តើហេតុផលអ្វីជំរុញឱ្យសហរដ្ឋអាម៉េរិក ផ្អាកផ្ដល់មូលនិធិដល់អង្គការពាណិជ្ជកម្មពិភពលោក?

ប្រភពពាណិជ្ជកម្មចំនួន៣ បានឱ្យដឹងថា សហរដ្ឋអាម៉េរិក ក្រោមការដឹកនាំរបស់លោក ដូណាល់ ត្រាំ ដែលកំពុងខិតខំប្រឹងប្រែងកាត់បន្ថយការចំណាយរបស់សហព័ន្ធឱ្យបាន១ទ្រីលានដុល្លារបានផ្អាកផ្តល់មូលនិធិដល់អង្គការពាណិជ្ជកម្មពិភពលោក ដ៏គួរឱ្យភ្ញាក់ផ្អើល។ តែយ៉ាងណាមកទល់ពេលនេះគេមិនទាន់ដឹងច្បាស់ពីហេតុផលនៃការផ្អាកការផ្តល់មូលនិធិរបស់សហរដ្ឋអាម៉េរិកនោះទេ គ្រាន់តែមានការលើកឡើងការផ្អាកនេះដោយសារអង្គការនេះមិនគាំទ្រគោលនយោបាយសេដ្ឋកិច្ចគិតផលប្រយោជន៍អាម៉េរិកជាធំ។

មន្ត្រីអាម៉េរិកម្នាក់បានប្រាប់កិច្ចប្រជុំថវិការបស់អង្គការ WTO កាលពីថ្ងៃទី៤ ខែមីនា ថា ការទូទាត់មូលនិធិគាំទ្ររបស់អាម៉េរិក សម្រាប់ឆ្នាំ២០២៤ និងឆ្នាំ២០២៥ ត្រូវផ្អាកសិន ដោយរង់ចាំការត្រួតពិនិត្យមើលឡើងវិញលើការរួមចំណែកហិរញ្ញវត្ថុដល់អង្គការនេះ ហើយអាម៉េរិកនឹងជូនដំណឹងដល់អង្គការ WTO នៅពេលក្រោយ។ បើតាមរបាយការណ៍របស់អង្គការ WTO អង្គការឃ្លាំមើលពាណិជ្ជកម្មដែលមានមូលដ្ឋាននៅទីក្រុងហ្សឺណែវ ប្រទេសស្វីសមួយនេះ ទទួលបានថវិកាជាង២៣២លានដុល្លារ កាលពីឆ្នាំ២០២៤ ដោយអាម៉េរិក ត្រូវបង់មូលនិធិប្រមាណ១១%។

អង្គការ WTO នឹងបង្កើតផែនការ B ក្នុងករណីមានការផ្អាកផ្តល់មូលនិធិរយៈពេលយូររបស់សហរដ្ឋអាម៉េរិក ប៉ុន្តែមិនបានបញ្ជាក់លម្អិតនោះទេ។ ហើយសេតវិមាន ក៏មិនបានឆ្លើយបំភ្លឺតាមការស្នើសុំរបស់អ្នកសារព័ត៌មានជុំវិញបញ្ហានេះដែរ។

តែយ៉ាងណាអ្នកនាំពាក្យក្រសួងការបរទេសអាម៉េរិក បានអះអាងថា លោក ត្រាំ កាលពីខែកុម្ភៈ កន្លងទៅ បានចុះហត្ថលេខាលើបទបញ្ជាអនុវត្តមួយដោយបញ្ជាឱ្យរដ្ឋមន្ត្រីការបរទេសលោក ម៉ាកូ រូប៊ីយ៉ូ ឱ្យពិនិត្យមើលឡើងវិញក្នុងរយៈពេល១៨០ថ្ងៃ ចំពោះអង្គការអន្តរជាតិ ទាំងអស់ ដែលអាម៉េរិក បានចូលជាសមាជិក ដើម្បីកំណត់ថា តើពួកគេបានដើរផ្ទុយនឹងផលប្រយោជន៍របស់អាម៉េរិក ឬយ៉ាងណា។ អ្នកនាំពាក្យរូបនេះបានសង្កត់ធ្ងន់ថា មូលនិធិសម្រាប់អង្គការ WTO រួមជាមួយនឹងអង្គការអន្តរជាតិផ្សេងៗទៀតបច្ចុប្បន្នកំពុងស្ថិតក្រោមការពិនិត្យមើលឡើងវិញទាំងអស់៕

អត្ថបទ៖ សុខ មង្គល