កសិករថៃនឹងទទួលថវិកាលើកទឹកចិត្តពីរាជរដ្ឋាភិបាលថៃ ជិត៣០ដុល្លារក្នុង១រ៉ៃ ឬ១៦០០ម៉ែត្រការ៉េក្នុង១គ្រួសារ ប្រសិនបើពួកគេមិនដាំដុះដំណាំស្រូវក្រៅរដូវ ខណៈសេចក្តីព្រាងចុងក្រោយ ស្តីពីការផ្តល់ថវិកាលើកទឹកចិត្តនេះ បានរៀបចំរួចរាល់ហើយ រង់ចាំតែការអនុម័តសម្រេចពីលោក ពិឆៃ ឈុនហាវ៉ាជីរ៉ា (Pichai Chunhavajira) រដ្ឋមន្ត្រីក្រសួងហិរញ្ញវត្ថុតែប៉ុណ្ណោះ។
បើយោងតាមការគូសបញ្ជាក់របស់គណៈកម្មាធិការគោលនយោបាយ និងគ្រប់គ្រងស្រូវអង្ករ គោលបំណងនៃការផ្តល់ថវិកាលើកទឹកចិត្តដល់កសិករនេះ គឺដើម្បីដោះស្រាយបញ្ហាការធ្លាក់ចុះតម្លៃស្រូវ។ កសិករថៃនឹងទទួលបានការឧបត្ថម្ភលើកទឹកចិត្តលើផ្ទៃដីមិនលើសពីទំហំ១០រ៉ៃឬ១,៦ហិកតាក្នុង១គ្រួសារប៉ុណ្ណោះ ក្រោយពួកគេបានចុះកិច្ចសន្យាជាមួយក្រសួងកសិកម្ម ដើម្បីប្តូរពីការដាំដុះស្រូវទៅដាំដំណាំផ្សេង ប៉ុន្តែកិច្ចសន្យានេះអាចបត់បែនទៅតាមការពិនិត្យជាក់ស្តែងរបស់មន្ត្រីជំនាញ។
យ៉ាងណាមិញរដ្ឋមន្ត្រីក្រសួងពាណិជ្ជកម្ម លោក ពិឆៃ ណារីបថាផាន (Pichai Naripthaphan) ចង់ឱ្យកសិករដាំស្រូវប្តូរទៅដាំចេកសម្រាប់នាំចេញទៅប្រទេសជប៉ុន ខណៈរដ្ឋមន្ត្រីក្រសួងហិរញ្ញវត្ថុ ស្នើឱ្យកសិករងាកមកចិញ្ចឹមបង្កងវិញ ព្រោះទីផ្សារនៅមានតម្រូវការខ្ពស់៕
អត្ថបទ៖ សុខ មង្គល
