លោកស្រី Patricia Mongkhonvanit ប្រធានការិយាល័យគ្រប់គ្រងបំណុលសាធារណៈនៃប្រទេសថៃ ហៅកាត់ថា PDMO បាននិយាយថា ផែនការខ្ចីបំណុលនេះ គឺឆ្លុះបញ្ចាំងពីតម្រូវការរបស់ភ្នាក់ងារ និងសហគ្រាសរដ្ឋ។ ការវិនិយោគនេះ នឹងផ្តោតទៅលើហេដ្ឋារចនាសម្ព័ន្ធដឹកជញ្ជូន ថាមពល ទឹកភ្លើង និងការអភិវឌ្ឍពាណិជ្ជកម្មផ្នែកអវកាស ដើម្បីជំរុញជីវភាពរស់នៅ និងភាពប្រកួតប្រជែងរបស់ប្រទេសថៃ។
លោកស្រីបន្តថា ការិយាល័យនេះ នឹងប្រើប្រាស់យុទ្ធសាស្រ្តគ្រប់គ្រងបំណុលពាក់កណ្តាលអាណត្តិ និងឧបករណ៍ចម្រុះផ្សេងៗ ដើម្បីរក្សាបំណុលសាធារណៈឱ្យស្ថិតក្នុងកម្រិតហានិភ័យសមល្មម ដែលនឹងធានាដល់ភាគីក្នុងស្រុក និងអន្តរជាតិថា ហិរញ្ញវត្ថុសាធារណៈរបស់ថៃ នៅតែរឹងមាំខ្លាំង។
ការិយាល័យ PDMO គ្រោងគាំទ្រដល់ភ្នាក់ងាររដ្ឋ និងឯកជន ក្នុងការផ្តល់សញ្ញាបណ្ណបៃតង សញ្ញាបណ្ណសង្គម និងសញ្ញាបណ្ណនីរន្តរភាព ដែលឆ្លុះបញ្ចាំងពីការប្តេជ្ញាចិត្តរបស់ខ្លួន ក្នុងការដោះស្រាយបញ្ហាសង្គម និងបរិស្ថាន។
អត្ថបទគួរអាន
បន្ទាប់ពីវាយតម្លៃអំពីការចំណាយរបស់រដ្ឋប្រមាណជាង ២១ពាន់លានដុល្លារ នៃទឹកប្រាក់ជាង ២៦ពាន់លានដុល្លារ ដែលត្រូវបានរដ្ឋាភិបាលខ្ចីសម្រាប់ប្រើប្រាស់ប្រយុទ្ធនឹងជំងឺរាតត្បាតកូវីដ១៩ ការិយាល័យ PDMO បានផ្តល់ពិន្ទុខ្ពស់កម្រិត A ចំពោះខ្ទង់ចំណាយដ៏មានប្រសិទ្ធភាពនេះ។ មិនតែប៉ុណ្ណោះ វាបានបង្កើតតម្លៃសេដ្ឋកិច្ចស្មើនឹងទំហំទឹកប្រាក់ជាង ៦៩ពាន់លានដុល្លារ ហើយរំពឹងថា នឹងផ្តល់ចំណូលជាង ១៣ពាន់លានដុល្លារឱ្យរដ្ឋាភិបាលវិញទៀតផង។
គួររំលឹកថា ក្នុងអំឡុងពេលមានវិបត្តិជំងឺរាតត្បាតកន្លងទៅ រាជរដ្ឋាភិបាលថៃបានបង្កើតក្រឹត្យសម្រាប់កម្ចីបន្ទាន់ចំនួន២ ដែលអនុញ្ញាតឱ្យរដ្ឋអាចខ្ចីប្រាក់សរុបដល់ជាង ៣៩ពាន់លានដុល្លារ ដើម្បីដោះស្រាយផលប៉ះពាល់ពីជំងឺកូវីដ១៩។
បើតាមការិយាល័យ PDMO ឱ្យដឹងថា អនុបាតបំណុលសាធារណៈរបស់ថៃ ធៀបនឹងផលិតផលក្នងុស្រុកសរុប (GDP) នៅក្នុងឆ្នាំសារពើពន្ធ ២០២៣ ត្រូវបានរំពឹងថា នឹងថយចុះមកនៅត្រឹម ៦០,៤% ដោយសារតែសេដ្ឋកិច្ចបានងើបឡើងវិញ។ លើសពីនេះ ផលិតផលក្នុងស្រុកសរុប GDP របស់ថៃ នឹងកើនឡើងដល់ជាង ៤៨៣ពាន់លានដុល្លារនៅឆ្នាំក្រោយផងដែរ៕
អត្ថបទ៖ នៅ សំភី
