ប្រទេសជប៉ុនបានដាក់សំណើប្ដឹងប្រទេសចិន ទៅកាន់អង្គការពាណិជ្ជកម្មពិភពលោកកាលពីថ្ងៃសុក្រសប្តាហ៍មុន ហើយបានទៅដល់ដៃសមាជិកទាំងអស់នៃអង្គការពាណិជ្ជកម្មពិភពលោករួចហើយដែរ កាលពីថ្ងៃអង្គារសប្តាហ៍នេះ។ ក្នុងសំណើបណ្ដឹងនោះ ជប៉ុនបានគូសបញ្ជាក់ថា វិធានការពន្ធគយដែលចិនបានដាក់លើការនាំចូលទំនិញដែកថែបពីប្រទេសជប៉ុន មិនបានអនុលោមតាមតាមកិច្ចព្រមព្រៀង និងបទបញ្ញត្តិស្តីពីពន្ធគយពាណិជ្ជកម្ម ដែលបានចែងដោយអង្គការពាណិជ្ជកម្មពិភពលោក កាលពីឆ្នាំ១៩៩៤នោះទេ។
គួររំឭកថា មុននឹងជប៉ុនសម្រេចប្ដឹងទៅ អង្គការពាណិជ្ជកម្មពិភពលោកដូចនេះ ជប៉ុនបានព្យាយាមធ្វើការស្នើសុំទៅប្រទេសចិនឲ្យលុបចោលនូវរនាំងពន្ធគយនេះ ម្តងជារពីរដងរួចមកហើយ តាមរយៈការសន្ទនាទ្វេភាគី។
យ៉ាងណាមិញ អស់រយៈពេលជិត២ឆ្នាំទៅហើយ ប៉ុន្តែភាគីចិនមិនបានអើពើលើសំណើររបស់ប្រទេសជប៉ុននោះទេ ជាហេតុធ្វើឲ្យជប៉ុនសម្រេចដាក់បណ្តឹងទៅ WTO តែម្តង។
អត្ថបទគួរអាន
រដ្ឋមន្ត្រីក្រសួងសេដ្ឋកិច្ច ពាណិជ្ជកម្ម និងឧស្សាហកម្មជប៉ុនបានលើកឡើងថា៖ ទង្វើរបស់ចិនបានធ្វើឲ្យខូចខាត ដល់ផលប្រយោជន៍របស់ប្រទេសជប៉ុនដោយផ្ទាល់ និងបានធ្វើឲ្យប៉ះពាល់ដោយប្រយោល លើកិច្ចព្រមព្រៀងពាណិជ្ជកម្មរវាងប្រទេសទាំងពីរ។
សូមបញ្ជាក់ថា មិនមែនតែជប៉ុននោះទេ ដែលមានបញ្ហាពាណិជ្ជកម្មនឹងប្រទេសចិន សូម្បីតែប្រទេសអូស្ត្រាលីកាលពីពេលថ្មីៗនេះ ក៏បានដាក់ពាក្យប្ដឹងប្រទេសចិន ទៅអង្គការពាណិជ្ជកម្មពិភពលោក WTO រួចហើយដែរ ក្រោយពីប្រទេសចិនបានបង្កើនពន្ធគយជាង ៨០%លើទំនិញដែលនាំចូលពីអូស្ត្រាលី ដែលបានធ្វើឲ្យខ្លួនខាតបង់ប្រាក់អស់រាប់ពាន់លានដុល្លារអាមេរិក៕
None
