បច្ចុប្បន្នកម្ពុជាមានអគារខ្ពស់ៗចាប់ពី៥ជាន់ឡើងទៅជាង២ពាន់៥រយអគារ ខណៈអគារដែលមានកម្ពស់ចាប់ពី៤០ជាន់មានជាង៥០អគារ។ មន្ត្រីជាន់ខ្ពស់ក្រសួងរៀបចំដីបានចាត់ទុកកំណើននេះ គឺបានបង្ហាញពីភាពល្អប្រសើរនៃសំណង់របស់កម្ពុជា ខណៈរំពឹងថា ការកើនឡើងនេះនឹងបន្តរហូតដល់ដំណាច់ឆ្នាំ២០២៣។
ឯកឧត្តម ឡៅ ទិព្ធសីហា រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់បានគូសបញ្ជាក់ថា មានគម្រោងជាង១ពាន់៤រយគម្រោងជាមួយទុនវិនិយោគជាង២ពាន់២រយលានដុល្លារ ត្រូវបានក្រសួងរៀបចំដែនដី នគរូបនីយកម្ម និងសំណង់ផ្តល់លិខិតអនុញ្ញាតឲ្យសាងសង់នៅក្នុងពេល៥ខែឆ្នាំនេះ។ ទំហំទុនវិនិយោគនេះមានការកើនឡើង១៣៨% បើធៀបនឹងទុនវិនិយោគក្នុងរយៈពេលដូចគ្នាកាលពីឆ្នាំ២០២២។ គម្រោងវិនិយោគថ្មីៗទាំងនេះ ភាគច្រើនត្រូវបានវិនិយោគដោយវិនិយោគក្នុងស្រុក។ បើតាមការគូសបញ្ជាក់របស់រដ្ឋលេខាធិការរូបនេះ សម្រាប់គម្រោងអភិវឌ្ឍន៍បរទេស ក្រសួងបានផ្តល់លិខិតអនុញ្ញាតសាងសង់បានចំនួន៤១គម្រោងជាមួយទុនវិនិយោគជិត ៦រយលានដុល្លារអាមេរិកនៅក្នុងរយៈពេលដូចគ្នានេះ។ វិនិយោគិនបរទេសដែលបានមកបោះទុនវិនិយោគនៅកម្ពុជារួមមានវិនិយោគិនចិន ជប៉ុន កូរ៉េខាងត្បូង និងមកពីប្រទេសមួយចំនួនទៀត។
ឯកឧត្តម ឡៅ ទិព្ធសីហា បានចាត់ទុកការកើនឡើងទំហំទុនវិនិយោគខាងលើ គឺបានបង្ហាញពីភាពល្អប្រសើរនៃវិស័យសំណង់នៅកម្ពុជា ហើយវាក៏បានស្របនឹងអ្វីដែលក្រសួងសេដ្ឋកិច្ចបានព្យាករថា វិស័យសំណង់នឹងមានការកើនឡើងនៅឆ្នាំនេះផងដែរ។ ឯកឧត្តមរំពឹងថា កំណើនគម្រោងវិនិយោគក្នុងវិស័យសំណង់នឹងបន្តកើនឡើងដល់ដំណាច់ឆ្នាំ២០២៣។
អត្ថបទគួរអាន
បើការគូសបញ្ជាក់របស់មន្ត្រីជាន់ខ្ពស់ដដែលរូបនេះ បច្ចុប្បន្នកម្ពុជាមានអគារខ្ពស់ៗកម្ពស់ចាប់ពី៥ជាន់ឡើងទៅសរុបចំនួន២ពាន់៥៨១អគារ ក្នុងនោះរាជធានីភ្នំពេញមានអគារខ្ពស់ៗច្រើនជាងគេរហូតដល់១៧១១អគារ ខណៈខេត្តព្រះសីហនុឈរលំដាប់ទីពីរមាន៩៩០អគារ ខេត្តបន្ទាយមានជ័យមាន១៤២អគារ និងខេត្តផ្សេងៗមានចំនួន៤៣អគារ។ ជាមួយគ្នានេះអគារដែលមានកម្ពស់ចាប់ពី ៤០ជាន់ឡើងទៅ មានចំនួន៥២អគារ ដែលជាចំនួនខ្ពស់គួរសមបើធៀបនឹងប្រទេសមួយចំនួននៅក្នុងតំបន់។ ដោយឡែក ចំពោះបុរីលំនៅឋាន និងបណ្តុំលំនៅឋានជាលក្ខណៈបុរីមានចំនួន៥៧៤គម្រោង បើគិតជាខ្នងផ្ទះមានប្រមាណ៤ម៉ឺនខ្នងផ្ទះ ដែលត្រូវបានសាងសង់នៅក្នុងរយៈពេល៥ខែកន្លងមកនេះ។ តាមការវាយតម្លៃរបស់ក្រសួងរៀបចំដែនដី នគរូបនីយកម្ម និងសំណង់ប្រជាពលរដ្ឋកម្ពុជាមានតម្រូវការផ្ទះប្រមាណ៨០ខ្នងក្នុង១ឆ្នាំ៕
