ឧបការីទេសាភិបាលធនាគារកណ្ដាលថៃលោក សាក់កាពុប ផាន់យ៉ានុគុល (Sakkapop Panyanukul) បានលើកឡើងតាមរយៈអត្ថបទមួយចេញផ្សាយលើគេហទំព័ររបស់ធនាគារកណ្ដាលថៃថា ការសម្រេចចិត្តផ្តល់ប្រាក់កម្ចីរបស់គ្រឹះស្ថានធនាគារនឹងអាស្រ័យលើសមត្ថភាពរបស់អ្នកខ្ចី ឬកូនបំណុលក្នុងការសងកម្ចីត្រលប់មកវិញ។ លោកបានអះអាងថា ប្រព័ន្ធធនាគារក្នុងប្រទេសថៃ មានសន្ទនីយភាព ឬសាច់ប្រាក់ងាយស្រួលច្រើនលើសលប់ក្នុងរយៈពេល១០ឆ្នាំកន្លងមកនេះ។ នេះបើផ្អែកលើទំហំប្រាក់បញ្ញើ និងការវិនិយោគរបស់បណ្ដាធនាគារពាណិជ្ជនៅធនាគារកណ្ដាលថៃ ក្នុងពេលកន្លងមក។
បើតាមការលើកឡើងរបស់ថ្នាក់ដឹកនាំរូបនេះ ទំហំប្រាក់បញ្ញើ និងការវិនិយោគរបស់បណ្ដាធនាគារពាណិជ្ជនៅធនាគារកណ្ដាលថៃ មានរហូតដល់ចន្លោះពីជាង១១៥ពាន់លានដុល្លារអាម៉េរិក ទៅជាង១៤៤ពាន់លានដុល្លារអាម៉េរិកឯណោះ។
រដ្ឋាភិបាលថៃ បានគូសបញ្ជាក់ថា បំណុលគ្រួសារខ្ពស់របស់ពលរដ្ឋជាឧបសគ្គរាំងស្ទះដល់កិច្ចខិតខំប្រឹងប្រែងរបស់ខ្លួនក្នុងការជំរុញកំណើនសេដ្ឋកិច្ច ដែលបានងើបឡើងវិញយឺតយ៉ាវពីវិបត្តិកូវីដ-១៩។ កត្តានេះបានជំរុញឱ្យបណ្ដាធនាគារពាណិជ្ជបង្កើនការផ្ដល់កម្ចី។
លោក សាក់កាពុប ផាន់យ៉ានុគុល បានអះអាងថា វិធានរបស់ធនាគារកណ្តាលថៃ ស្ដីពីការផ្តល់ប្រាក់កម្ចីប្រកបដោយទំនួលខុសត្រូវ គ្រាន់តែតម្រូវឱ្យបណ្ដាគ្រឹះស្ថានធនាគារពិចារណាកំណត់ទំហំនៃការសងរំលស់ ដែលសមស្របទៅនឹងការចំណាយថ្លៃជីវភាពរស់នៅរបស់អ្នកខ្ចី ឬកូនបំណុលតែប៉ុណ្ណោះ។
កាលពីព្រឹកថ្ងៃទី២៥ ខែវិច្ឆិកា សហព័ន្ធឧស្សាហកម្មថៃ បាននិយាយថា ការផលិត និងការលក់រថយន្តនៅក្នុងប្រទេសថៃ បានរងផលប៉ះពាល់យ៉ាងខ្លាំងដោយសារតម្រូវការធ្លាក់ចុះ ខណៈដែលបណ្ដាគ្រឹះស្ថានហិរញ្ញវត្ថុរួមទាំងធនាគារផងបានរឹតបន្តឹងការផ្តល់កម្ចីទិញរថយន្ត៕
ដោយ: តែម សុខុម
