តួយ៉ាងសូម្បីតែក្រុមហ៊ុន Apple ដែលគេស្គាល់ថាជាក្រុមហ៊ុនដែលមានតម្លៃខ្ពស់បំផុតក្នុងពិភពលោក ក៏បានប្រកាសពីការដកខ្លួន ឈប់លក់ផលិតផលទាំងអស់ទៅឲ្យរុស្ស៊ីផងដែរ។
ក្រុមហ៊ុនយក្ស Apple របស់អាមេរិកប្រកាសថា នឹងបញ្ឈប់ការលក់ផលិតផលទាំងអស់របស់ខ្លួនទៅក្នុងទីផ្សាររុស្ស៊ី ដែលជាការដាក់សម្ពាធមួយទៅកាន់រដ្ឋាភិបាលក្រុងម៉ូស្គូ ក្រោយពីបានវាយឈ្លានពានប្រទេសអ៊ុយក្រែន។ បន្ថែមពីនេះ ក្រុមហ៊ុន Apple ក៏នឹងមានដាក់ការរឹតត្បិតទៅលើកម្មវិធីទូរស័ព្ទរបស់បណ្ដាញសារព័ត៌មានរដ្ឋរុស្ស៊ី RT និង Sputnikផងដែរ ពោលគឺនឹងមានតែអ្នកនៅរុស្ស៊ីប៉ុណ្ណោះ ដែលអាចបើកមើលកម្មវិធីនេះបានតាមរយៈឧបករណ៍ Apple។ នេះបើយោងតាមការចុះផ្សាយដោយសារព័ត៌មាន NBC។
ចាប់ពីពេលនេះទៅនឹងមិនមាន ហាងលក់ផលិតផលរបស់ក្រុមហ៊ុន Apple នៅក្នុងប្រទេសរុស្ស៊ីទៀតទេ ហើយក៏មិនមានការដឹកជញ្ជូនទូរស័ព្ទ កុំព្យូទ័រ និងថេប្លេតរបស់Appleតាមរយៈការបញ្ជាទិញអនឡាញ និងការលក់ផលិតផល Apple តាមរយៈហាងលក់រាយភាគីទីបីនៅរុស្ស៊ីទៀតនោះដែរ។ ក្រៅតែពីនេះ ថ្មីៗនេះ ក្រុមហ៊ុន Apple ក៏បានបញ្ឈប់សេវាកម្ម Apple Pay នៅក្នុងប្រទេសរុស្ស៊ីផងដែរ បន្ទាប់ពីសហរដ្ឋអាមេរិកដាក់ទណ្ឌកម្មលើធនាគាររុស្ស៊ី។
ទន្ទឹមនឹងនោះ Apple បានដាក់ការរឹតត្បិតលើកម្មវិធីទូរស័ព្ទសម្រាប់សារព័ត៌មានរដ្ឋរុស្ស៊ី RT និង Sputnik ឱ្យឃើញតែក្នុងប្រទេសរុស្ស៊ីប៉ុណ្ណោះ ហើយចំពោះ Apple Maps លែងបង្ហាញចរាចរណ៍នៅក្នុងប្រទេសអ៊ុយក្រែនទៀតហើយ ដើម្បីជួយការពារប្រជាជនក្នុងប្រទេសនេះ។ នេះបើតាមការបញ្ជាក់របស់អ្នកនាំពាក្យក្រុមហ៊ុន Apple។
អត្ថបទគួរអាន
យ៉ាងណាក៏ដោយចុះ App Store នឹងនៅតែដំណើរការជាធម្មតា ហើយអ្នកប្រើប្រាស់នៅក្នុងប្រទេសរុស្ស៊ីនឹងនៅតែអាចធ្វើបច្ចុប្បន្នភាពកម្មវិធីរបស់ពួកគេបាន។
សេចក្តីប្រកាសរបស់ក្រុមហ៊ុន Appleនេះ នឹងបន្ថែមចូលទៅក្នុងបញ្ជីក្រុមហ៊ុនដែលបានដកខ្លួនចេញឆ្ងាយពីប្រទេសរុស្ស៊ី រួមទាំងក្រុមហ៊ុន Disney និងក្រុមហ៊ុនដឹកជញ្ជូន UPS និង FedEx, DHL ផងដែរ។ ជាមួយគ្នានេះក្រុមហ៊ុនផលិតប្រេងដ៏ធំ Shell បាននិយាយកាលពីថ្ងៃចន្ទថា ខ្លួនកំពុងចាកចេញពីប្រតិបត្តិការទាំងអស់នៅរុស្ស៊ីដែរ បន្ទាប់ពីការប្រកាសរបស់ក្រុមហ៊ុនថាមពលរបស់អង់គ្លេស BP កាលពីថ្ងៃចន្ទ ដើម្បីបំបែកខ្លួនចេញពីក្រុមហ៊ុនប្រេងយក្សរុស្ស៊ី Rosneft ។ ដោយឡែក ក្រុមហ៊ុនផលិតរថយន្ត General Motors និង Volvo ក៏បានផ្អាកការនាំចេញរថយន្តទៅកាន់ប្រទេសរុស្ស៊ីដូចគ្នាផងដែរ។ ជាមួយគ្នានេះ ក្រុមហ៊ុនផលិតរថយន្ដយក្សរបស់ជប៉ុន ហុងកុង និង Mazda ក៏បានប្រកាសឈប់នាំចេញយានយន្ដរបស់ខ្លួន និងគ្រឿបង្គុំនានាទៅកាន់ប្រទេសរុស្ស៊ីដែរ។
ក្រៅពីនេះ ក្រុមហ៊ុនផលិតយន្ដហោះ ដូចជា Boeing និង Airbus ក៏បានប្រកាសថានឹងផ្អាកការផ្គត់ផ្គង់ និងការផលិតសម្រាប់ក្រុមហ៊ុនអាកាសចរណ៍រុស្ស៊ីផងដែរ។
ក្រៅពីនេះ មានក្រុមហ៊ុនបច្ចេកវិទ្យាផ្សេងជាច្រើនទៀត ក៏បានធ្វើការផ្លាស់ប្តូរទំនាក់ទំនងរបស់ពួកគេ ជាមួយនឹងរុស្ស៊ីដែរ បន្ទាប់ពីមានការផ្ទុះសង្គ្រាមឈ្លានពានរបស់រុស្ស៊ីលើអ៊ុយក្រែន។ ជាក់ស្ដែង Google បានបិទកម្មវិធី Google Map ដែលបង្ហាញពីចរចរណ៍នៅតាមដងផ្លូវនៅក្នុងប្រទេសអ៊ុយក្រែន ខណៈដែលក្រុមហ៊ុនយក្សរបស់ហ្វេសប៊ុក និង Youtube វិញ ក៏បាន បានរឹតត្បិតទៅលើប្រព័ន្ធផ្សព្វផ្សាយរដ្ឋរុស្ស៊ីនៅក្នុងសហភាពអឺរ៉ុបផងដែរ៕
អត្ថបទ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
