ក្រៅតែពីជួបជាមួយនឹងសមភាគីអ៊ីរ៉ង់ លោកពូទីនក៏បានជួបផ្ទាល់ជាលើកដំបូង ជាមួយមេដឹកនាំប្រទេសសមាជិកណាតូមួយរូប គឺប្រធានាធិបតីទួរគី លោក អ៊ែរដូហ្កាន ដើម្បីបន្តពិភាក្សាលើកិច្ចព្រមព្រៀង ដែលនឹងបន្តការនាំចេញគ្រាប់ធញ្ញជាតិតាមច្រកសមុទ្រខ្មៅរបស់អ៊ុយក្រែន។ ក្រៅពីនោះ ភាគីទាំងបីក៏បានបើកកិច្ចប្រជុំត្រីភាគីមួយ ដើម្បីជជែកអំពីបញ្ហានានា រួមមាន សង្គ្រាមនៅអ៊ុយក្រែន វិបត្តិស្បៀងអាហារ និងសេដ្ឋកិច្ចសកល និងបញ្ហានៅស៊ីរីផងដែរ។
បើតាមទូរទស្សន៍រដ្ឋអ៊ីរ៉ង់ លោកអាយាតូឡា អាលី ខាន់មេនី ដែលជាមេដឹកនាំកំពូលរបស់អ៊ីរ៉ង់ បានអំពាវនាវឱ្យមានកិច្ចសហប្រតិបត្តិការរយៈពេលវែងរវាងអ៊ីរ៉ង់ និងរុស្ស៊ី ដោយមេដឹកនាំរូបនេះបានប្រាប់លោក ពូទីន ថា ប្រទេសទាំងពីរចាំបាច់ត្រូវមានការប្រុងប្រយ័ត្នចំពោះការបោកបញ្ឆោតរបស់លោកខាងលិច។
មេដឹកនាំកំពូលអ៊ីរ៉ង់រូបនេះ បានលើកសរសេរលោកពូទីនថា បានធានាឱ្យប្រទេសរុស្ស៊ី រក្សាឯករាជ្យភាពរបស់ខ្លួន មិនពឹងផ្អែកលើសហរដ្ឋអាមេរិក ហើយថា ប្រទេសនានាគួរតែចាប់ផ្តើមប្រើប្រាស់រូបិយបណ្ណជាតិរបស់ពួកគេនៅពេលធ្វើពាណិជ្ជកម្មទំនិញ។
ចំពោះសំណុំរឿងសង្គ្រាមនៅអ៊ុយក្រែនប្រមុខដឹកនាំអ៊ីរ៉ង់ មិនសូវជាបង្ហាញការគាំទ្រលើរុស្ស៊ីប៉ុន្មានទេ ដោយលោកនិយាយព្យាយាមរក្សាខ្លួននៅជំហរកណ្តាល។ លោក ខាន់មេនី បាននិយាយថា សង្រ្គាមគឺជារឿងដ៏សោកសៅនិងលំបាក ហើយអ៊ីរ៉ង់មិនសប្បាយចិត្តទាល់តែសោះ ដែលប្រជាជនសាមញ្ញត្រូវទទួលរងផងលំបាកទាំងនេះ។
នៅពេលដែលមេដឹកនាំកំពូលអ៊ីរ៉ង់និយាយបែបនេះគេអាចចោទជាសំណួរឡើងថា តើអ៊ីរ៉ង់អាចជួយរុស្ស៊ីក្នុងសង្រ្គាមនៅអ៊ុយក្រែនបានទេ?
