កាលពីខែធ្នូ ឆ្នាំ២០២១ កន្លងទៅ ប្រធានាធិបតីសហរដ្ឋអាមេរិកលោក Joe Biden បានចុះហត្ថលេខាលើច្បាប់ស្តីពីការការពារលើជនជាតិអ៊ុយហ្គួរ (UFLPA) ដែលច្បាប់នោះ មានគោលបំណងដើម្បីការពារទីផ្សារសហរដ្ឋអាមេរិកពីផលិតផលដែលអាចមានការពាក់ព័ន្ធនឹងការរំលោភសិទ្ធិមនុស្សដ៏ធ្ងន់ធ្ងរនៅខេត្តស៊ីនជាំង ប្រទេសចិន ដែលជាកន្លែងរដ្ឋាភិបាលសហរដ្ឋអាមេរិកចោទប្រកាន់ថា ប្រទេសចិនកំពុងប្រព្រឹត្តអំពើប្រល័យពូជសាសន៍ប្រឆាំងនឹងជនជាតិអ៊ុយហ្គួរ មូស្លីម។
គួររំលឹកថា ច្បាប់ថ្មីរបស់អាមេរិកនេះរួមបញ្ចូលផងដែរ នូវទំនិញដែលអាចនាំចូលបានពីតំបន់ Xinjiang ប៉ុន្ដែត្រូវត្រួតពិនិត្យ និងបញ្ជាក់ឲ្យបានច្បាស់ជាមុនសិនដោយអាជ្ញាធរចិន ដោយមុខទំនិញទាំងនោះមិនត្រូវបាននាំចេញពីជំរុំឃុំឃាំងរបស់ជនជាតិអ៊ុយហ្គួ និងក្រុមមូស្លីមផ្សេងទៀត ដែលត្រូវបានធ្វើឡើងដោយការបង្ខិតបង្ខំ និងការរំលោភកម្លាំងពលកម្មជាដាច់ខាត។
ទោះបីជាយ៉ាងណា ប្រទេសចិនបានបដិសេធនូវការចោទប្រកាន់នៃការរំលោភបំពានលើជនជាតិអ៊ុយហ្គួក្នុងខេត្តស៊ីនជាំងនេះ ហើយចិនថាច្បាប់អាមេរិកនេះគឺចង់ "បង្កាច់បង្ខូច" ស្ថានភាពសិទ្ធិមនុស្សនៅប្រទេសរបស់ខ្លួនថែមទៀតផង។ គួរបន្ថែមថា តំបន់ស៊ីងជាំងនេះ ជាទីផ្សារផលិតកប្បាសដ៏សំខាន់មួយ ហើយក៏ជាកន្លែងផ្គត់ផ្គង់សម្ភារៈជាច្រើនសម្រាប់បង្កើតបន្ទះស្រូបពន្លឺព្រះអាទិត្យសម្រាប់ពិភពលោកផងដែរ។
អត្ថបទគួរអាន
សមាជិកសភាអាមេរិកមួយចំនួនបានគាំទ្រសេចក្តីស្នើច្បាប់ របស់នាយកដ្ឋានគយ និងការការពារព្រំដែន (CBP) នេះ ក្នុងការផ្តល់ថវិកាបន្ថែម ដើម្បីអនុវត្តការច្បាប់ហាមឃាត់ការនាំចូលទំនិញពីតំបន់ស៊ីនជាំងប្រទេសចិនឱ្យមានប្រសិទ្ធភាព ដែលវានឹងចូលជាធរមាននៅថ្ងៃទី ២១ ខែមិថុនា។
លោកស្រី អេលវ៉ា ម៉ូនតុន (Elva Muneton) នាយកប្រតិបត្តិស្តីទីនាយកដ្ឋានគយ និងការការពារព្រំដែន បាននិយាយថា "អាមេរិកនឹងត្រៀមខ្លួនក្នុងការអនុវត្តច្បាប់ការពារលើជនជាតិអ៊ុយហ្គួរ (UFLPA) នេះ នៅពេលបច្បាប់នេះចូលជាធរមាន ហើយរាល់ទំនិញដែលនាំចូលក្នុងទីផ្សារអាមេរិកនឹងត្រូវដឹកទៅប្រទេសដើមវិញ បើការត្រួតពិនិត្យព្រមទាំងវិនិច្ឆ័យឃើញថា មានការពាក់ព័ន្ធទៅនឹងការរំលោភសិទ្ធិជនជាតិអ៊ុយហ្គួរមែននោះ”។
លោកស្រីបាននិយាយបន្ថែមថា "ទំនិញដែលអាចនាំចូលបាន លុះត្រាមានឯកសារ ភស្តុតាងច្បាស់លាស់ និងគួរឱ្យជឿជាក់ រួមទាំងខ្សែចង្វាក់ផ្គត់ផ្គង់នៃផលិតផលដទៃទៀត គឺមិនមានការរំលោភបំពានពលកម្មដោយបង្ខំនោះទេ"។
គួររំលឹកឡើងវិញថា ដំបូងឡើយទីក្រុងប៉េកាំងបានបដិសេធថា មិនមានជំរុំឃុំឃាំងណាមួយនោះទេនៅក្នុងតំបន់ស៊ីនជាំង ប៉ុន្តែក្រោយមកបានទទួលស្គាល់ថា ខ្លួនបានបង្កើត "មជ្ឈមណ្ឌលអប់រំពិសេស" ដែលចាំបាច់ដើម្បីទប់ស្កាត់នូវអ្វីដែលខ្លួនបានហៅថា ជាអំពើភេរវកម្ម ការបំបែកខ្លួន និងជំនឿសាសនាជ្រុលនិយមនៅក្នុងខេត្ត Xinjiang នោះ៕
អត្ថបទ៖ ហ៊ុន គន្ធថៃ
None
