ការសម្រេចចិត្តរបស់ចៅក្រមអាម៉េរិក លោក អាមីត ម៉េះតា (Amit Mehta) នេះបានកើតឡើងក្នុងរយៈពេលជិតមួយឆ្នាំបន្ទាប់ពីការចាប់ផ្តើមកាត់ក្តី ដែលបានធ្វើឱ្យក្រសួងយុត្តិធម៌អាម៉េរិកប្រឈមមុខគ្នានឹងក្រុមហ៊ុន Google ក្នុងសំណុំរឿងប្រឆំាងទំនុកចិត្តដ៏ធំបំផុតមិនធ្លាប់មានក្នុងរយៈពេល២៥ឆ្នាំកន្លងមកនេះ។
លោក ម៉េះតា បានសរសេរក្នុងសេចក្តីសម្រេចថា បន្ទាប់ពីបានពិចារណា និងថ្លឹងថ្លែងយ៉ាងយកចិត្តទុកដាក់លើសក្ខីកម្មរបស់សាក្សី និងភស្តុតាងដាក់បន្ទុករួចមក តុលាការបានសម្រេចចិត្តថា ក្រុមហ៊ុន Google បានប្រើសិទ្ធិផ្តាច់មុខរបស់ខ្លួន បំផ្លាញការប្រកួតប្រជែង និងរារាំងការច្នៃប្រឌិតរបស់អ្នកប្រើប្រាស់។
ការសម្រេចចិត្តរបស់តុលាការនេះ បានបង្ហាញពីបរាជ័យដ៏សំខាន់របស់ក្រុមហ៊ុន Google និងក្រុមហ៊ុនមេរបស់ខ្លួន គឺក្រុមហ៊ុន Alphabet ដែលបានប្រកែកយ៉ាងខ្លាំងថា ប្រជាប្រិយភាពរបស់ខ្លួន គឺបានមកពីចំណង់ដ៏លើសលប់របស់អ្នកប្រើប្រាស់ម៉ាស៊ីនស្រាវជ្រាវតាមអ៊ីនធឺណិតដ៏ល្អនេះតែប៉ុណ្ណោះ។
ម៉ាស៊ីនស្វែងរក ឬស្រាវជ្រាវរបស់ក្រុមហ៊ុន Google នេះ បច្ចុប្បន្នកំពុងដំណើរការប្រហែលជាង៨ពាន់លានសំណួរក្នុងមួយថ្ងៃនៅទូទាំងពិភពលោក ដែលស្ទើរតែកើនឡើងទ្វេដងនៃបរិមាណប្រចាំថ្ងៃរបស់ខ្លួន បើធៀបនឹង១២ឆ្នាំមុន៕
អត្ថបទ៖ សុខ មង្គល
