អារ៉ាប៊ីសាអូឌីត កំពុងកសាងទន្លេសិប្បនិមិត្តវែងបំផុតរបស់ពិភពលោកឆ្លងកាត់សមុទ្រខ្សាច់

គម្រោងវិនិយោគដ៏ធំមហិមាខាងលើដែលកំពុងចាប់ផ្ដើមដំណើរការសាងសង់នេះមិនត្រឹមតែកសាងទន្លេវែងបំផុតរបស់ពិភពលោកប៉ុណ្ណោះទេ ប៉ុន្តែក៏ដើម្បីប្រែក្លាយសមុទ្រខ្សាច់ដ៏ក្ដៅហួតហែងបារ៉េន ស៊ែន (Barren Sands) នៅក្នុងប្រទេសអារ៉ាប៊ីសាអូឌីត ទៅជាតំបន់ដីមានជីជាតិផងដែរ តាមរយៈការប្រើប្រាស់បច្ចេកវិទ្យាជឿនលឿនដែលចម្រោះទឹកសមុទ្រទៅជាទឹកសាបយ៉ាងអស្ចារ្យ។

គម្រោងខ្នាតយក្សនេះឆ្លុះបញ្ចាំងពីការប្ដេជ្ញាចិត្តដ៏មោះមុតរបស់ប្រទេសអារ៉ាប៊ីសាអូឌីត ក្នុងការដោះស្រាយបញ្ហាកង្វះទឹកសាបប្រើប្រាស់ជាទូទៅនៅតាមលំនៅឋានរបស់ពលរដ្ឋ ហាង និងរោងចក្រជាដើម និងជាពិសេសដើម្បីជួយស្រោចស្រង់វិស័យកសិកម្មទូទាំងប្រទេស ដែលសម្បូរដោយវាលខ្សាច់ និងជាទឹកដីដ៏ក្ដៅហួតហែង និងខ្សត់ទឹកភ្លៀងបំផុតមួយនៅលើភពផែនដីមួយនេះ។

គម្រោងនេះនឹងបង្កើតប្រព័ន្ធធារាសាស្ត្រដ៏ធំអស្ចារ្យមួយ សម្រាប់ស្រោចស្រពតំបន់វាលខ្សាច់ដ៏រហោរឋាន ប្រែក្លាយតំបន់វាលខ្សាច់ទៅតំបន់ពណ៌បៃតង និងខៀវស្រងាត់សម្បូរជីជាតិដែលអំណោយផលទាំងជីវិតមនុស្ស សត្វ និងរុក្ខជាតិ។

គម្រោងកសាងទន្លេសិប្បនិមិត្តវែងបំផុតនេះ ត្រូវបានរំពឹងថា នឹងមានសមត្ថភាពផលិតទឹកសាបបានរហូតដល់ទៅប្រមាណ៩,៤លានម៉ែត្រគូបក្នុងមួយថ្ងៃ ដោយប្រើប្រាស់បច្ចេកវិទ្យាចម្រោះទឹកសមុទ្រទៅជាទឹកសាប។ ទន្លេសិប្បនិមិត្តដែលនឹងទាញយកប្រភពទឹកចេញពីសមុទ្រក្រហម (Red Sea) នេះនឹងមានទំហំ១១ម៉ែត្រ ជម្រៅ៤ម៉ែត្រ និងប្រវែងជាង១ម៉ឺន២ពាន់គីឡូម៉ែត្រ។

យោងតាមទិន្នន័យបង្ហាញថា អារ៉ាប៊ីសាអឌីត ជាប្រទេសកំពូលដែលចម្រោះទឹកសមុទ្រដើម្បីផលិតទឹកសាបបានច្រើនជាងគេបំផុតទូទាំងពិភពលោក ដោយក្នុងមួយឆ្នាំប្រទេសនេះផលិតទឹកសាបពីទឹកសមុទ្របានលើស១,៦ពាន់លានម៉ែត្រគូប ពោលគឺគ្របដណ្ដប់ដល់ទៅ១៨%នៃការផលិតទឹកសាបពីទឹកសមុទ្រទូទាំងពិភពលោក។ ទោះជាយ៉ាងណា ទិន្នន័យស្ដីពីរយៈពេលបញ្ចប់គម្រោង និងទំហំទុនវិនិយោគសរុបនៃគម្រោងខ្នាតយក្សមួយនេះហាក់ស្ថិតក្នុងភាពស្រពេចស្រពិលនៅឡើយ៕

ដោយ: តែម សុខុម