ទោះបីអ៊ីរ៉ង់មិននិយាយដោយបើកចំហរថា នឹងជួយរុស្ស៊ីធ្វើសង្គ្រាមនៅអ៊ុយក្រែនក្តី ប៉ុន្តែបើតាម មន្ត្រីសហរដ្ឋអាមេរិកបាននិយាយថា អ៊ីរ៉ង់កំពុងរៀបចំដើម្បីជួយផ្គត់ផ្គង់ដល់ប្រទេសរុស្ស៊ីនូវយន្តហោះគ្មានមនុស្សបើក ឬដ្រូន រាប់រយគ្រឿង។ ប៉ុន្តែប្រទេសទាំងពីរមិនបានបញ្ជាក់អំពីរឿងនេះក្នុងកិច្ចប្រជុំឡើយ។
ទោះយ៉ាងណា លោក Jack Watling អ្នកជំនាញខាងសង្រ្គាមនៅសាកវិទ្យាល័យទីក្រុងឡុងដ៍ បាននិយាយថា យន្តហោះគ្មានមនុស្សបើករបស់អ៊ីរ៉ង់ នឹងមានប្រយោជន៍សម្រាប់រុស្ស៊ី ទាំងការឈ្លបយកការណ៍ និងវាយប្រហារ ដោយនឹងកំណត់ទីតាំង និងគោលដៅបានច្បាស់លាស់។
អត្ថបទគួរអាន
ទោះមិនអាចជួយអ្វីច្រើនតែរុស្ស៊ីអាចរៀនពីអ៊ីរ៉ង់ បានច្រើនពីរបៀបដែលគេទប់ទល់នឹងទណ្ឌកម្មលោកខាងលិច។
ដូចបានដឹងស្រាប់ហើយថា អ៊ីរ៉ង់អស់ពេលជាច្រើនឆ្នាំមកហើយ ដែលបានរងទណ្ឌកម្មពីលោកខាងលិច ក្រោមផែនកម្មវិធីនុយក្លេអ៊ែររបស់ពួកគេ។ ដូចនេះរុស្ស៊ីមើលឃើញថា អ៊ីរ៉ង់មានបទពិសោធន៍ខ្ពស់ និងជាដៃគូដ៏មានតម្លៃ ក្នុងការគេចចេញពីការដាក់ទណ្ឌកម្មរបស់លោកខាងលិច។
ទន្ទឹមនឹងនោះ រុស្ស៊ីបានរងរលកទណ្ឌកម្មជាច្រើនលើកច្រើនសារ ក្នុងនោះរួមមានការប្រឆាំងនឹងធនាគារ អាជីវកម្ម និងបុគ្គលឯកជន ជុំវិញសង្គ្រាមនៅអ៊ុយក្រែន។ ដូច្នេះប្រទេសទាំងពីរកំពុងខ្វះខាត លទ្ធភាពប្រើប្រាស់បច្ចេកវិទ្យារបស់លោកខាងលិច។ ប្រការនេះត្រូវបានអ្នកជំនាញមើលឃើញថា ជាថ្នូរឱ្យគ្នាទៅវិញទៅមក រុស្ស៊ីអាចផ្តល់ជាជំនួយយោធា និងអាចជាវត្ថុធាតុដើម ឬគ្រាប់ធញ្ញជាតិសម្រាប់អ៊ីរ៉ង់ ជាថ្នូរនឹងការត្រួសត្រាយផ្លូវឱ្យរុស្ស៊ីអាចគេចចេញពីទណ្ឌកម្មបានខ្លះ។ គួរកត់សម្គាល់ថា ប្រទេសរុស្ស៊ីជាអ្នកផ្គត់ផ្គង់ស្រូវសាលីដ៏ធំសម្រាប់អ៊ីរ៉ង់តាំងតែពីមុនមានសង្គ្រាមទៅទៀត។
ចុះចំណែកសំណុំរឿងថាមពល តើប្រទេសទាំងពីរអាចជួយគ្នាទៅវិញទៅមកបានទេ?
ចម្លើយនោះគឺ អ៊ីរ៉ង់មិនមានអ្វីជួយរុស្ស៊ី ហើយរុស្ស៊ីក៏មិនមានអ្វីមកជួយអ៊ីរ៉ង់វិញដែរ ក្នុងសំណុំរឿងថាមពល។ ការនេះក៏ដោយសារតែប្រទេសទាំងពីរ ជាអ្នកផលិត និងផ្គត់ផ្គង់ប្រេង និងឧស្ម័នដូចគ្នា។ ការប្រកួតប្រជែងរវាងពួកគេទាំងពីរក៏បានកើនឡើងដែរ ចាប់តាំងពីសង្គ្រាមអ៊ុយក្រែនផ្ទុះឡើង ដោយសារតែរុស្ស៊ីបានប្តូរការនាំចេញប្រេងកាន់តែច្រើនទៅកាន់ប្រទេសចិន និងឥណ្ឌាក្នុងតម្លៃថោក ហើយបានធ្វើឱ្យប៉ះពាល់ដល់ទីផ្សារអ៊ីរ៉ង់។ សូមបញ្ជាក់ថា រុស្ស៊ី ថ្មីៗនេះ ហាក់កំពុងតាមក្រសោបទំនាក់ទំនងជាមួយនឹងអ៊ីរ៉ង់កាន់តែខ្លាំង ដោយកាលពីពេលថ្មីៗនេះ ពោលគឺមុនដំណើរទស្សនកិច្ចរបស់លោកពូទីន គេក៏បានឃើញ រដ្ឋមន្ត្រីការបរទេសរុស្ស៊ី លោក ស៊ែរហ្កី ឡាវរ៉ូវ (Sergei Lavrov) ក៏បានធ្វើដំណើរទៅកាន់ទីក្រុងតេអេរ៉ង់ ដើម្បីស្វែងរកកិច្ចសហការនុយក្លេអ៊ែរផងដែរ៕
