ក្រុមហ៊ុនជប៉ុនជាច្រើនតាមធម្មតាមិនចង់ដំឡើង ឬបង្កើនប្រាក់ឈ្នួលដល់កម្មករនិយោជិតរបស់ខ្លួននោះទេ ដោយសារតែបរិត្តផរណា ឬការធ្លាក់ចុះនៃតម្លៃទំនិញ សេវាកម្មជាច្រើនទសវត្សរ៍មកនេះ បានធ្វើឱ្យពួកគេពិបាកក្នុងការបង្កើនខ្ទង់ចំណាយកាន់តែច្រើនដល់អ្នកប្រើប្រាស់។
ប៉ុន្តែពេលនេះ អ្វីៗទំនងជានឹងអាចផ្លាស់ប្ដូរហើយ ខណៈដែលការកើនឡើងតម្លៃទំនិញទ្វេដង និងការធ្លាក់ចុះតម្លៃប្រាក់យ៉េនរបស់ជប៉ុនបានជំរុញឱ្យមានការចំណាយសម្រាប់ទ្រទ្រង់ជីវិតកាន់តែខ្លាំងឡើង និងជំរុញឱ្យគេត្រូវគិតគូរពីផលលំបាករបស់កម្មករនិយោជិតផងដែរ ហើយនាយករដ្ឋមន្រ្តីជប៉ុនលោក Fumio Kishida ក៏បានអំពាវនាវឱ្យក្រុមហ៊ុនដំឡើងប្រាក់ឈ្នួលដល់កម្មករនិយោជិតផងដែរ។
អ្នកគ្រប់គ្រងក្រុមហ៊ុនលក់រាយមួយរបស់ជប៉ុនបានលើកឡើងថា ជារួមពួកគេកំពុងប្រឈមមុខនឹងកង្វះកម្លាំងពលកម្ម ដូច្នេះហើយពួកគេកំពុងប្រឹងប្រែងធ្វើយ៉ាងណាដើម្បីទាក់ទាញចំណាប់អារម្មណ៍របស់អ្នកធ្វើការក្រៅម៉ោងនៅតាមហាងជាពិសេសតែម្ដង គឺតាមរយៈការឆ្លើយតបជាមួយការបង្កើនប្រាក់ឈ្នួលនេះតែម្ដង ប៉ុន្តែវាមានដែនកំណត់ផងដែរ មិនមែនចេះតែដំឡើងគ្រប់រឿងនោះទេ។
អត្ថបទគួរអាន
ការស្ទង់មតិរបស់ក្រុមហ៊ុនមិនមែនហិរញ្ញវត្ថុធំៗចំនួន ៤៩៥ កន្លែង ដែលបានធ្វើកាលពីថ្ងៃទី ២ ដល់ថ្ងៃទី១២ ខែសីហាបានគូសបញ្ជាក់ថា ក្រុមហ៊ុនជាច្រើនហាក់ដូចជាមានឆន្ទៈកាន់តែខ្លាំងឡើងក្នុងការបង្កើនប្រាក់ឈ្នួល។ ក្រុមហ៊ុនចំនួន ៤៤% បានបង្ហាញពីការដំឡើងប្រាក់ឈ្នួលដោយចាត់ទុកវាថា ជាយុទ្ធសាស្ត្រមួយក្នុងចំណោមយុទ្ធសាស្ត្រជាច្រើនរបស់ពួកគេ ក្នុងការទប់ទល់នឹងបញ្ហាកង្វះខាតកម្លាំងពលកម្ម។ ចំណែកក្រុមហ៊ុនចំនួន ៥៩% ទៀតបានជ្រើសរើសយកវិធានការឌីជីថល និងវិធានការផ្សេងទៀត ដើម្បីសន្សំកម្លាំងមនុស្សដែលជាយុទ្ធសាស្ត្រមួយក្នុងចំណោមយុទ្ធសាស្ត្រផ្សេងៗទៀតរបស់ពួកគេ។
លោក Koya Miyamae សេដ្ឋវិទូជាន់ខ្ពស់នៅក្រុមហ៊ុន SMBC Nikko Securities បាននិយាយថា វាកំពុងមានទំនោរផ្លាស់ប្តូរនៅពេលកង្វះកម្លាំងពលកម្ម ដោយវាជំរុញឱ្យក្រុមហ៊ុនកាន់តែច្រើនធ្វើការដំឡើងប្រាក់ឈ្នួលជាមិនខាន ប៉ុន្តែពេលនេះមិនទាន់មានច្រើននោះទេព្រោះវាទើបតែជាការចាប់ផ្តើមប៉ុណ្ណោះ គេត្រូវចាំមើលដល់ពេលដែលចំនួនមនុស្សចាស់កាន់តែច្រើន និងខ្វះកម្លាំងពលកម្មកាន់តែខ្លាំងនោះ ពេលនោះហើយ គឺសន្ទុះនៃការដំឡើងប្រាក់ឈ្នួលនឹងមានល្បឿនខ្លាំងដូចជាទឹកបាក់ទ្រនប់អ៊ីចឹង។
ក្រុមហ៊ុន ៥៤% បាននិយាយថា ពួកគេបានប្រឈមមុខនឹងបញ្ហាកម្លាំងពលកម្ម ហើយខ្វះខ្លាំងបំផុតគឺនៅក្នុងចំណោមក្រុមហ៊ុនមិនមែនជាផលិតករតែម្ដង ហើយ៥៩% បាននិយាយថា ពួកគេបានក្បិតត្បៀតសម្រាប់បុគ្គលិកខ្លាំងបំផុត។
ក្រុមហ៊ុនជប៉ុនជាច្រើនក៏បានអំពាវនាវឱ្យមានបរិយាកាសការងារកាន់តែប្រសើរឡើងរួមទាំងការជួលពេញមួយឆ្នាំ និងការពន្យារពេលចូលនិវត្តន៍ផងដែរ៕
អត្ថបទ៖ សុខ ជា
