ធនាគារនានាទូទាំងពិភពលោកប្រឈមហានិភ័យថ្មីៗ ខណៈសហរដ្ឋអាម៉េរិកបន្ថែមទណ្ឌកម្មលើរុស្ស៊ី

របាយការណ៍មួយរបស់ Congressional Research Service (CRS) ដែលជាវិទ្យាស្ថានស្រាវជ្រាវគោលនយោបាយសាធារណៈនៃសភាអាម៉េរិក បានបង្ហាញថា ចាប់តាំងពីប្រទេសរុស្ស៊ី បានបញ្ឆេះភ្លើងសង្គ្រាមចូលឈ្លានពានប្រទេសអ៊ុយក្រែន នៅថ្ងៃទី២៤ ខែកុម្ភៈ ឆ្នាំ២០២២ មក សហរដ្ឋអាម៉េរិក ដែលជាមហាអំណាចធំបំផុតទី១របស់ពិភពលោកទាំងផ្នែកសេដ្ឋកិច្ច និងយោធា បានដាក់ទណ្ឌកម្មលើបុគ្គល ក្រុមហ៊ុន និងអង្គភាពនានាសរុបយ៉ាងតិច៣,៥០០នាក់-ស្ថាប័ន ដោយក្នុងនោះរួមមានទាំងប្រធានាធិបតីរុស្ស៊ី លោក វ្ល៉ាឌីមៀ ពូទីន ផងដែរ។

ទណ្ឌកម្មទាំងនេះដាក់បម្រាមលើធនាគារធំៗភាគច្រើនរបស់ប្រទេសរុស្ស៊ី មិនឱ្យធ្វើប្រតិបត្តិការទូទាត់ជាប្រាក់ដុល្លារអាម៉េរិក ឬជាមួយអង្គភាពនានារបស់សហរដ្ឋអាម៉េរិក។ លើសពីនេះ សហរដ្ឋអាម៉េរិក ក៏បានពង្រីកវិធានការរឹតបន្តឹងការនាំចេញផងដែរក្នុងគោលបំណងធ្វើយ៉ាងណាឱ្យសេដ្ឋកិច្ចរបស់ប្រទេសរុស្ស៊ី ដួលងើបមិនរួច។

ដោយ: តែម សុខុម