បន្ថែមពីនេះ ការដាក់ពន្ធរឹតត្បិតការនាំចេញអង្កររបស់ឥណ្ឌានាពេលថ្មីៗនេះ ក៏បន្ថែមបន្ទុកកាន់តែខ្លាំងថែមទៀត ទៅលើទីផ្សារអង្ករពិភពលោក ដែលគេជឿថា តម្លៃអង្ករនឹងកើនកាន់តែខ្ពស់ថែមទៀត។ នេះបើតាមការរាយការណ៍ដោយសារព័ត៌មានអន្តរជាតិធំៗជាច្រើន។
រដ្ឋមន្ត្រីក្រសួងកសិកម្មថៃ លោក Chalermchai Sri-on នឹងធ្វើដំណើរទស្សនកិច្ចនៅប្រទេសវៀតណាមនៅថ្ងៃទី ៦-៧ ខែតុលាខាងមុខនេះ សម្រាប់ការពិភាក្សាជាមួយនឹងរដ្ឋមន្ត្រីក្រសួងកសិកម្មវៀតណាម លោក Le Minh Hoan ពាក់ព័ន្ធនឹងកិច្ចសហប្រតិបត្តិការកសិកម្ម រួមទាំងរឿងការដំឡើងថ្លៃអង្ករនាំចេញផងដែរ។ នេះបើតាមការអះអាងរបស់មន្ត្រីរដ្ឋាភិបាលថៃ ដែលត្រូវបានស្រង់សម្ដីចុះផ្សាយដោយសារព័ត៌មាន Nikkei។
បើតាមសារព័ត៌មានរបស់ជប៉ុនដដែនេះ បានគូសបញ្ជាក់ថា ប្រទេសវៀតណាម និងថៃ អាចនឹងដំឡើងថ្លៃអង្ករប្រហែល២០%បន្ថែមទៀត ហើយវានឹងធ្វើឲ្យតម្លៃស្បៀងអាហារពិភពលោកនឹងកើនកាន់តែខ្ពស់ និងជំរុញកំណើនអតិផរណាសកលលោកផងដែរ នៅចំពេលដែលសង្គ្រាមនៅអ៊ុយក្រែននៅតែបន្ដឆេះក្ដៅងំនៅឡើយនោះ។
អត្ថបទគួរអាន
ថៃ និងវៀតណាម បានព្រមព្រៀងគ្នាកាលពីដើមខែកញ្ញានេះ ដើម្បីសហប្រតិបត្តិការនៅក្នុងការដំឡើងថ្លៃអង្ករនាំចេញ ដោយលើកឡើងពីហេតុផលថា តម្លៃអង្ករនាពេលបច្ចុប្បន្ន មិនអាចឲ្យកសិកររបស់ពួកគេមិនអាចទូទាត់ថ្លៃចំណាយខ្ពស់ក្នុងផលិតកម្មបានទេ ដោយសារតែការចំណាយលើថ្លៃជីថ្នាំកសិកម្ម និងប្រេងឥន្ធនៈកើនខ្ពស់។
តម្លៃអង្ករត្រូវបានគេមើលឃើញថា គឺមានស្ថិរភាព បើធៀបនឹងតម្លៃស្រូវសាលី ដែលបានកើនឡើងយ៉ាងខ្លាំងចាប់តាំងពីសង្គ្រាមរុស្ស៊ីចូលឈ្លានពានអ៊ុយក្រែនមក។ យ៉ាងណាមិញ ប្រទេសឥណ្ឌា ដែលជាអ្នកនាំចេញអង្ករដ៏ធំជាងគេបំផុតក្នុងពិភពលោកនោះ ថ្មីៗនេះ ទើបតែបានដំឡើងពន្ធអង្ករនាំចេញ២០% សម្រាប់ប្រភេទអង្ករមួយចំនួន ដើម្បីជំរុញការផ្គត់ផ្គង់ក្នុងស្រុក ហើយការដំឡើងពន្ធនេះបានចូលជាធរមានតាំងពីថ្ងៃទី ៩ខែកញ្ញាមកម្ល៉េះ។
សូមបញ្ជាក់ថា ការនាំចេញអង្កររបស់ថៃ បានកើនឡើងតម្លៃដល់ ៤៤៦ដុល្លារក្នុងមួយតោន កាលពីខែសីហាកន្លងទៅនេះ ពោលគឺបានកើនឡើង៧% ធៀបនឹងឆ្នាំមុន ខណៈដែលការនាំចេញអង្កររបស់វៀតណាមវិញ មានតម្លៃ ៣៨៥ដុល្លារក្នុងមួយតោន។ នេះបើតាមទិន្នន័យពីអង្គការស្បៀងអាហារ និងកសិកម្មរបស់អង្គការសហប្រជាជាតិ។
ការនាំចេញអង្ករទូទាំងសាកលលោកនៅឆ្នាំ២០២១ សម្រេចបានដល់ទៅជិត៥២លានតោន ក្នុងនោះ ការនាំចេញរបស់ប្រទេសឥណ្ឌាមានជាង៤១% និងតាមពីក្រោយដោយវៀតណាម និងថៃ មានប្រហែល១២%ប្រហាក់ប្រហែលគ្នា ខណៈដែលប្រទេសចិន និងហ្វីលីពីន គឺជាអ្នកនាំចូលអង្ករដ៏ធំជាងគេបំផុត។ នេះបើតាមទិន្នន័យពីក្រសួងកសិកម្មអាមេរិក៕
