រដ្ឋាភិបាលវៀតណាមបាននិយាយនៅក្នុងសេចក្តីប្រកាសព័ត៌មានមួយថា ក្រសួងដឹកជញ្ជូនរបស់ប្រទេសវៀតណាមនៅខែក្រោយនឹងដាក់សំណើសាងសង់ផ្លូវដែកប្រវែងជាង ១ពាន់ ៥ រយគីឡូម៉ែត្រទៅកាន់ការិយាល័យនយោបាយ ដែលជាស្ថាប័នធ្វើការសម្រេចចិត្តដ៏មានឥទ្ធិពលរបស់បក្សកុម្មុយនិស្តវៀតណាមដែលកំពុងកាន់អំណាច។
ប្រទេសវៀតណាម ដែលជាមជ្ឈមណ្ឌលផលិតកម្មក្នុងតំបន់កំពុងបង្កើនការវិនិយោគលើហេដ្ឋារចនាសម្ព័ន្ធដឹកជញ្ជូន ដើម្បីគាំទ្រដល់សេដ្ឋកិច្ចដែលកំពុងរីកចម្រើនយ៉ាងឆាប់រហ័សរបស់ខ្លួន។ រដ្ឋាភិបាលវៀតណាមបាននិយាយថា គម្រោងទាំងមូលនៃផ្លូវរថភ្លើងល្បឿនលឿននេះ តាមផែនការនឹងត្រូវបញ្ចប់នៅឆ្នាំ ២០៤៥ ដល់ ២០៥០ ប៉ុន្តែ សម្រាប់ការសាងសង់ ២ ដំណាក់កាលដំបូងដែលមានប្រវែងសរុប ៦៦៥ គីឡូម៉ែត្រ គ្រោងចំណាយទឹកប្រាក់វិនិយោគចំនួនជិត ២៥ ពាន់លានដុល្លារ នឹងបើកឱ្យចរាចរនៅត្រឹមឆ្នាំ ២០៣២។
អត្ថបទគួរអាន
គួរជម្រាបថា បើតាមរបាយការណ៍របស់ធនាគាពិភពលោកបានបង្ហាញថា ការស្ទុះងើបឡើងវិញនៃសេដ្ឋកិច្ចរបស់ប្រទេសវៀតណាមបានកើនឡើងយ៉ាងឆាប់រហ័សក្នុងរយៈពេលប្រាំមួយខែចុងក្រោយនេះ ដោយសារតម្រូវការក្នុងស្រុក និង ការនាំចេញមានការកើនឡើង និង ការស្ទុះងើបឡើងវិញដ៏រឹងមាំនៃសេវាកម្មផ្សេងៗ។ កំណើនផលិតផលក្នុងស្រុកសរុបត្រូវបានព្យាករណ៍ថា នឹងកើនឡើងពីការប៉ាន់ប្រមាណដល់ ៧,៥ ភាគរយក្នុងឆ្នាំ ២០២២ ខណៈពេលដែលអតិផរណាត្រូវបានព្យាករណ៍ថា នឹងកើនឡើងជាមធ្យម ៣,៨ ភាគរយក្នុងឆ្នាំនេះ៕
