បច្ចុប្បន្ន អាជីវកម្មទិញលក់សិទ្ធិបន្ត ឬហៅថា Franchise បាននិងកំពុងរីកដុះដាលយ៉ាងខ្លាំងនៅក្នុងទីផ្សារកម្ពុជា ហើយបើតាមអ្នកជំនាញក្នុងវិស័យនេះអះអាងថា កំណើននៃការនាំចូលអាជីវកម្ម Franchise មកពីក្រៅប្រទេស គឺជាការឆ្លុះបង្ហាញពីអំណាចនៃការទិញរបស់ប្រជាជនក្នុងស្រុក និងសក្ដានុពលសេដ្ឋកិច្ចរបស់កម្ពុជា។ ជាក់ស្តែង ថ្មីៗនេះ ក្រុមហ៊ុន TH CVS បានសម្រេចនាំម៉ាក CIRCLE K ដែលជាហាងទំនិញលក់រាយដ៏ល្បីមកពីសហរដ្ឋអាមេរិក មកបើកដំណើរការអាជីវកម្មនៅកម្ពុជា។
បើតាមការគូសបញ្ជាក់ពីប្រធានក្រុមប្រឹក្សាភិបាលក្រុមហ៊ុនខាងលើ នេះជាម៉ាកសញ្ញារបស់អាមេរិកទី៤ហើយ ដែលក្រុមហ៊ុន TH CVS បានធ្វើការនាំចូលមកប្រទេសកម្ពុជា។
លោក ណម តុង ប្រធានក្រុមប្រឹក្សាភិបាលក្រុមហ៊ុន TH CVS បានមានប្រសាសន៍ថា CIRCLE K ជាម៉ាកសញ្ញាល្បីមួយលំដាប់ពិភពលោក ដែលពេលនេះបានពង្រីកខ្លួនជាង ១ម៉ឺន៥ពាន់ហាងហើយ នៅជាច្រើនប្រទេស។ ដោយឡែក បច្ចុប្បន្ន ហាង CIRCLE K មាន ៣សាខាហើយ នៅក្នុងរាជធានីភ្នំពេញ។
លោកបញ្ជាក់ថា ដើម្បីបង្កើតហាងលក់រាយ CIRCLE K ដែលមានទំហំខ្នាតតូចប្រហាក់ប្រហែលនឹងហាងលោកកំពុងបើកដំណើរការបច្ចុប្បន្ន យ៉ាងហោចណាស់ត្រូវចំណាយទុនប្រមាណ ១០ម៉ឺនដុល្លារ។
តើអ្នកបានអានអត្ថបទនេះ ឬនៅ?
លោក ណម តុង បានលើកឡើងពីលក្ខណៈពិសេសរបស់ហាង CIRCLE K នេះថា ជាហាងលក់ទំនិញរាយសម្រាប់ការប្រើប្រាស់ប្រចាំថ្ងៃ ដូចជា សម្ភារៈប្រើប្រាស់និងចំណីអាហារជាដើម អ្វីដែលពិសេស គឺទំនិញមានគុណភាពសុទ្ធល្អ ដែលមិនប៉ះពាល់ដល់សុខភាពអ្នកប្រើប្រាស់។
ក្នុងរយៈពេល១០ ឆ្នាំខាងមុខ ម្ចាស់អាជីវកម្មដែលបានយកម៉ាកសញ្ញា CIRCLE K មកកម្ពុជាបញ្ជាក់ថា នឹងបើកហាងលក់ទំនិញខ្នាតតូចនេះ ឲ្យបាន ៣០០ ហាង ដោយនឹងប្រើទុនវិនិយោគជាង ២០លានដុល្លារ។ ទន្ទឹងនឹងនេះ ត្រឹមតែ១ឆ្នាំ២០១៨ នេះប៉ុណ្ណោះ លោក ណម តុង អះអាងថា នឹងពង្រីកហាងលក់រាយនេះ បន្ថែមឲ្យបានរហូតដល់៤០ហាងផងដែរ។
នៅក្នុងឱកាសសម្ពោធបើកហាងទំនិញ CIRCLE K សាខាទី៣ កាលពីពេលថ្មីៗនេះដែរ ឯកឧត្តម កឹម ស៊ីថន រដ្ឋលេខាធិការក្រសួងពាណិជ្ជកម្ម បានគូសបញ្ជាក់ថា ផ្តើមចេញពីការបើកឲ្យដំណើរការហាងលក់រាយដែលមានម៉ាកសញ្ញាមកពីអាមេរិកមួយនេះ សង្ឃឹមថា ហាងទំនិញដែលមានម៉ាកល្បីៗនឹងបង្ហាញវត្តមានកើនឡើងជាបន្តបន្ទាប់នៅកម្ពុជា ខណៈដែលកម្ពុជាគឺជាទីផ្សារសម្រាប់ផលិតផលល្បីៗ ដែលកំពុងពេញនិយម។
តើអ្នកបានអានអត្ថបទនេះឬនៅ?
បើតាមឯកឧត្តម កឹម ស៊ីថន ក្នុងឆ្នាំ២០១៧ កន្លងមកនេះ មានម៉ាកល្បីៗចំនួនប្រមាណ ៩៩ម៉ាកសញ្ញាហើយ ដែលបានប្រគល់សិទ្ធិឲ្យក្រុមហ៊ុនក្នុងស្រុកធ្វើការគ្រប់គ្រង និងបែងចែកលក់បន្តក្នុងនាមតំណាងម្ចាស់ម៉ាក។
ការចូលមកដល់របស់ CIRCLE K ក៏បានធ្វើឲ្យយើងនឹកឃើញដល់ យីហោ 7-Eleven ដែលជាម៉ាត Franchise ដ៏ល្បី ធ្លាប់បានប្រកាសថា ខ្លួននឹងចូលមកកម្ពុជានៅឆ្នាំ២០១៥ ប៉ុន្ដែ រហូតមកទល់ពេលនេះ គេមិនទាន់ឃើញហាងលក់រាយខ្នាតអន្តរជាតិមួយនេះ បង្ហាញវត្តមានរបស់ខ្លួននៅឡើយ ខណៈដែលកាលពីពាក់កណ្ដាលឆ្នាំ២០១៥ កន្លងទៅ យីហោលំដាប់ខ្ពស់មួយនេះ បានសម្រេចចូលក្នុងទីផ្សារប្រទេសវៀតណាម និង បាននិងកំពុងពង្រីកខ្លួនដូចផ្សិតត្រូវសន្សើមត្រជាក់នៅប្រទេសថៃ ផងដែរ។
យោងតាមរបាយការណ៍ក្រសួងពាណិជ្ជកម្ម ទំហំពាណិជ្ជកម្មរវាងកម្ពុជានិងអាមេរិកក្នុងរយៈពេល១១ខែឆ្នាំ២០១៧ មានសរុបជាង ៣ពាន់លានដុល្លារ ក្នុងនោះកម្ពុជានាំចេញទៅអាមេរិក ២ពាន់៨០០លាន ខណៈការនាំចូលមានជាង ៣៦០លានដុល្លារ៕
None
