តើមានកត្តាអ្វីខ្លះ ដែលជំរុញឲ្យសេដ្ឋកិច្ចពិភពលោកកើនខ្ពស់ជាងក្ដីរំពឹងទុកកាលពីមុនយ៉ាងដូច្នេះ?
ក្រុមប្រឹក្សាសន្និសីទអង្គការសហប្រជាជាតិស្តីពីពាណិជ្ជកម្ម និងការអភិវឌ្ឍ បានបញ្ជាក់ថា កំណើនសេដ្ឋកិច្ចពិភពលោកមានខ្ពស់នេះ គឺដោយសារតែមានក្ដីរំពឹង ទៅលើការងើបឡើងសន្សឹមៗនៃសេដ្ឋកិច្ចអាមេរិក នៅគ្រាដែលអាមេរិកបានផ្តើមចាក់បញ្ចូលកញ្ចប់ថវិកាជិត២ទ្រីលានដុល្លារអាមេរិកទៅក្នុងចរន្តសេដ្ឋកិច្ចរបស់ខ្លួន និងការរំពឹងចំពោះលើការចំណាយលើការប្រើប្រាស់នៅអាមេរិកកើនឡើង គួបផ្សំនឹងការចែកចាយ និង ចាក់វ៉ាក់សាំងកំពុងត្រូវបានធ្វើឡើងនៅប្រទេសជាច្រើនទូទាំងសកលោកផងដែរ។
ការព្យាករដដែលបានបង្ហាញថា ទោះបីជាជំងឺកូវីដ-១៩ នៅមានភាពមិនប្រាកដប្រជាច្រើនក៏ពិតមែន ក៏ប៉ុន្តែ សេដ្ឋកិច្ចពិភពលោកបានងើបឡើងវិញ សន្សឹមៗចាប់តាំងពីត្រីមាសទី៣ ឆ្នាំ២០២០ មកម្ល៉េះហើយកំណើននេះ នឹងបន្តងើបឡើងបន្តិចម្តងៗ នៅពេញមួយឆ្នាំ២០២១។
អត្ថបទទាក់ទង
យ៉ាងណាក៏ដោយចុះ ក្រុមប្រឹក្សាសន្និសីទអង្គការសហប្រជាជាតិស្តីពីពាណិជ្ជកម្ម និងការអភិវឌ្ឍបានព្រមានពីផលប៉ះពាល់ដែលអាចកើតមានឡើងគ្រប់ពេល នៅពេលណាដែលកូវីដ-១៩ បន្ដរាលដាលជាថ្មី។ ហើយប្រសិនបើចង់រក្សាកំណើនសេដ្ឋកិច្ចដូចការរំពឹងទុកបាន លុះត្រាតែរដ្ឋាភិបាលនៃប្រទេសនីមួយៗបន្តការការគាំទ្រទៅលើចរន្តសេដ្ឋកិច្ចជាតិ។
បើតាមរបាយការណ៍ក្រុមប្រឹក្សាសន្និសីទអង្គការសហប្រជាជាតិស្តីពីពាណិជ្ជកម្ម និងការអភិវឌ្ឍបានគូសបញ្ជាក់ដែរថា នៅអំឡុងពេលនៃមេរោគរាតត្បាតកូវីដ-១៩ នៅប្រទេសកំពុងអភិវឌ្ឍជាច្រើនមានការប៉ះពាល់ខ្លាំងជាងគេ ពិសេសគឺការប៉ះពាល់ប្រភពចំណូលពលរដ្ឋតែម្ដង។ ហើយផលប៉ះពាល់នេះ អាចនឹងមានកាន់តែអាក្រក់ថែមទៀត បើសិនជាធនាគារកណ្ដាលមិនចាត់វិធានការ ដើម្បីជៀសវាងការធ្លាក់ចុះនៃវិបត្តិហិរញ្ញវត្ថុ។
ទោះយ៉ាងណារបាយការណ៍បានសង្កត់ធ្ងន់ថា ការដាក់ចេញនូវកញ្ចប់ថវិកាដោះស្រាយបញ្ហាកូវីដ និងបញ្ហាសេដ្ឋកិច្ច និងការធ្វើឲ្យតម្លៃទំនិញវិលមករកសភាពធម្មតាវិញ ក៏ដូចជាការអភិវឌ្ឍ ចែកចាយ និងចាក់វ៉ាក់សាំងបានលឿន គឺសុទ្ធសឹងជាកត្តាជួយឲ្យសេដ្ឋកិច្ចស្ទុះងើបឡើងវិញនៅក្នុងឆ្នាំនេះ៕
None
