លោក សែម រឿន ប្រធានការិយាល័យសេដ្ឋសាស្ត្រខេត្តរតនគិរី បានឲ្យដឹងថាទីផ្សារដំឡូងមីនៅឆ្នាំនេះ ហាក់មានតម្លៃប្រហាក់ប្រហែលនឹងឆ្នាំមុនដែរ ដែលជាមធ្យមតម្លៃ ដំឡូងមីស្រស់មានតម្លៃចន្លោះពី ៣២០ ទៅ ៣៨០ រៀលក្នុងមួយគីឡូក្រាម ចំណែកឯដំឡូងមីក្រៀមវិញអាចលក់បានទៅដល់ប្រមាណ ៧៥០ រៀលក្នុងមួយគីឡូក្រាម តម្លៃនេះ គឺអាស្រ័យទៅលើគុណភាពដំឡូងមី និងទីតាំងរបស់ប្រជាកសិករ។
លោក សែម រឿន បានបន្ថែមទៀតថា ចំពោះផ្ទៃដីដាំដំឡូងមីរបស់ប្រជាកសិករក្នុងខេត្តមណ្ឌលគិរីឆ្នាំនេះ មានការកើនឡើងតិចតួចប៉ុណ្ណោះ ដោយសារតែប្រជាកសិករមួយចំនួនបានដាំដំឡូងមីផង រួមទាំងដាំស្វាយចន្ទីផង ដោយសារតែដំណាំដំឡូងមីនេះ ជាដំណាំដែលខ្ចីដីដាំ មានន័យថាពួកគាត់មើលលើទីផ្សារថា តម្លៃមួយណាខ្ពស់ជាងមួយណា ប្រជាកសិករនឹងដាំដំណាំនោះច្រើនជាង។
លោក ឈឺម វជិរា ប្រធានមន្ទីរកសិកម្មរុក្ខាប្រមាញ់ និងនេសាទ ខេត្តបាត់ដំបង តម្លៃទីផ្សារដំឡូងមីក្នុងឆ្នាំនេះ មានការកើនឡើងជាងឆ្នាំមុន សម្រាប់ដំឡូងមីស្រស់មានការកើនឡើង ៣០រៀលក្នុងមួយគីឡូក្រាម ចំណែកឯដំឡូងមីក្រៀមវិញកើនឡើង ៥០ ទៅ ៧០រៀល ក្នុងមួយគីឡូក្រាម ដែលនាំឲ្យតម្លៃជាមធ្យមដំឡូងមីស្រស់មានតម្លៃ ២៤២ រៀលមួយគីឡូក្រាម និង ៧២៦ រៀលមួយគីឡូក្រាម សម្រាប់ដំឡូងមីក្រៀម។ គោលដៅនាំចេញដំឡូងមីនៅខេត្តបាត់ដំបង ប្រមាណ៧០% ត្រូវនាំចេញទៅប្រទេសថៃ និងប្រមាណ ៣០% ទៀតគឺសម្រាប់ប្រើប្រាស់ក្នុងស្រុក។
អត្ថបទគួរអាន
លោក ប៊ិន មករា ជាកសិករដាំដំណាំដំឡូងមី ស្ថិតនៅភូមិមួយ ឃុំឡាមិញ ស្រុកបរកែវ ខេត្តរតនគិរី បានបញ្ជាក់ដែរថា តម្លៃដំឡូងមីក្រៀមក្នុងឆ្នាំនេះ លោកលក់បានក្នុងតម្លៃទាបជាងឆ្នាំមុនបន្តិច ចំពោះតម្លៃនេះដែរ អាស្រ័យទៅលើទីតាំងរបស់ប្រជាកសិករនីមួយៗ ហើយចំពោះការប្រមូលផលរបស់លោកនៅឆ្នាំនេះទទួលបានទិន្នផលតិចជាងឆ្នាំមុនផងដែរ។
របាយការណ៍ក្រសួងកសិកម្ម រុក្ខាប្រមាញ់ និងនេសាទកាលបង្ហាញថា ការនាំចេញដំឡូងមី និងផលិតផលដំឡូងមី ក្នុងឆ្នាំ ២០២១ សម្រេចបានជិត២លាន៨សែនតោន។ ក្នុងនោះចំណិតដំឡូងមីក្រៀម មានជាង១លាន៦សែនតោន កើនជាង ៨%។ ដំឡូងមីស្រស់ នាំចេញបាន ជាង១លានតោន កើនជាង ៥២%៕
អត្ថបទ សោម ស្រីពេជ្រ
None
