នាយកធនាគាពិភពលោកប្រចាំប្រទេសវៀតណាម បានអះអាងថា ក្នុងស្មារតីនៃភាពជាដៃគូយៈពេលវែង ជឿទុកចិត្ត និងផលិតភាព ធនាគារពិភពលោកមានមោទនភាពក្នុងការជួយវៀតណាម នៅពេលសេដ្ឋកិច្ចកំពុងងើបឡើងវិញពីវិបត្តិកូវីដ១៩ ជាមួយនឹងភាពមិនច្បាស់លាស់ជាច្រើន ដែល ពាក់ព័ន្ធនឹងជំងឺរាតត្បាតនេះ។ ធនាគារពិភពលោក ជឿជាក់ថា សកម្មភាពគោលនយោបាយ ដែលគាំទ្រដោយកិច្ចសហប្រតិបត្តិការនេះ នឹងមិនត្រឹមតែបង្កើតមូលដ្ឋានគ្រឹះដ៏រឹងមាំសម្រាប់ការងើបឡើងវិញភ្លាមៗពីវិបត្តិកូវីដ១៩ ប៉ុណ្ណោះទេ ប៉ុន្តែថែមទាំងផ្តល់អត្ថប្រយោជន៍ដល់ប្រទេសវៀតណាមក្នុងគោលដៅកំណើនរយៈពេលវែងផងដែរ។
បើតាមធនាគារពិភពលោក ប្រាក់កម្ចីជាង ២២១ លានដុល្លារនេះ នឹងផ្ដល់ជូនក្នុងទម្រង់នៃលក្ខខណ្ឌសម្បទានរយៈពេល ៣០ ឆ្នាំជាមួយនឹងរយៈពេលអនុគ្រោះចំនួន ៥ ឆ្នាំ។
តាមរយៈប្រាក់កម្ចីនេះដែរ ធនាគារពិភពលោកលើកទឹកចិត្តឱ្យវៀតណាម មានកំណែទម្រង់គោលនយោបាយក្រោមសសរស្តម្ភចំនួនពីរ។ ទីមួយ គាំទ្រដល់ការងើបឡើងវិញនៃសេដ្ឋកិច្ច ដែលរួមបញ្ចូលដោយការបន្ធូរបន្ថយបន្ទុកពន្ធលើអាជីវកម្ម ការកែលម្អលទ្ធភាពទទួលបានជំនួយហិរញ្ញវត្ថុសម្រាប់ក្រុមពលរដ្ឋងាយរងគ្រោះ កាត់បន្ថយគម្លាតយេនឌ័រនៅកន្លែងធ្វើការ និងការលើកកម្ពស់បរិយាបន្នហិរញ្ញវត្ថុ។អត្ថបទគួរអាន
សសរស្តម្ភទីពីរ គឺរួមចំណែកដល់គោលនយោបាយពាណិជ្ជកម្មបៃតង ការពន្លឿនការសម្របខ្លួនទៅរដ្ឋាភិបាលអេឡិចត្រូនិក (E-government) និងការបង្កើនការទាញយកថាមពលកកើតឡើងវិញ។
ធនាគារពិភពលោកក៏បានវាយតម្លៃផងដែរថា រដ្ឋាភិបាលវៀតណាមបានផ្លាស់ប្តូរយ៉ាងឆាប់រហ័សក្នុងរយៈពេលប៉ុន្មានខែថ្មីៗនេះ លើការអនុវត្តកំណែទម្រង់ទាំងនេះ។ ជាក់ស្ដែងដូចជា ការយល់ព្រមលើអាជ្ញាប័ណ្ណផ្ទេរប្រាក់តាមទូរសព្ទ និងការដាក់ឱ្យប្រើប្រាស់ប្រព័ន្ធវិក្កយបត្រអេឡិចត្រូនិកនៅក្នុងទីក្រុងធំៗរបស់ប្រទេសជាដើម៕
អត្ថបទ៖ ស៊ើង និមល់
None
