ត្រូវបានស្រង់សំដី និងចុះផ្សាយដោយទីភ្នាក់ងារសារព័ត៌មានបារាំង AFP លោក អេនតូនី ប្លីងខេន រដ្ឋមន្ត្រីការបរទេសអាមេរិក បាននិយាយ ជាមួយរដ្ឋមន្ត្រីការបរទេសចិន លោក វ៉ាង យី ថា សហរដ្ឋអាមេរិកពិតជាមានក្តីបារម្ភមែនទែន បន្ទាប់ពីបានកត់សម្គាល់ឃើញពីការប្រើប្រាស់ទាំងកម្លាំងទ័ពរបស់ចិន ផ្លូវការទូត និងសេដ្ឋកិច្ច ដាក់សម្ពាធលើកោះតៃវ៉ាន់។
ការថ្លៃងដូចនេះពីសមភាគីអាមេរិក គឺអំឡុងពេលដែលអ្នកការទូតទាំងពីររូបនេះ បានជួបពិភាក្សាគ្នាជាមុន ដើម្បីត្រៀមរៀបចំឲ្យថ្នាក់ដឹកនាំកំពូលរបស់ខ្លួន គឺលោកចូ បៃឌិន និងលោក ស៊ី ជីនពីង បានជួបពិភាក្សាគ្នាតាមអនឡាញនៅថ្ងៃអង្គារសប្តាហ៍នេះ។
លោក ប្លីងខេន បានជំរុញទីក្រុងប៉េកាំងឱ្យចូលរួមក្នុងកិច្ចសន្ទនាប្រកបដោយអត្ថន័យ ដើម្បីដោះស្រាយបញ្ហាច្រកសមុទ្រតៃវ៉ាន់ដោយសន្តិវិធី និងក្នុងលក្ខណៈមួយដែលស្របតាមបំណងប្រាថ្នា និងផលប្រយោជន៍របស់ប្រជាជនតៃវ៉ាន់។
អត្ថបទទាក់ទង
ដោយឡែក ភាគីចិនមិនបានឆ្លើយតបនឹងការលើកឡើងខាងលើរបស់អាមេរិកនោះទេ ដោយលោក វ៉ាង យីគ្រាន់តែបានព្រមានទៅសហរដ្ឋអាមេរិក ឲ្យប្រុងប្រយ័ត្នក្នុងការប្រើប្រាស់ពាក្យសំដីខ្លួន ពិសេស នៅពេលដែលអាមេរិកអះអាងខ្លួន នឹងជួយការពារកោះតៃវ៉ាន់ពីការវាយដណ្តើមកាន់កាប់។ ក្រុងប៉េកាំង បានបញ្ជាក់ទៀត ថា ការអះអាងរបស់អាមេរិក អាចបញ្ជូនសារខុសឆ្គងទៅកាន់ក្រុមអ្នកប្រជាធិបតេយ្យ និងជាតិនិយមតៃវ៉ាន់ ដែលគិតចង់ប្រកាសឯករាជ្យឲ្យដែនកោះមួយនេះ។
សូមជម្រាបថា ការដំឡើងសំឡេងដាក់គ្នារវាងប្រទេសទាំងពីរ ធ្លាក់មកជួនចំពេលដែល កិច្ចប្រជុំកំពូលតាមប្រព័ន្ធអនឡាញរវាងមេដឹកនាំទាំងពីរ នឹងធ្វើឡើងក្នុងពេលឆាប់ៗខាងមុខ ពោលគឺនៅព្រឹកថ្ងៃអង្គារទី១៦ សប្តាហ៍នេះ។ កិច្ចប្រជុំនេះផងដែរ ត្រូវបានគេរំពឹងថា អាចជួយបន្ថយកំដៅ និងភាពតានតឹងរវាងប្រទេសទាំងពីរលើគ្រប់បញ្ហាពាក់ព័ន្ធនានា ដែលកំពុងប្រឈមមុខដាក់គ្នា៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
