៊ុន Bionet-Asia ដើម្បីអភិវឌ្ឍប្រភេទ DNA វ៉ាក់សាំងកូវីដ-១៩ ហើយធ្វើតេស្តចុងក្រោយទៅលើសត្វកណ្ដុរ ដើម្បីបង្ហាញពីលទ្ធផលនៃប្រសិទ្ធភាពរបស់វា។
ក្រុមហ៊ុន Bionet គឺជាក្រុមហ៊ុនឯកជន ថៃ-បារាំង ដែលមានឯកទេសក្នុងការអភិវឌ្ឍ ផលិត និងផ្គត់ផ្គង់វ៉ាក់សាំង។
លោក Anutin លើកឡើងយ៉ាងដូច្នេះថា «យើងកំពុងរៀបចំគំរូសម្រាប់ការត្រួតពិនិត្យ ដោយនាយកដ្ឋានវិទ្យាសាស្ត្រវេជ្ជសាស្ត្រ រួចហើយនឹងស្នើសុំទៅកាន់រដ្ឋបាលចំណីអាហារ និងឱសថ ដើម្បីអាចសាកល្បងវ៉ាក់សាំងនោះទៅលើមនុស្ស។» លោកបន្ថែមទៀតថា «ប្រសិនបើ រដ្ឋបាលចំណីអាហារ និងឱសថ ផ្ដល់ភ្លៀងបៃតងនៅក្នុងចន្លោះខែកក្កដា ដល់កញ្ញា វ៉ាក់សាំងអាចនឹងរួចរាល់សម្រាប់ការប្រើប្រាស់ជាសាធារណៈ ក្នុងរយៈពេល ៩ខែ ឬក៏នៅដើមឆ្នាំ២០២១»។
អត្ថបទទាក់ទង!
រដ្ឋមន្ត្រីក្រសួងសុខាភិបាលសាធារណៈរូបនេះ បានគូសបញ្ជាក់ទៀតថា ប្រទេសថៃ អាចនឹងក្លាយជាប្រទេសមួយក្នុងចំណោមប្រទេស ដែលមានការបង្កើតវ៉ាក់សាំងកូវីដ-១៩ ដោយខ្លួនឯង។ ហើយប្រទេសថៃ ក៏នឹងចែករំលែករូបមន្ដនេះ ទៅកាន់ពិភពលោកផងដែរ តែយ៉ាងណា ពលរដ្ឋថៃ នឹងទទួលបានអាទិភាពមុនគេ ដើម្បីទទួលបានវ៉ាក់សាំងនេះ។
កន្លែងផលិតវ៉ាក់សាំងនៅក្នុងប្រទេសថៃ ក៏ត្រូវបានក្រុមហ៊ុន Bionet រៀបចំរួចរាល់ហើយដែរ។ លោក Withoon Wonghankul ប្រធានក្រុមហ៊ុន Bionet-Asia បានបញ្ជាក់ដែរថា ក្រុមហ៊ុនលោក នឹងស្នើសុំការអនុញ្ញាតពីរដ្ឋបាលចំណីអាហារ និងឱសថ ដើម្បីចាប់ផ្ដើមសាកល្បងវ៉ាក់សាំងនេះ ទៅលើសត្វស្វា និងមនុស្សព្រមគ្នាតែម្ដង ដើម្បីជួយឲ្យដំណើរការនេះបានលឿន។
លោក Withoon បាននិយាយថា «ជាធម្មតាការតេស្ដវ៉ាក់សាំង ត្រូវតែធ្វើឡើងតាមការអនុម័ត និងគ្រប់ជ្រុងជ្រោយទៅតាមជំហាន គឺពីការសាកល្បងទៅលើសត្វកណ្ដុរ រួចបន្ដសាកល្បងលើសត្វស្វា និងបន្ទាប់មកលើមនុស្ស។ ប៉ុន្ដែ នៅក្នុងករណីកូវីដ-១៩ ដែលមានស្ថានភាពបន្ទាន់បែបនេះ ខាងរដ្ឋបាលចំណីអាហារ និងឱសថ នឹងអនុញ្ញាតឲ្យសាកល្បងលើស្វា និងមនុស្ស ក្នុងពេលតែមួយព្រមគ្នាតែម្ដង»។
ប្រទេសថៃ បានធ្វើការស្រាវជ្រាវលើប្រភេទគំរូវ៉ាក់សាំងកូវីដ-១៩ចំនយន ៦ប្រភេទ ក្នុងនោះ ក៏មានការចូលរួមស្រាវជ្រាវ ពីអង្គភាពនៃវិស័យសាធារណៈ និងឯកជនជាច្រើនផងដែរ ដូចជា Bionet-Asia. សកលវិទ្យាល័យ Mahidol, ភ្នាក់ងារអភិវឌ្ឍន៍វិទ្យាសាស្ត្រ និងបច្ចេកវិទ្យាជាតិ និងសកលវិទ្យាល័យ Chulalongkorn ផងដែរ៕
None
