លោក Jerome Powell ប្រធានធនាគារប្រាក់បម្រុងសហព័ន្ធសហរដ្ឋអាមេរិក បាននិយាយនាពេលថ្មីៗនេះថា «កញ្ចប់ថវិការបស់សហព័ន្ធអាមេរិក គឺស្ថិតនៅក្នុងស្ថានភាពមិនស្ថិតស្ថិរអស់មួយរយៈហើយ! ហើយនេះ គឺមិនមែនជាពេលវេលាដើម្បីផ្ដល់អាទិភាព ទៅលើការព្រួយបារម្ភទាំងអស់នោះទេ»។
ទោះយ៉ាងណា នៅពេលដែល អាមេរិកបានងើបខ្លួនផុតពីវិបត្តិសុខាភិបាល និងសេដ្ឋកិច្ចនាពេលបច្ចុប្បន្ននេះ វានឹងបន្សល់ទុកនូវពលរដ្ឋអាមេរិកកាំង ជាមួយនឹងបន្ទុកបំណុលដ៏ធំ។
នៅថ្ងៃព្រហស្បត្តិ៍ ទី ៨ ខែតុលា កន្លងទៅ ការិយាល័យថវិកាសភាអាមេរិក បានប៉ាន់ប្រមាណថា នៅឆ្នាំសាពើពន្ធ ២០២០ ដែលបានបញ្ចប់កាលពីថ្ងៃទី ៣០ ខែកញ្ញាកន្លងទៅនេះ ឱនភាពថវិការបស់អាមេរិកមានប្រមាណជាង ៣ទ្រីលានដុល្លារអាមេរិក ឬស្មើនឹងជាង ១៥% នៃ GDP ដោយសារតែរដ្ឋាភិបាលមានការចំណាយច្រើនលើសលុបប្រមាណ ជាង ៦,៥៥ ទ្រីលានដុល្លារ និងចំណូលប្រមូលបានមានតែប្រមាណ ៣,៤២ ទ្រីលានដុល្លារប៉ុណ្ណោះ។
អត្ថបទទាក់ទង
នៅក្នុងចំណែកនៃសេដ្ឋកិច្ច ឱនភាពថវិកាដែលត្រូវបានប៉ាន់ប្រមាណ នៅឆ្នាំ២០២០ គឺមានច្រើនជាង៣ដង ធៀបនឹងឆ្នាំ២០១៩ ហើយឱនភាពថវិកានេះ ក៏មានខ្ពស់បំផុត គិតតាំងពីក្រោយសង្គ្រាមលោកលើកទី២ មក។
នាយកដ្ឋានរតនាគារអាមេរិក នឹងមិនបង្ហាញនូវតួលេខចុងក្រោយ សម្រាប់ឆ្នាំសាពើពន្ធ២០២០ រហូតដល់ខែក្រោយនេះ។ ក៏ប៉ុន្ដែ បើតាមការប៉ាន់ប្រមាណ របស់ការិយាល័យថវិកាសភា បានឲ្យដឹងថា បំណុលសរុប ដែលរដ្ឋាភិបាលជំពាក់អ្នកវិនិយោគ ដែលជាផលបូកសំខាន់នៃឱនភាពប្រចាំឆ្នាំ ដែលបានកើនឡើងនាប៉ុន្មានឆ្នាំមកនេះ បានបង្ហាញឲ្យឃើញថា ទំហំបំណុលរបស់អាមេរិក នឹងមានធំជាងទំហំសេដ្ឋកិច្ចរបស់ប្រទេស ដែលអាចនឹងមានដល់ទៅ ១០២% នៃ GDP។ នេះបើតាមការគណនាពីគណៈកម្មាធិការសម្រាប់ទទួលខុសត្រូវថវិកាសហព័ន្ធ។
ទំហំបំណុលនេះ គឺមិនធ្លាប់បានកើនខ្ពស់ដូចពេលនេះទេ គិតតាំងពីឆ្នាំ១៩៤៦មក នៅពេលដែលបំណុលសហព័ន្ធមានដល់ទៅជាង ១០៦% នៃ GDP។
ប្រធានគណៈកម្មាធិការសម្រាប់ទទួលខុសត្រូវថវិកាសហព័ន្ធ លោក Maya MacGuineas បានបញ្ជាក់ថា «បំណុលគឺមានទំហំប៉ុនទំហំសេដ្ឋកិច្ចនៅបច្ចុប្បន្ននេះ ហើយនៅពេលឆាប់ៗខាងមុខនេះ វានឹងមានធំជាងពេលណាៗទាំងអស់ក្នុងប្រវត្តិសាស្ត្រ»។
បញ្ហាកម្រិតបំណុលខ្ពស់ កំពុងបន្ដកើនឡើង គឺដោយសារតែមានការបង្កើនការរឹតត្បឹត ទៅលើអ្វីដែលរដ្ឋាភិបាលអាមេរិកអាចធ្វើទៅបាន ដើម្បីឆ្លើយតបនឹងតម្រូវការប្រទេស ដែលកំពុងត្រូវការនៅអំឡុងពេលនៃវិបត្តិកូវីដ-១៩នេះ៕
None
