ដ្បិត មេរោគបំប្លែងថ្មី អូមីក្រុង កំពុងបង្កជាការព្រួយបារម្ភខ្លាំងសម្រាប់មនុស្សជាតិ ក៏ដោយចុះ តែមន្ត្រីជាន់ខ្ពស់នៃក្រសួងពាណិជ្ជកម្មកម្ពុជា បានអះអាងថា វត្តមានមេរោគបំប្លែងថ្មី អូមីក្រុង នឹងមិនធ្វើឱ្យប៉ះពាល់ដល់ដំណើរការនៃការនាំចេញរបស់កម្ពុជា នោះទេ ខណៈកម្ពុជា កំពុងជំរុញការនាំចេញជាបន្តបន្ទាប់ ពិសេសផលិតផលកសិកម្ម តែម្ដង។
ឯកឧត្តម ប៉ែន សុវិជាតិ អ្នកនាំពាក្យក្រសួងពាណិជ្ជកម្ម កម្ពុជា បានគូសបញ្ជាក់ប្រាប់សារព័ត៌មានឌីជីថលខេមបូណូមីសថា ខណៈដែលពិភពលោកស្ថិតក្នុងបរិបទកូវីដ១៩ វិស័យពាណិជ្ជកម្មកម្ពុជា ក៏រងផលប៉ះពាល់បន្តិចដែរ តែមិនបានក្លាយជាបញ្ហាធ្ងន់ធ្ងរ និងរាំងស្ទះដល់ដំណើរការនៃការនាំចេញនោះទេ។ អ្នកនាំពាក្យរូបនេះ បានបន្តថា ពិតណាស់ ថ្មីៗពិភពលោកកំពុងមានការព្រួយបារម្ភពីវត្តមាន របស់មេរោគបំប្លែងថ្មី អូមីក្រុង តែជុំវិញការនាំចេញរបស់កម្ពុជា ហាក់មិនមានអ្វីគួរឱ្យព្រួយបារម្ភពេកនោះទេ។ ការមិនព្រួយបារម្ភខ្លាំង ក៏ព្រោះតែប្រជាជនកម្ពុជា កាន់តែមានការយល់ដឹងពីវិធីសាស្ត្រការពារខ្លួននូវជំងឺកូវីដ១៩ គួបផ្សំសន្ទុះនៃការចាក់វ៉ាក់សាំងរបស់ប្រជាជនកម្ពុជា ផងដែរ។ នេះជាការបញ្ជាក់របស់ឯកឧត្តម ប៉ែន សុវិជាតិ។
អត្ថបទគួរអាន
ជុំវិញស្ថានភាពនៃវិស័យពាណិជ្ជកម្មកម្ពុជា នាពេលពេលបច្ចុប្បន្ន ត្រូវបាន ឯកឧត្តម ប៉ែន សុវិជាតិ បានគូសបញ្ជាក់ថា នៅតែមានសញ្ញាណវិជ្ជមាន បើទោះកន្លងមក កម្ពុជា ជួបផលវិបាក ខ្វះមធ្យោបាយដឹកជញ្ជូន តែបញ្ហានេះមិនអាចបង្អាក់នៃការនាំចេញរបស់កម្ពុជាឡើយ ខណៈបច្ចុប្បន្ន កម្ពុជា ក៏កំពុងដុតដៃដុតជើងដើម្បីនាំចេញផលិតផលជាបន្តបន្ទាប់។ បើតាមឯកឧត្តម ប៉ែន សុវិជាតិ បន្ទាប់ពីមានការបើកភ្លើងខៀវពីរដ្ឋាភិបាលប្រទេសចិន ឱ្យកម្ពុជា នាំចេញផ្លែមៀនប៉ៃលិន និងត្រីប្រា ទៅទីផ្សារចិនផ្ទាល់ ភាគីចិនបាននិងកំពុងជំរុញឱ្យកម្ពុជា បង្កើនការត្រួតពិនិត្យលើលក្ខខណ្ឌភូតគាមអនាម័យ ដើម្បីពន្លឿនការនាំចេញទៅកាន់ទីផ្សាររបស់ខ្លួនឱ្យកាន់តែឆាប់។ មន្ត្រីជាន់ខ្ពស់រូបនេះ បានសង្កត់ធ្ងន់ដូច្នេះ កម្ពុជាកំពុងមមាញឹកលើការត្រួតពិនិត្យលក្ខខណ្ឌភូតគាមអនាម័យលើការនាំចេញផ្លែមៀន និងត្រីប្រា បើគ្មានគ្មានអ្វីប្រែប្រួលនោះទេ កម្ពុជា នឹងអាចនាំចេញផ្លែមៀន ត្រីប្រា និងផលិតផលកសិកម្ម ដទៃមួយចំនួនទៀតនៅដើមឆ្នាំ២០២២។
ដ្បិត មេរោគកូវីដ១៩ បានបន្តអូសបន្លាយនៅកម្ពុជាអស់រយៈពេល២ឆ្នាំក៏ដោយចុះ តែកម្ពុជា នៅតែអាចសម្រេចបានកំណើននាំចេញផលិតផលរបស់ខ្លួនទៅកាន់ទីផ្សារអន្តរជាតិ ដូចជា ផលិតផលវាយនភ័ណ្ឌ និងកសិកម្ម ជាដើម។ តួយ៉ាង តាមតួលេខរបស់ក្រសួងពាណិជ្ជកម្ម រយៈពេល១០ខែ ឆ្នាំ២០២១ កម្ពុជា បាននាំចេញទៅកាន់ប្រទេសចិនសរុប ជាង១ពាន់២រយលានដុល្លារ ប្រៀបនឹងរយៈពេលដូចគ្នាឆ្នាំ២០២០ កើនឡើង ៤៩%។ ខណៈការនាំចូលពីចិនមកវិញ មានជាង ៧ពាន់៧រយលានដុល្លារ កើនឡើង៣៧%៕
None
