បើយោងតាមលិខិតកាលពីថ្ងៃអង្គារ ទី ៥ ខែកក្កដា ពីសមាជិកព្រឹទ្ធសភាលោក Mark Warner មកពីគណបក្សប្រជាធិបតេយ្យ និង លោក Marco Rubio មកពីគណបក្សសាធារណរដ្ឋ បាននិយាយថា កម្មវិធីវីដេអូខ្លី TikTok បានអនុញ្ញាតឱ្យបុគ្គលិកអភិឌ្ឍកម្មវិធីរបស់ខ្លួន និង នាយកប្រតិបត្តិក្នុងប្រទេសចិនចូលប្រើទិន្នន័យឯកជនរបស់អ្នកប្រើប្រាស់អាមេរិកម្តងហើយម្តងទៀត។ សមាជិកព្រឹទ្ធសភាទាំង ២ រូបនេះ បាននិយាយថា ការចូលប្រើបែបនេះ គឺវាបានផ្ទុយស្រឡះទៅនឹងការអះអាងរបស់ TikTok ទៅកាន់សមាជិកសភា និង អ្នកប្រើប្រាស់អាមេរិកដែលថា ទិន្នន័យផ្ទាល់ខ្លួនរបស់ពួកគេត្រូវបានការពារ។ សមាជិកព្រឹទ្ធសភាបានសរសេរថា ដោយមានការបំភាន់ម្តងហើយម្តងទៀតរបស់កម្មវិធី TikTok ទាក់ទងនឹងសុវត្ថិភាពទិន្នន័យ ដំណើរការទិន្នន័យ និង ការអនុវត្តអភិបាលកិច្ចសាជីវកម្ម សមាជិកព្រឹទ្ធសភាអាមេរិកជំរុញឱ្យប្រធានគណៈកម្មការពាណិជ្ជកម្មសហព័ន្ធធ្វើសកម្មភាពភ្លាមៗលើបញ្ហានេះ។
យ៉ាងណាមិញ គណៈកម្មការពាណិជ្ជកម្មសហព័ន្ធបានបញ្ចាក់ថា ខ្លួនបានទទួលសារលិខិតនេះហើយ ប៉ុន្តែមិនទាន់ផ្តល់ការអត្ថាធិប្បាយឆ្លើយតបនៅឡើយទេ។
អត្ថបទគួរអាន
ថ្វីបើបែបនេះក្តី កម្មវិធី TikTok បានអះអាងកាលពីថ្ងៃអង្គារថា ការចូលប្រើទិន្នន័យ គឺស្ថិតនៅក្រោមការគ្រប់គ្រង និងការពារយ៉ាងរឹងមាំ ដែលស្ថិតក្រោមការត្រួតពិនិត្យ ដោយក្រុមសន្តិសុខដែលមានមូលដ្ឋាននៅសហរដ្ឋអាមេរិក។ ការអះអាងបែបនេះ បានធ្វើឡើងជាការឆ្លើយតបទៅនឹងលិខិតរបស់សមាជិកព្រឹទ្ធសភា ដើម្បីបញ្ជាក់ថាកម្មវិធី TikTokមិនដែលបានចែករំលែកទិន្នន័យអ្នកប្រើប្រាស់របស់សហរដ្ឋអាមេរិកទៅឱ្យរដ្ឋាភិបាលចិនឡើយ។
មែនទែនទៅ កាលពីសប្តាហ៍មុនកម្មវិធី TikTok បានប្រាប់សមាជិកព្រឹទ្ធសភាអាមេរិកថា ខ្លួនកំពុងធ្វើការលើកិច្ចព្រមព្រៀងចុងក្រោយជាមួយរដ្ឋបាលលោក Biden ដែលនឹងការពារទិន្នន័យអ្នកប្រើប្រាស់ និង ផលប្រយោជន៍សន្តិសុខជាតិរបស់សហរដ្ឋអាមេរិកយ៉ាងពេញលេញ។ TikTok បានទទួលស្គាល់នៅក្នុងលិខិតមួយកាលពីថ្ងៃព្រហស្បតិ៍ថា បុគ្គលិកដែលមានមូលដ្ឋាននៅប្រទេសចិនអាចចូលប្រើទិន្នន័យអ្នកប្រើប្រាស់ TikTok របស់សហរដ្ឋអាមេរិកបានមែន ប៉ុន្តែវាស្ថិតនៅក្រោមការគ្រប់គ្រងសុវត្ថិភាពតាមអ៊ីនធឺណិតដ៏រឹងមាំ។ នាយកប្រតិបត្តិTikTok លោក Shou Zi Chew បានប្រាប់សមាជិកព្រឹទ្ធសភាថា ខ្លួនកំពុងធ្វើការជាមួយម៉ាស៊ីនមេផ្ទុកទិន្ទន័យរបស់ក្រុមហ៊ុន Oracle Corp ដែលមានមូលដ្ឋាននៅសហរដ្ឋអាមេរិកលើការគ្រប់គ្រងសុវត្ថិភាពទិន្នន័យកម្រិតខ្ពស់ថ្មី ដែលនឹងបញ្ចប់ក្នុងពេលដ៏ខ្លីខាងមុខនេះ។
គួរជម្រាបថា ភាពចម្រុងចម្រាសនេះ មានរយៈពេលជិត ២ ឆ្នាំហើយចាប់តាំងពីក្រុមប្រឹក្សាសន្តិសុខជាតិរបស់សហរដ្ឋអាមេរិកបានបញ្ជាឱ្យក្រុមហ៊ុនមេ ByteDance ដកហូតកម្មវិធី TikTok ចេញពីសហរដ្ឋអាមេរិក ដោយសារតែការភ័យខ្លាចថាទិន្នន័យអ្នកប្រើប្រាស់របស់សហរដ្ឋអាមេរិកអាចត្រូវបានបញ្ជូនទៅរដ្ឋាភិបាលកុម្មុយនិស្តចិន។
ក្រោមហេតុផល សុវត្ថិភាពទិន្នន័យអ្នកប្រើប្រាស់នេះដែរ ស្នងការនៃគណៈកម្មការទំនាក់ទំនងសហព័ន្ធរបស់សហរដ្ឋអាមេរិក ដែលហៅកាត់ថា FCC ថ្មីៗនេះ ក៏ទើបតែបានបានជំរុញឱ្យនាយកប្រតិបត្តិរបស់ក្រុមហ៊ុន Apple និង ក្រុមហ៊ុន Google អនុវត្តដកកម្មវិធី TikTok ដែលជារបស់ក្រុមហ៊ុនចិន បាយដេនស៍ (ByteDance) ចេញពីប្រព័ន្ធកម្មវិធី Play Store និង App Store របស់អាមេរិកផងដែរ៕
