រដ្ឋាភិបាលអាមេរិកព្រមានប្រជាជនខ្លួនកុំឱ្យធ្វើដំណើរទៅប្រទេសចំនួន២០ ពិសេសប្រទេសអ៊ីរ៉ង់

យោងតាមការគេហទំព័រផ្លូវការរបស់ក្រសួងការបរទេសអាមេរិក ការឃុំខ្លួនជនជាតិអាមេរិកពីសំណាក់អ៊ីរ៉ង់ធ្វើឡើងដោយគ្មានមូលហេតុ។ ក្រសួងកាបរទេសបានចេញសេចក្តីណែនាំអំពីការធ្វើដំណើរសម្រាប់ពលរដ្ឋអាមេរិកជាបួនកម្រិតទៅតាមការកើនឡើងនៃឧក្រិដ្ឋកម្ម ការព្រមានអំពីសុខភាព និងភាពចលាចលទៅតាមប្រទេសនីមួយៗដែលមាន។ ការណែនាំទាំងបួននោះមានកម្រិតទី១៖ប្រទេសធ្វើដំណើរប្រុងប្រយ័ត្នធម្មតា ២៖ការធ្វើដំណើរដោយបង្កើនការប្រុងប្រយ័ត្ន ៣៖ពិចារណាឡើងវិញអំពីការធ្វើដំណើរ និង៤៖ប្រទេសដែលកុំធ្វើដំណើរសោះ។
អ៊ីរ៉ង់គឺជាប្រទេសមួយក្នុងចំណោម១៩ផ្សេងទៀត ដែលរដ្ឋាភិបាលអាមេរិកណែនាំមិនឱ្យធ្វើដំណើរទៅ។ សហរដ្ឋអាមេរិកមិនមានទំនាក់ទំនងការទូតជាមួយអ៊ីរ៉ង់ចាប់តាំងពីឆ្នាំ១៩៨០មក បន្ទាប់ពីអ៊ីរ៉ង់បានចូលកាន់កាប់ស្ថានទូតអាមេរិកក្នុងខែវិច្ឆិកា ឆ្នាំ១៩៧៩។ បច្ចុប្បន្ន ប្រទេសទាំងពីរក៏នៅបន្តមានភាពតានតឹងនឹងគ្នាជុំវិញកម្មវិធីអាវុធនុយក្លេអ៊ែរអ៊ីរ៉ង់។

រុស្ស៊ីក៏ស្ថិតក្នុងបញ្ជីប្រទេសដែលអាមេរិកមិនឱ្យធ្វើដំណើរដែរ។ ក្រសួងការបរទេសបានព្រមានពលរដ្ឋអាមេរិកឱ្យជៀសវាងការធ្វើដំណើរទៅកាន់ប្រទេសរុស្ស៊ី ដោយសារតែផលវិបាកសង្គ្រាមរុស្ស៊ីនៅអ៊ុយក្រែន ដែលអាចនាំឱ្យមានការឃុំខ្លួន និងការយាយីដែលអាចកើតមាន។ ទំនាក់ទំនងការទូតរវាងអាមេរិកនិងរុស្ស៊ីស្ថិតនៅចំណុចទាបបំផុត។ កាលពីសប្តាហ៍មុន វិមានក្រឹមឡាំងបានបណ្តេញអ្នកការទូតអាមេរិកពីររូបចេញ ពីបទរក្សាទំនាក់ទំនងជាមួយពលរដ្ឋរុស្ស៊ីម្នាក់ដែលគេជឿថា ជាអ្នកផ្តល់ព័ត៌មានឱ្យទីក្រុងវ៉ាស៊ីនតោន។
មួយទៀតគឺប្រទេសនីហ្សេ។ ក្រសួងការបរទេសអាមេរិកបានព្រមានប្រជាជនខ្លួនថា អ្នកដំណើរគួរតែពិចារណាមុននឹងទៅនីហ្សេ ដោយសារឧក្រិដ្ឋកម្ម ភេរវកម្ម និងការចាប់ជំរិត។ រដ្ឋប្រហារនៅខែសីហានៅក្នុងប្រទេសនេះបាននាំឱ្យមានភាពចលាចលនយោបាយ និងការតវ៉ាប្រឆាំងទូទាំងរាជធានី។ ពលរដ្ឋអាមេរិកាំងទាំងអស់ត្រូវបានជម្លៀសចេញពីនីហ្សេ បន្ទាប់ពីស្ថានទូតបារាំងនៅទីក្រុងនីញ៉ាម៉េ (Niamey) ត្រូវបានក្រុមបាតុករវាយប្រហារ។
មិនខុសគ្នានោះទេ ប្រទេសស៊ូដង់ខាងត្បូងក៏ជាប្រទេសដែលពលរដ្ឋអាមេរិកមិនត្រូវធ្វើដំណើរទៅដែរ។ ជនជាតិអាមេរិកត្រូវបានព្រមានដោយក្រសួងការបរទេសឱ្យជៀសវាងការធ្វើដំណើរទៅកាន់ប្រទេសស៊ូដង់ខាងត្បូង ដោយសារហានិភ័យនៃឧក្រិដ្ឋកម្ម ការចាប់ជំរិត និងជម្លោះប្រដាប់អាវុធ។ ក្នុងនោះ អ្នកសារព័ត៌មានក៏ត្រូវបានព្រមានមិនឱ្យរាយការណ៍ពីប្រទេសស៊ូដង់ខាងត្បូងទៀតផង បើគ្មានឯកសារបញ្ជាក់ផ្លូវច្បាប់។ បើគ្មានឯកសារទាំងនេះ ការរាយការណ៍ត្រូវបានចាត់ទុកការជាខុសច្បាប់។
យោងតាមក្រសួងការបរទេសអាមេរិក អ្នកកាសែតជាទៀងទាត់តែងត្រូវបានយាយីនៅក្នុងប្រទេសស៊ូដង់ខាងត្បូង ហើយភាគច្រើនបាត់បង់ជីវិតនៅពេលកំពុងរាយការណ៍ព័ត៌មាន។ ក្រៅពីប្រទេសទាំងនេះ សូម៉ាលី ម៉ាលី សាធារណរដ្ឋអាហ្វ្រិកកណ្តាល ប៊ូគីណាហ្វាសូ ហៃទី បេឡារុស្ស កូរ៉េខាងជើង មីយ៉ាន់ម៉ា វ៉េណេស៊ុយអេឡា ស៊ីរី លីប៊ី អ៊ីរ៉ាក់ អាហ្វហ្គានីស្ថាន អ៊ុយក្រែន ស៊ូដង់យេម៉ែន ក៏សុទ្ធសឹងជាប្រទេសឋិតក្នុងចំណោមការហាមឃាត់ធ្វើដំណើររបស់រដ្ឋាភិបាលដែរ៕