ព្រះចៅស៊ុលតង់ប្រ៊ុយណេប្រកាសរុះរើគណៈរដ្ឋមន្ត្រីដ៏កម្រ ដោយតែងតាំងព្រះរាជបុត្រពីរព្រះអង្គឱ្យដឹកនាំក្រសួងសំខាន់ៗពីរ

ព្រះចៅស៊ុលតង់ប្រ៊ុយណេ បានបញ្ចូលព្រះរាជបុត្រពីរព្រះអង្គរបស់ទ្រង់ក្នុងជួររដ្ឋាភិបាលនៅក្នុងការរុះរើគណៈរដ្ឋមន្ត្រីដ៏កម្រមួយកាលពីថ្ងៃទី៤ ខែមិថុនា ដែលជាសញ្ញាបង្ហាញពីផែនការរៀបចំអ្នកស្នងតំណែងដ៏មានសក្តានុពលនៅក្នុងអាណាចក្រដ៏សម្បូរដោយធនធានប្រេងមួយនេះ។ នេះជាការរុះរើគណៈរដ្ឋមន្ត្រីលើកដំបូងរបស់ប្រ៊ុយណេ ចាប់តាំងពីឆ្នាំ២០២២ មក ហើយកើតឡើងចំពេល ដែលប្រទេសនៅលើកោះប័រណេអូ (Borneo) មួយនេះ កំពុងប្រឈមមុខនឹងសម្ពាធពីវិបត្តិថាមពលសកល ដែលបង្កឡើងដោយជម្លោះរវាងអាម៉េរិក-អ៊ីស្រាអែល និងអ៊ីរ៉ង់។

ព្រះចៅស៊ុលតង់ ដែលបានកាន់តួនាទីជាច្រើនក្នុងរដ្ឋាភិបាល បានបង្ហាញខ្លួនជាសាធារណៈតិចតួចប៉ុណ្ណោះនៅក្នុងឆ្នាំនេះ បន្ទាប់ពីបានទទួលការវះកាត់ប្តូរជង្គង់កាលពីខែមករា កន្លងទៅ។ យោងតាមការផ្សាយរបស់ទូរទស្សន៍រដ្ឋប៊្រុយណេ ព្រះចៅស៊ុលតង់ បានមានបន្ទូលថា ព្រះអង្គនឹងបន្តកាន់តំណែងសំខាន់ៗដដែល រួមមាននាយករដ្ឋមន្ត្រី រដ្ឋមន្ត្រីការពារជាតិ និងរដ្ឋមន្ត្រីហិរញ្ញវត្ថុ។ ចំណែកឯព្រះរាជបុត្រទីពីរ គឺព្រះអង្គម្ចាស់ អាបឌុល ម៉ាលិក (Abdul Malik) នឹងត្រូវតែងតាំងជារដ្ឋមន្ត្រីទីស្តីការគណៈរដ្ឋមន្ត្រី ដែលជាតំណែងដំបូងបង្អស់របស់ព្រះអង្គក្នុងជួររដ្ឋាភិបាល។

ដោយឡែក ព្រះអង្គម្ចាស់ អាបឌុល ម៉ាទីន (Abdul Mateen) ដែលជាបុរសរូបសង្ហា មានប្រជាប្រិយភាពខ្លាំងនៅលើបណ្តាញសង្គម និងតែងតែដង្ហែព្រះចៅស៊ុលតង់ ចូលរួមកិច្ចប្រជុំកំពូលអាស៊ានជាបន្តបន្ទាប់នោះ ត្រូវបានតែងតាំងជារដ្ឋមន្ត្រីការបរទេស ដែលជាតំណែងធ្លាប់កាន់កាប់ដោយព្រះចៅស៊ុលតង់ផ្ទាល់ពីមុនមក។

ក្រៅពីនេះព្រះអង្គម្ចាស់ អាល់ មូហ្វតាដេ ប៊ីឡាហ្វ (Al-Muhtadee Billah) ដែលជាព្រះរជ្ជទាយាទ និងជាបុត្រច្បងនៅតែរក្សាតំណែងជារដ្ឋមន្ត្រីជាន់ខ្ពស់នៅការិយាល័យនាយករដ្ឋមន្ត្រីដដែល។

បន្ថែមលើការតែងតាំងព្រះរាជបុត្រ ព្រះចៅស៊ុលតង់ ក៏បានសម្រេចបង្កើតក្រសួងថ្មីចំនួន៣ ដើម្បីពង្រឹងការសម្របសម្រួលគោលនយោបាយនៅទូទាំងរដ្ឋាភិបាល។ ព្រះអង្គបានបញ្ជាក់ថា កិច្ចការងាររបស់ក្រសួងធនធានបឋម និងទេសចរណ៍ពីមុន នឹងត្រូវរៀបចំឡើងវិញ ដោយបំបែកចេញជាក្រសួងសេដ្ឋកិច្ច ក្រសួងពាណិជ្ជកម្ម និងក្រសួងឧស្សាហកម្ម ដើម្បីជំរុញការធ្វើពិពិធកម្មសេដ្ឋកិច្ច គាំទ្រកំណើនប្រកបដោយចីរភាព និងបង្កើតឱកាសការងារបន្ថែមសម្រាប់ប្រជាជនប្រ៊ុយណេ៕