ថៃប្ដេជ្ញានឹងជំរុញឲ្យមានការបើកទូលាយចំពោះវិស័យសេដ្ឋកិច្ចពាណិជ្ជកម្មនៅអាស៊ីប៉ាស៊ីហ្វិច

ក្រោយ​បញ្ចប់​កិច្ចប្រជុំ APEC នៅ​ឆ្នាំ​២០២១  ប្រទេស​ថៃ​ដែល​ជា​អ្នក​បន្តវេន​ធ្វើ​ជា​ម្ចាស់ផ្ទះ​នៃ​កិច្ចប្រជុំ APEC នៅ​ឆ្នាំ​២០២២ នឹង​ជ្រើសរើស​ប្រធានបទ​ទាក់ទង​នឹង “​ការ​បើក​ទូលាយ ត​ភ្ជាប់ តុល្យភាព​” សម្រាប់​កិច្ចប្រជុំ​កំពូល APEC នៅ​ឆ្នាំ​ក្រោយ​នេះ​។ លេខាធិការ​អចិន្ត្រៃយ៍​ទទួល​បន្ទុក​កិច្ចការបរទេស​ប្រទេស​ថៃ បានឱ្យ​ដឹង​ថា ប្រធានបទ​នេះ​ប្រកាន់​យក​នូវ​សេដ្ឋកិច្ច​បៃតង (BCG) ជា​គោលការណ៍​ណែនាំ​ដ៏​ទូលំទូលាយ​។ ពោល​ការ​ធ្វើ​ជា​ម្ចាស់ផ្ទះ​របស់​ប្រទេស​ថៃ នឹង​ផ្តោត​លើ​ការ​គូសវាស​ផែនទី​នា​ពេល​អនាគត ក្រោយ​វិបត្តិ​កូ​វី​ដ​១៩ សម្រាប់​តំបន់​អាស៊ី​ប៉ា​ស៊ី​ហ្វិ​ក​ទាំងមូល ដោយ​នឹង​ឆ្ពោះទៅ​មុខ គេច​ចេញពី​វិបត្តិ​សុខភាព និង​វិបត្តិ​សេដ្ឋកិច្ច ហើយ​ជំរុញ​កំណើន​រយៈពេល​វែង​ដែល​មាន​ភាព​ធន់ រួម​បញ្ចូល​ទាំង​តុល្យភាព និង​ចីរភាព​។

សូម​ជម្រាប​ថា វិស័យ​ពាណិជ្ជកម្ម និង​ការ​វិនិយោគ​គឺជា គោលដៅ​ស្នូល​របស់ APEC ដូច្នេះ​ការ​គូសវាស​ផែនទី​ប្រកបដោយ​និរន្តរភាព​ដើម្បី​ជំរុញ​ការ​ងើបឡើង​វិញ​នៃ​វិស័យសេដ្ឋកិច្ច ដែល​ទាមទារ​ឱ្យ​មាន​វិធីសាស្ត្រ​ក្នុង​ការ​គិតគូ​ឡើង​វិញ​ចំពោះ​សសរស្តម្ភ​មួយ​ចំនួន ដើម្បី​ជា​ជ​ន្ទ​ល់​របស់​សេដ្ឋកិច្ច​។ ជាក់ស្ដែង ប្រទេស​ថៃ​ក៏​បាន​ស្នើ​ឱ្យ​ចាប់ផ្តើម​កិច្ច​ពិភាក្សា​ឡើង​វិញ ដើម្បី​សម្រេច​បាន​នូវ​ពាណិជ្ជកម្ម​សេរី​នៃ​អាស៊ី​ប៉ា​ស៊ី​ហ្វិ​ក (FTAAP) បន្ទាប់​ពី​ជំងឺ​រាតត្បាត​កូ​វី​ដ​១៩​ត្រូវ​គ្រប់គ្រង​បាន នៅ​ក្នុង​ពេល​ខាង​មុខ​នេះ​។

កិច្ច​ពិភាក្សា​នេះ នឹង​ដោះស្រាយ​បញ្ហា​ដូច​ជា​ការ​ធ្វើ​ឱ្យ​ខ្សែ​ចង្វាក់​ផ្គត់ផ្គង់​មាន​ភាព​ធន់​ជាង​មុន និង​ប្រកបដោយ​ចីរភាព​នៃ​បញ្ហា​ដែល​ទាក់ទង​នឹង​ពាណិជ្ជកម្ម ដែល​កំពុង​កើត​មាន​ដូច​ជា​ការ​ប្រែប្រួល​អាកាសធាតុ និង​សេដ្ឋកិច្ច​ឌី​ជី​ថ​ល​។

សូម​បញ្ជាក់​ថា  កិច្ច​សហប្រតិបត្តិការ​សេដ្ឋកិច្ច​អាស៊ី​ប៉ា​ស៊ី​ហ្វិ​ក ឬ ហៅ​កាត់​ថា APEC មាន​សមាជិក​ចូលរួម​ចំនួន ២១ ប្រទេស និង​ដែនដី ដោយ​ទំហំ GDP របស់​សមាជិក​ទាំង​២១​នេះ មាន​ដល់​ទៅ​ពាក់កណ្ដាល​នៃ GDP ពិភពលោក និង​មាន​ប្រជាជន​សរុប​ជាង​២​ពាន់​៧​រយ​លាន​នាក់​៕