បើតាមអ្នកជំនាញសេដ្ឋកិច្ចបានព្រមានថា ប្រសិនបើករណីឆ្លងកូវីដ១៩អូមីក្រុង នៅតែបន្ដរកឃើញកើនឡើងដល់រាប់រយនាក់ ដូចដែលបានរកឃើញនៅប៉ុន្មានថ្ងៃចុងក្រោយនេះ នោះចង់ ឬមិនចង់ការស្ទុះងើបឡើងនៃសេដ្ឋកិច្ចកម្ពុជាអាចនឹងត្រូវរងផលប៉ះពាល់ ពោលគឺអាចនឹងមានកំណើនក្រោម៥%។ ទោះយ៉ាងណា អ្នកជំនាញគូសបញ្ជាក់ ករណីដែលកម្ពុជាមិនមានការបិទខ្ទប់ណាមួយកើតឡើងទេនោះ ផលប៉ះពាល់មកលើសេដ្ឋកិច្ចក៏មិនសូវជាមានធ្ងន់ធ្ងរនោះដែរ។
ក្រុមអ្នកជំនាញសេដ្ឋកិច្ច និងទេសចរណ៍ ក៏បានបង្ហាញពីក្ដីព្រួយបារម្ភចំពោះការផ្ទុះឡើងនូវមេរោគកូវីដ១៩ ប្រភេទអូមីក្រុង ដែលកំពុងរាលដាលខ្លាំងនៅក្នុងសហគមន៍នាពេលថ្មីៗនេះ នៅគ្រាដែលដំណើរការសង្គមនិងសេដ្ឋកិច្ចកម្ពុជា ទើបតែមានការងើបឡើងវិញជាបណ្ដើរៗ ប៉ុណ្ណោះ។
លោកបណ្ឌិត ហុង វណ្ណៈ អ្នកវិភាគសេដ្ឋកិច្ចនៃវិទ្យាស្ថានទំនាក់ទំនងអន្តរជាតិនៃរាជ្យបណ្ឌិត្យសភាកម្ពុជា និងលោក គី សិរីវឌ្ឍន៍ អ្នកវិភាគសេដ្ឋកិច្ច សុទ្ធតែបានយល់ថា ការផ្ទុះឡើងនូវមេរោគបំប្លែងថ្មីអូមីក្រុង អាចជាឧបសគ្គនៃការងើបឡើងវិញនៃសកម្មភាពសង្គម និងសេដ្ឋកិច្ចកម្ពុជា។ បើតាមបណ្ឌិត ហុង វណ្ណៈ បញ្ហានេះមិនត្រឹមជាកត្តារាំងស្ទះដល់ដល់ការងើបឡើងវិញសេដ្ឋកិច្ចកម្ពុជានោះទេ តែវាអាចធ្វើឱ្យកំណើនសេដ្ឋកិច្ចក្នុងឆ្នាំ២០២២នេះ ធ្លាក់ចុះក្រោម៥% បើសិនស្ថានភាពកូវីដ១៩នៅកម្ពុជា បន្តកើនឡើងដូចសព្វថ្ងៃ។ ក៏ប៉ុន្តែ សម្រាប់លោក គី សិរីវឌ្ឍន៍ បានគូសបញ្ជាក់ថា ដ្បិត អូមីក្រុង មានសមត្ថភាពឆ្លងរហ័ស តែបើសិនកម្ពុជា មិនមានការបិទប្រទេសនោះ ក៏មិនមានផលប៉ះពាល់ធ្ងន់ធ្ងរដល់វិស័យសេដ្ឋកិច្ចដែរ។
អត្ថបទគួរអាន
នៅថ្ងៃទី៩ ខែកុម្ភៈ កម្ពុជា បានរកឃើញចំនួនឆ្លងកូវីដ១៩ ជាង២២០នាក់ បន្ថែមទៀត ដែលជាចំនួនច្រើនបំផុតមិនធ្លាប់មានគិតតាំងពីដើមខែវិច្ឆិកាឆ្នាំ ២០២១មក។ អ្វីដែលគួរឲ្យកត់សម្គាល់នោះ គឺករណីឆ្លងថ្មីទាំងនេះ សុទ្ធសឹងជាប្រភេទមេរោគបំប្លែងថ្មី អូមីក្រុង។ នេះបើយោងតាមរបាយការណ៍របស់ក្រសួងសុខាភិបាល។
លោក ធួន ស៊ីណានប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា ក៏បានមើលឃើញថា ការផ្ទុះនូវជំងឺកូវីដ១៩ បំប្លែងថ្មីអូមីក្រុង ពិតជាជះឥទ្ធិពលអវិជ្ជមានដល់វិស័យទេសចរណ៍ ពិសេសនឹងបង្កការរាំងស្ទះដល់ដំណើរងើបឡើងវិញនៃសេដ្ឋកិច្ចកម្ពុជា ព្រោះវិស័យទេសចរណ៍ គឺជាវិស័យស្នូលដ៏សំខាន់ក្នុងកិច្ចការស្ដារសេដ្ឋកិច្ចកម្ពុជា។ ខណៈស្ថានភាពនៃវិស័យទេសចរណ៍ បច្ចុប្បន្ន បានចាប់ផ្ដើមសន្ទុះឡើងវិញជាបណ្ដើរៗ ពិសេសទេសចរណ៍ផ្ទៃក្នុង ហើយសកម្មភាពនៃទេសចរអន្តរជាតិ នៅមានកម្រិតនៅឡើយ។
នារយៈពេលចុងក្រោយនេះ បើទោះបី កម្ពុជា គ្មានអ្នកស្លាប់ដោយសារជំងឺកូវីដ១៩ ក៏ប៉ុន្តែ សន្ទុះនៃឆ្លងកូវីដ១៩ មានកំណើនគួរឱ្យកត់សម្គាល់ ខណៈប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន នៅថ្ងៃទី៨ ខែកុម្ភៈ បានស្នើឱ្យប្រជាពលរដ្ឋបង្កើនការប្រុងប្រយ័ត្នឱ្យបានខ្ពស់ និងជំរុញពលរដ្ឋកម្ពុជាទៅទទួលការចាក់វ៉ាក់សាំងដូសទី៣ និងដូសទី៤ ឱ្យបានគ្រប់ៗគ្នា។ បន្ថែមនោះសម្ដេចក៏បានណែនាំឱ្យមានការកំណត់បរិមាណមនុស្ស នៅតាមពិធីជួបជុំផ្សេងៗ ផងដែរ ដើម្បីទប់ស្កាត់ការឆ្លងរាលដាលនេះ។
សូមបញ្ជាក់ថា បើបានសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ធ្លាប់បានព្យាករណ៍ថា កំណើនសេដ្ឋកិច្ចកម្ពុជា នឹងបន្តកើនឡើងក្នុងរង្វង់៥% នៅឆ្នាំ២០២២នេះ ខណៈស្ថាប័នអន្តរជាតិផ្សេងទៀតដូចជា Fitch Solutions និងធនាគារពិភពលោកបានព្យាករថា មានកំណើន ៤,៥%៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
