ការលើកឡើងរបស់មេទីភ្នាក់ងារថាមពលអន្តរជាតិនេះ ធ្វើឡើងនៅចំពេលដែល សហភាពអឺរ៉ុបឯណោះវិញ បានព្រមានប្រឆាំងនឹងការកំណត់តម្លៃឧស្ម័នសម្រាប់ថាមពលអគ្គិសនី។ នេះបើតាមការចេញផ្សាយរបស់ទីភ្នាក់ងាររ៉យទ័រ។
ការកើនឡើងនៃការនាំចូលឧស្ម័ន LNG ទៅកាន់អឺរ៉ុបនៅចំពេលមានវិបត្តិអ៊ុយក្រែន និងការស្ទុះងើបឡើងវិញជាសក្តានុពលនៃតម្រូវការប្រេងឥន្ធនៈរបស់ចិននឹងធ្វើឱ្យទីផ្សារកាន់តែមានភាពតឹងរ៉ឹង ខណៈដែលសមត្ថភាពឧស្ម័ន LNG ថ្មីត្រឹមតែ ២០ ពាន់លានម៉ែត្រគូបនឹងមានលក់នៅលើទីផ្សារពិភពលោកនៅឆ្នាំក្រោយនេះ។ នេះបើយោងតាមនាយកប្រតិបត្តិទីភ្នាក់ងារថាមពលអន្តរជាតិ (IEA )លោក ហ្វាទី ប៊ីរ៉ូល (Fatih Birol) បាននិយាយក្នុងកម្មវិធីថាមពលអន្តរជាតិប្រចាំសប្ដាហ៍នៅសិង្ហបុរី។
ទន្ទឹមនឹងនេះដែរការសម្រេចចិត្តនាពេលថ្មីៗនេះ របស់អង្គការនៃបណ្ដាប្រទេសនាំចេញប្រេងហៅថា អូប៉ិច (OPEC) និងសម្ព័ន្ធមិត្តរបស់ខ្លួនដែលគេស្គាល់ថា OPEC+ ដែលបានកាត់បន្ថយទិន្នផលប្រេង ២ លានបារ៉ែលក្នុងមួយថ្ងៃនោះ គឺជាការសម្រេចចិត្តទាំងប្រថុយប្រថាន ខណៈដែលទីភ្នាក់ងារថាមពលអន្តរជាតិ មើលឃើញកំណើនតម្រូវការប្រេងពិភពលោកដល់ជិត ២ លានបារ៉ែលក្នុងមួយថ្ងៃនៅឆ្នាំនេះ។ នេះបើតាមលោក ប៊ីរ៉ូល។
នាយកប្រតិបត្តិទីភ្នាក់ងារថាមពលអន្តរជាតិរូបនេះបាននិយាយថា វាជាពិសេសគឺមានគ្រោះថ្នាក់ដោយសារសេដ្ឋកិច្ចប្រទេសជាច្រើននៅជុំវិញពិភពលោកកំពុងស្ថិតក្នុងដំណាក់កាលនៃវិបត្តិសេដ្ឋកិច្ច ដូច្នេះ លោកបានរកឃើញថាការសម្រេចចិត្តនេះពិតជាមិនល្អនោះទេ។
អត្ថបទគួរអាន
ប៉ុន្តែលោក ប៊ីរ៉ូល ក៏បាននិយាយដែរថា វិបត្តិថាមពលបច្ចុប្បន្នអាចជាចំណុចរបត់មួយនៅក្នុងប្រវត្តិសាស្ត្រវិស័យថាមពល សម្រាប់ការពន្លឿនប្រភពថាមពលស្អាត និងសម្រាប់ការបង្កើតប្រព័ន្ធថាមពលប្រកបដោយនិរន្តរភាព និងសុវត្ថិភាព។
លោក ប៊ីរ៉ូល បាននិយាយថា សន្តិសុខថាមពលគឺជាកត្តាជំរុញលេខមួយនៃការផ្លាស់ប្តូរថាមពល ខណៈដែលប្រទេសនានាមើលឃើញថា បច្ចេកវិទ្យាថាមពលនិងថាមពលកកើតឡើងវិញជាដំណោះស្រាយសំខាន់មួយសម្រាប់បញ្ហា។
ចំពេលពិភពលោកកំពុងប្រឈមមុខនឹងវិបត្តិថាមពលនេះដែរ គណៈកម្មការអឺរ៉ុបបានព្រមានប្រទេសនានាថា ការកំណត់តម្លៃឧស្ម័ននៅទូទាំងសហភាពអឺរ៉ុប ដែលប្រើសម្រាប់ផលិតអគ្គិសនីអាចបណ្តាលឱ្យមានការកើនឡើងនៃការប្រើប្រាស់ឧស្ម័ន និងការនាំចេញអគ្គិសនី ដែលមានការឧបត្ថម្ភធនដោយសហភាពអឺរ៉ុប។ នេះបើយោងតាមឯកសារដែលចេញផ្សាយដោយទីភ្នាក់ងារ Reuters ។
គណៈរដ្ឋមន្ត្រីថាមពលនៃបណ្តាប្រទេសនៅសហភាពអឺរ៉ុបបានជួបប្រជុំគ្នានៅថ្ងៃអង្គារទី២៥តុលានេះ ដើម្បីពិភាក្សាពីជម្រើសក្នុងការកំណត់តម្លៃឧស្ម័នរបស់សហភាពអឺរ៉ុប ដោយប្រទេសនានានៅតែខ្វែងគំនិតគ្នាថា តើត្រូវធ្វើដូចម្តេចចំពោះបញ្ហានេះបន្ទាប់ពីពិភាក្សាគ្នាអស់ជាច្រើនសប្តាហ៍មកនេះ។
ការកំណត់តម្លៃឧស្ម័នរបស់សហភាពអឺរ៉ុប ក៏មានប្រទេសខ្លះសារទរ និងខ្លះមិនពេញចិត្តដែរ ជាក់ស្ដែង អាល្លឺម៉ង់ និងហូឡង់បានព្រមានថា ការកំណត់តម្លៃដើម្បីធ្វើឱ្យឧស្ម័នកាន់តែមានតម្លៃថោកនេះ អាចធ្វើឱ្យកើនឡើងនៃការប្រើប្រាស់ឧស្ម័ន នៅពេលប្រទេសនានាកំពុងប្រណាំងប្រជែងគ្នាដើម្បីសន្សំសំចៃប្រេង និងជំនួសការផ្គត់ផ្គង់ឧស្ម័នពីរុស្ស៊ី។ តួយ៉ាង នៅមុនសង្គ្រាមនៅអ៊ុយក្រែនផ្ទុះឡើង ទីក្រុងម៉ូស្គូបានផ្គត់ផ្គង់ឧស្ម័ន ១៥៥ ពាន់លានម៉ែត្រគូបទៅឱ្យសហភាពអឺរ៉ុប៕
អត្ថបទ៖ សុខ ជា
