នៅថ្ងៃទី១៤ ខែមេសា ឆ្នាំ២០២០នេះ ទំព័រហ្វេសប៊ុកផ្លូវការរបស់ស្ថានទូតសហរដ្ឋអាមេរិកនៅកម្ពុជា បានចែករំលែកដំណឹងមួយ ថា "សហរដ្ឋអាមេរិកវិវឌ្ឍទៅរកការផលិតវ៉ាក់សាំងការពារវីរុសកូវីដ១៩"ដោយក្នុងអត្ថបទនោះ សរសេរថា "អ្នកវិទ្យាសាស្ត្រអាមេរិកជិតបង្កើតវ៉ាក់សាំងបានហើយ ដើម្បីធ្វើឲ្យពិភពលោកមានសុវត្ថិភាពពីវីរុសកាចសាហាវ កូវីដ១៩។"
អត្ថបទដដែលសរសេរថា គម្រោងភាពជាដៃគូអាមេរិកជាច្រើនកំពុងធ្វើតេស្តវ៉ាក់សាំងមួយចំនួននៅលើខ្លួនមនុស្សរួចជាស្រេចទៅហើយ ដែលនេះជាជំហានទៅមុខមួយដ៏ធំក្នុងការបង្ហាញថា វ៉ាក់សាំងនេះមានសុវត្ថិភាពនិងប្រសិទ្ធភាព។ ហើយក៏មានគម្រោងមួយចំនួនផ្សេងទៀត កំពុងរិះរកវិធីថ្មីៗដើម្បីផ្ដល់វ៉ាក់សាំងនេះដល់ប្រជាជន នៅពេលដែលបង្កើតរួចរាល់ជាស្ថាពរ ផងដែរ។
អត្ថបទខាងលើ បន្តថា កិច្ចប្រឹងប្រែងនេះទទួលបានការជំរុញឲ្យរឹតតែលឿនថែមទៀត នៅពេលដែលប្រធានាធិបតីអាមេរិក លោក ដូណាល់ ត្រាំ បានអនុម័តមូលនិធីសហព័ន្ធ ៨,៣ពាន់លានដុល្លារអាមេរិក ដើម្បីប្រយុទ្ធប្រឆាំងនឹងវីរុសកូវីដ១៩។
អត្ថបទទាក់ទង
ប៉ុន្មានម៉ោងក្រោយមក នៅថ្ងៃនេះដដែល នៅលើទំព័រហ្វេសប៊ុកផ្លូវការរបស់ស្ថានទូតចិនប្រចាំកម្ពុជា គេឃើញមានការផ្សាយព័ត៌មានអំពីកិច្ចប្រឹងប្រែងបង្កើតវ៉ាក់សាំងប្រឆាំងវីរុសកូវីដ១៩ របស់ចិនផងដែរ។
អត្ថបទនៅលើទំព័រហ្វេសប៊ុកស្ថានទូតចិនប្រចាំកម្ពុជា សរសេរថា នាថ្ងៃទី១២ ខែមេសា វ៉ាក់សាំង Adenovirus សម្រាប់វីរុស COVID-19 ដែលត្រូវបានស្រាវជ្រាវដោយក្រុមអ្នកជំនាញដែលដឹកនាំដោយលោកស្រី Chen Wei អ្នកជំនាញផ្នែកកិច្ចការស្រាវជ្រាវវេជ្ជសាស្រ្តយោធា នៃវិទ្យាស្ថានវិទ្យាសាស្រ្តយោធា ប្រទេសចិន ត្រូវបានឈានដល់ដំណាក់កាលពិសោធន៍ព្យាបាលជំងឺលើកទី២។
អត្ថបទដដែល បន្តថា "ក្នុងបណ្ដាញប្រព័ន្ធផ្សព្វផ្សាយរបស់អង្គការសុខភាពពិភពលោក បានប្រកាសថា នេះជាវ៉ាក់សាំងសម្រាប់ជំងឺវីរុស COVID-19 តែមួយគត់ លើពិភពលោកដែលបានឈានដល់ដំណាក់កាលពិសោធន៍ព្យាបាលជំងឺលើកទី២។"
អាមេរិកជួយអ្វីខ្លះដល់កម្ពុជា ក្នុងការប្រយុទ្ធប្រឆាំងវីរុសកូវីដ១៩?
