ក្រសួងសេដ្ឋកិច្ច និងសង្គមឌីជីថល (DES) របស់ប្រទេសថៃ កំពុងរៀបចំសំណុំរឿងផ្លូវច្បាប់ ដើម្បីបិទ Facebook នៅក្នុងប្រទេសក្រោយចោទប្រកាន់ក្រុមហ៊ុនបណ្តាញទំនាក់ទំនងសង្គមយក្សនេះថា បានឃុបឃិតជាមួយប្រតិបត្តិករក្លែងបន្លំ។ ក្រសួងបានចោទប្រកាន់ថា Facebook មានជាប់ពាក់ព័ន្ធក្នុងការជួយអ្នកបោកប្រាស់ ដែលបានប្រើប្រាស់ការឧបត្ថម្ភលើវេទិកាក្នុងកម្មវិធីបណ្តាញសង្គមនេះ ដើម្បីបញ្ឆោតពលរដ្ឋថៃឱ្យធ្វើការវិនិយោគ។ ក្រសួងសេដ្ឋកិច្ច និងសង្គមឌីជីថលថៃគ្រោងនឹងយកច្បាប់ឧក្រិដ្ឋកម្មកុំព្យូទ័រ ដើម្បីប្តឹងទៅកាន់តុលាការ ប្រឆាំងនឹង Facebook។
យោងតាមលោក Chaiwut Thanakamanusorn រដ្ឋមន្ត្រីក្រសួងសេដ្ឋកិច្ច និងសង្គមឌីជីថលថៃបានឱ្យដឹងថា ទោះបីជាមានការអង្វរសុំកិច្ចសហប្រតិបត្តិការពីក្រសួង និងភ្នាក់ងារពាក់ព័ន្ធផ្សេងទៀតក៏ដោយ Facebook ខកខានក្នុងការត្រួតពិនិត្យឱ្យបានគ្រប់គ្រាន់នូវសកម្មភាពក្លែងបន្លំនៅលើគេហទំព័ររបស់ខ្លួន ទើបបាននាំឱ្យមានស្ថានភាពដូចបច្ចុប្បន្ននេះ។ លោក Chaiwut គូសបញ្ជាក់ពីទំហំនៃការបោកប្រាស់តាមអ៊ីនធឺណិតប្រមាណ៧០%គឺចេញមកពីបោកប្រាស់តាម Facebook ធៀបនឹងការបោកប្រាស់សរុបនៅក្នុងប្រទេសថៃ ។
អត្ថបទគួរអាន
បើទោះបីជា Facebook បានសហការជាមួយក្រសួងក្នុងការបិទគេហទំព័របោកប្រាស់ទាំងនោះក៏ពិតមែន គេហទំព័រថ្មីនៅតែបន្តកើតមាន ដែលធ្វើឲ្យកិច្ចខិតខំប្រឹងប្រែងនៅមានលក្ខណៈមិនគ្រប់គ្រាន់។ ក្នុងនោះ លោក Chaiwut បានសង្កត់ធ្ងន់ថា Facebook គួរតែចាត់វិធានការសកម្មបន្ថែមទៀត ដូចជាការពិនិត្យអ្នកប្រើប្រាស់ ឬគណនីដែលឧបត្ថម្ភទំព័រផ្សព្វផ្សាយគម្រោងវិនិយោគក្លែងបន្លំជាដើម។ រដ្ឋមន្ត្រីឌីជីថលថៃរូបនេះឱ្យដឹងទៀតថា មានពាក្យបណ្តឹងចំនួន៣០ម៉ឺនករណី ពាក់ព័ន្ធនឹងការក្លែងបន្លំត្រូវបានដាក់បញ្ចូលទាំងនៅក្នុងតុលាការព្រហ្មទណ្ឌ និងរដ្ឋប្បវេណីដោយបុគ្គល និងស្ថាប័នផ្សេងៗ។
ស្របពេលជាមួយគ្នានេះ ប៉ូលីសថៃក៏កំពុងរៀបចំដាក់ពាក្យបណ្តឹងស្រដៀងគ្នាទាំងព្រហ្មទណ្ឌ និងរដ្ឋប្បវេណី ប្រឆាំងនឹងភាគីក្លែងបន្លំលើហ្វេសប៊ុកដែរ។ រួមគ្នាជាមួយនឹងក្រសួងសេដ្ឋកិច្ច និងសង្គមឌីជីថល (DES) បណ្តឹងនេះនឹងត្រូវបានគាំទ្រដោយអង្គភាពសំខាន់ៗផ្សេងទៀត រួមទាំងទីភ្នាក់ងារអភិវឌ្ឍន៍ប្រតិបត្តិការអេឡិចត្រូនិក គណៈកម្មការមូលបត្រ (SEC) នៃប្រទេសថៃផងដែរ។
បច្ចុប្បន្ន មានអ្នកប្រើប្រាស់បណ្តាញសង្គមហ្វេបុកប្រមាណ៦៥លាននាក់នៅក្នុងប្រទេសថៃ ដែលកំពុងមានការបោកប្រាស់តាមរយៈកម្មវិធីសង្គមនេះយ៉ាងសកម្ម និងពិបាកទប់ស្កាត់មែនមែន។ បើតាមរដ្ឋាភិបាលថៃ Facebook គឺជាអ្នកដែលត្រូវទំនួលខុសត្រូវក្នុងការជំរុញដំណើរការពិនិត្យ ដើម្បីជួយលុបបំបាត់ការក្លែងបន្លំ ជាពិសេសនៅលើទំព័រដែលបានឧបត្ថម្ភ ដោយសារទំព័រទាំងនេះបង្កើតប្រាក់ចំណូលពីការផ្សាយពាណិជ្ជកម្មសម្រាប់មាតិកាផ្សេងៗ៕
