ថៃ កើតទុក្ខមិនសុខចិត្តគំរាមប្ដឹងម៉ាឡេស៊ី ទៅអាស៊ាន និងអង្គការពាណិជ្ជកម្ម​ពិភពលោក ក្រោយម៉ាឡេស៊ី ហាមនាំចូលបង្គាថៃ

រដ្ឋមន្ត្រីក្រសួងពាណិជ្ជកម្មថៃ លោកស្រី ស៊ូផាជី សុធុមភុន (Suphajee Suthumpun) បានអះអាងថា រដ្ឋាភិបាលថៃ ចាត់ទុកបម្រាមនេះថា ជាជម្លោះពាណិជ្ជកម្ម និងជាបញ្ហាប្រឈមផ្នែកសេដ្ឋកិច្ចដ៏ធំសម្រាប់ឧស្សាហកម្មគ្រឿងសមុទ្ររបស់ប្រទេសថៃ។

សូមបញ្ជាក់ថា ប្រទេសម៉ាឡេស៊ី បានផ្អាកការនាំចូលបង្គាចំនួន៥ប្រភេទរបស់ថៃ ចាប់ពីថ្ងៃទី១ ខែមិថុនា ឆ្នាំ២០២៦ ដែលធ្វើឱ្យប៉ះពាល់ដល់ការនាំចេញបង្គាថៃ រហូតដល់ទៅជាង១,៣លានដុល្លារអាម៉េរិកក្នុងមួយខែ។ មន្ត្រីថៃ ត្អូញត្អែរថា ពួកគេត្រូវបានភាគីម៉ាឡេស៊ី ជូនដំណឹងត្រឹមតែប៉ុន្មានថ្ងៃប៉ុណ្ណោះ មុនពេលការហាមឃាត់នេះចូលជាធរមាន។ បម្រាមនេះនឹងនៅតែមានសុពលភាពរហូតដល់ប្រទេសថៃ អាចផ្តល់ព័ត៌មានបន្ថែមទាក់ទងលក្ខខណ្ឌតម្រូវ ផ្នែកសុវត្ថិភាពចំណីអាហារដល់ប្រទេសម៉ាឡេស៊ី។
ជម្លោះនេះកើតមានឡើងបន្ទាប់ពីប្រទេសថៃ បានរឹតបន្តឹងការត្រួតពិនិត្យលើការនាំចូលត្រីបាស ដែលជាត្រីសមុទ្ររបស់ម៉ាឡេស៊ី ដោយលើកឡើងពីការព្រួយបារម្ភអំពីសំណល់គីមី និងថ្នាំអង់ទីប៊ីយោទិច។ ជាការឆ្លើយតប ម៉ាឡេស៊ីបានតម្រូវឱ្យថៃ ត្រូវចេញវិញ្ញាបនបត្រថ្មីៗបញ្ជាក់ពីគុណភាពផលិតផលគ្រឿងសមុទ្ររបស់ថៃ រួមទាំងបង្គាផងដែរ។ អាជ្ញាធរថៃ បាននិយាយទាំងមួហ្មងក្នុងចិត្តថា ពួកគេនឹងបន្តស្វែងរកទីផ្សារជំនួស និងប្រើប្រាស់បណ្តាញពាណិជ្ជកម្មដែលមានទាំងអស់ ដើម្បីកាត់បន្ថយផលប៉ះពាល់លើអ្នកផលិត និងអ្នកនាំចេញបង្គារបស់ថៃ៕
ដោយ: តែម សុខុម