សហរដ្ឋអាមេរិក តាមរយៈទីភ្នាក់ងារអភិវឌ្ឍន៍អន្តរជាតិរបស់ខ្លួន ហៅកាត់ USAID បានផ្ដល់ជំនួយមូលនិធិប្រហែល ២លានដុល្លារ ជួយដល់រាជរដ្ឋាភិបាលកម្ពុជា ក្នុងការត្រៀមលក្ខណៈប្រព័ន្ធមន្ទីរពិសោធន៍ អនុវត្តការងារស្វែងរកករណី និងការឃ្លាំមើល ព្រមទាំងគាំទ្រដល់អ្នកជំនាញបច្ចេកទេសសម្រាប់ការងារឆ្លើយតប និងត្រៀមលក្ខណៈ ផងដែរ។ នេះបើយោងតាមរបាយការណ៍ Factsheet ផ្ដល់ដោយស្ថានទូតអាមេរិកប្រចាំកម្ពុជា។
ជាមួយគ្នានេះដែរ មជ្ឈមណ្ឌលប្រយុទ្ធប្រឆាំងនិងបង្ការជំងឺឆ្លងរបស់សហរដ្ឋអាមេរិក (CDC) ក៏កំពុងជួយប្រទេសកម្ពុជាលើការងារគ្រប់គ្រងការព្យាបាលនិងតាមដានស្រាវជ្រាវរកអ្នកប៉ះពាល់នឹងអ្នកជំងឺ ការធ្វើតេស្តក្នុងមន្ទីរពិសោធន៍ ការឃ្លាំមើល និងការគ្រប់គ្រងការឆ្លងរាតត្បាត ផងដែរ។
សព្វថ្ងៃនេះដែរ គ្រូពេទ្យជំនាញខាងជំងឺឆ្លងមួយរូប មកពីវិទ្យាស្ថានសុខាភិបាលជាតិរបស់សហរដ្ឋអាមេរិក (NIH) កំពុងជួយផ្ដល់ការពិគ្រោះព្យាបាល និងរៀបចំបង្កើតគោលការណ៍ណែនាំថែទាំព្យាបាល ឲ្យមន្ទីរពេទ្យរ៉ូយ៉ាល់ភ្នំពេញ (មន្ទីរពេទ្យឯកជនមួយនៅកម្ពុជា ដែលផ្ដល់សិទ្ធិឲ្យទទួលព្យាបាលជំងឺកូវីដ១៩)។
លោកទូតអាមេរិក Patrick Murphy (ឆ្វេង) និងលោករដ្ឋមន្ត្រីសុខាភិបាលកម្ពុជា ម៉ម ប៊ុនហេង។
ជំនួយចិនដល់កម្ពុជា នៅក្នុងការប្រយុទ្ធប្រឆាំងនឹងវីរុសកូវីដ១៩
កាលពីថ្ងៃទី២៣ ខែមីនា ឆ្នាំ២០២០ ក្រុមគ្រូពេទ្យជំនាញមកពីប្រទេសចិនចំនួន ៧នាក់ ត្រូវបានបញ្ជូនមកដល់ប្រទេសកម្ពុជា ដើម្បីចូលរួមជាមួយកម្ពុជាក្នុងការទប់ស្កាត់ការរីករាលដាលនៃមេរោគ Covid-19 តាមរយៈការជួយព្យាបាល និងបង្ហាត់ក្រុមគ្រូពេទ្យរបស់កម្ពុជា។
បន្ថែមពីលើក្រុមគ្រូពេទ្យជំនាញចំនួន ៧នាក់នេះ រដ្ឋាភិបាលចិន ក៏បានបញ្ជូនភ្ជាប់មកជាមួយនូវសម្ភារៈបរិក្ខារវេជ្ជសាស្ត្រចំនួន ១១ មុខទៀត សម្រាប់ប្រើប្រាស់ក្នុងការងារប្រយុទ្ធប្រឆាំងនឹងមេរោគ Covid-19 នេះ ដែលរួមមានដូចជា ស្រោមដៃ, ម៉ាស់វះកាត់, ម៉ាស់វេជ្ជសាស្ត្រ, ម៉ាស់ N95, មួក, គម្របស្បែកជើង, អាវអ៊ាម, សម្លៀកបំពាក់ សុវត្ថិភាពមន្ត្រីសុខាភិបាល, របាំងមុខវេជ្ជសាស្ត្រ, ទែម៉ូម៉ែត្រវាស់កំដៅប្រើអ៊ិនហ្វ្រារ៉េត, និងវ៉ែនតាសុវត្ថិភាព។
ពុំមានរបាយការណ៍ណាបង្ហើបឲ្យដឹងអំពីតម្លៃគិតជាទឹកប្រាក់ នៃបរិក្ខារពេទ្យជំនួយរបស់ចិនទាំងនេះ នោះឡើយ៕
ក្រុមគ្រូពេទ្យជំនាញចិន ៧នាក់ មកដល់កម្ពុជា កាលពីថ្ងៃទី២៣ មីនា ២០២០ ដើម្បីជួយក្នុងការប្រយុទ្ធប្រឆាំងវីរុសកូវីដ១៩
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
