កីឡាអូឡាំពិករដូវរងា ដែលអាមេរិកបានធ្វើពហិកាការទូតមិនចូលរួម ក្រោមហេតុផលថា ចិននៅតែបន្តរំលោភសិទ្ធិមនុស្សនៅក្នុងតំបន់ស៊ិនជាំង ដែលប្រជាជនភាគច្រើនជាជនជាតិភាគតិចម៉ូស្លីម អ៊ុយហ្គ័រ។ នេះបើតាមការចុះផ្សាយដោយទីភ្នាក់ងារសារព័ត៌មានរ៉យទ័រ។
សមាជិកព្រឹទ្ធសភាពីររូបមកពីគណបក្សប្រជាធិបតេយ្យគឺលោក ចេហ្វ មើកឃ្លេ(Jeff Merkley) និងលោកចេម៍ ម៉េកហ្គូវឺន(James McGovern) ដែលម្នាក់ជាប្រធាន និងជាសហប្រធានគណៈកម្មការប្រតិបត្តិសភាអាមេរិកទទួលបន្ទុកបញ្ហាប្រទេសចិនបានសរសេរលិខិតដាក់ទៅឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស ទទូចឲ្យបញ្ចេញរបាយការណ៍បញ្ហាសិទ្ធិមនុស្សនៅតំបន់ស៊ិនជាំងប្រទេសចិន ឲ្យបានមុនថ្ងៃបើកកម្មវិធីកីឡាអូឡាំពិករដូវរងានាថ្ងៃទី០៤ខែកុម្ភៈ។
ក្នុងលិខិតនោះ សមាជិកព្រឹទ្ធសភាទាំងពីររូបរបស់អាមេរិកបានសង្កត់ធ្ងន់ថា ការចេញផ្សាយរបាយការណ៍ឲ្យបានឆាប់ អាចក្រើនរំលឹកថា គ្មានប្រទេសណាមួយអាចគេចផុតពីការតាមដានរបស់អន្តរជាតិ ចំពោះការរំលោភសិទ្ធិមនុស្សដ៏ធ្ងន់ធ្ងរនោះទេ។
អត្ថបទគួរអាន
ជាការឆ្លើយតប ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សលោកស្រី មីឆែល បាច់ឆ៍លីត (Michelle Bachelet) បានបង្ហាញការសោកស្តាយព្រោះ ក្រុមការងាររបស់លោកស្រីមិនអាចចូលទៅកាន់តំបន់ភាគខាងលិចនៃប្រទេសចិន ដើម្បីស៊ើបអង្កេតការចោទប្រកាន់អំពីការរំលោភសិទ្ធិ ប្រឆាំងនឹងជនជាតិ អ៊ុយហ្គ័រ និងក្រុមជនជាតិភាគតិចមូស្លីមផ្សេងទៀត បានឡើយ។
មែនទែនទៅ ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សរូបនេះ ធ្លាប់បានប្រកាសកាលពីចុងខែធ្នូឆ្នាំ២០២១ថា ខ្លួនកំពុងព្យាយាមបិទបញ្ចប់របាយការណ៍នេះ និងរៀបចំចេញផ្សាយឲ្យបានឆាប់ៗ ប៉ុន្តែត្រូវបានពន្យារពេលម្តងហើយម្តងទៀត ដោយសារតែភាគីចិនមិនបានឆ្លើយតបនឹងសំណើសុំចូលជួបពិភាក្សាពីអ្នកជំនាញរបស់ UN ឡើយ។
សូជម្រាបថា ទោះមិនបានសហការជាមួយអ្នកជំនាញសិទ្ធិមនុស្សរបស់ UN ប៉ុន្តែក្រុងប៉េកាំងតែងច្រានចោលរហូតមក ថាខ្លួនមិនដែលបានធ្វើការរំលោភ និងគាបសង្កត់សិទ្ធិសេរីភាពប្រជាជននៅក្នុងតំបន់ ដូចការចោទប្រកាន់ឡើយ ហើយជំរុំដែលខ្លួនបង្កើតឡើងជាច្រើនកន្លែងគ្រាន់ជាទីតាំងសម្រាប់បណ្តុះបណ្តាលជំនាញដល់ជនជាតិម៉ូស្លីមប៉ុណ្ណោះ៕
None
