ជាការបង្ការនិងទប់ស្កាត់ការពុះដីឡូត៍យ៉ាងអនាធិបតេយ្យ អ្នកជំនាញនៅក្នុងវិស័យសំណង់និងអចលនទ្រព្យ បានទទូចទៅរាជរដ្ឋាភិបាលតាមរយៈក្រសួងរៀបចំដែនដី នគរូបនីយកម្ម និងសំណង់ ឲ្យរួសរាន់ពន្លឿនការរៀបចំប្លង់គោល សម្រាប់ការអភិវឌ្ឍសំណង់ និងការប្រើប្រាស់ដីជាយុទ្ធសាស្ត្រ ជៀសវាងមានហានិភ័យកើតឡើងនាថ្ងៃអនាគត។
ជុំវិញទៅនឹងការព្រួយបារម្ភនេះ លោកឧកញ៉ា ចេង ខេង ប្រធានក្រុមប្រឹក្សាភិបាលនៃសមាគមអ្នកវាយតម្លៃនិងភ្នាក់ងារអចលនវត្ថុកម្ពុជា មានការព្រួយបារម្ភចំពោះគម្រោងពុះដីឡូត៍ដែលមិនទាន់មានជាលក្ខណៈយុទ្ធសាស្រ្តបែបនេះ គឺបន្ទាប់ពីមើលឃើញសន្ទុះនៃការចាប់ផ្តើមសកម្មភាពពុះដីឡូត៍លក់កាន់តែច្រើនឡើងៗ នៅក្នុងរយៈពេល ៥ឆ្នាំចុងក្រោយនេះ ពោលគឺកើនឡើងស្ទើរគ្រប់ទីកន្លែងនៅទីប្រជុំជន និងបណ្តាខេត្តនានាទូទាំងប្រទេសកម្ពុជា។
ទស្សនាវីដេអូទាក់ទងនឹងការពុះដីឡូត៍លក់
តើអ្នកបានអានអត្ថបទនេះ ឬនៅ?
លោកឧកញ៉ា ចេង ខេង ដែលជាអគ្គនាយកក្រុមហ៊ុនអចលនវត្ថុ ស៊ី ភី អិល ផងដែរនោះ ក៏បានបញ្ជាក់អះអាងថា វិស័យសំណង់និងអចលនទ្រព្យបច្ចុប្បន្ន បាននិងកំពុងស្ទុះកើនឡើងយ៉ាងខ្លាំង ប៉ុន្តែ អ្វីដែលធ្វើឲ្យមានការបារម្ភខ្លាំងនៅពេលនេះ គឺការពុះដីឡូត៍អនាធិបតេយ្យ ខណៈការរៀបចំច្បាប់និងការកំណត់ប្លង់គោលសម្រាប់ការអភិវឌ្ឍរបស់រាជរដ្ឋាភិបាលកម្ពុជា ហាក់មិនលឿន ដូចការអភិវឌ្ឍពុះដីឡូតិ៍នោះឡើយ។
យ៉ាងណាក៏ដោយ អ្នកជំនាញក្នុងវិស័យអចលនទ្រព្យនៅតែអះអាងថា សុខភាពវិស័យសំណង់និងអចលនទ្រព្យ នៅក្នុងឆ្នាំ២០១៨នេះ គឺនៅតែបន្តអភិវឌ្ឍខ្លាំងដដែល មិនថា ក្នុងទីក្រុងភ្នំពេញ ជាយរាជធានីភ្នំពេញ នោះទេ នៅតាមបណ្តាខេត្តដែលមានសក្តានុពល ដូចជា ខេត្តព្រះសីហនុ សៀមរាប បាត់ដំបង ក៏កើនឡើងខ្លាំងផងដែរ។
រាល់គម្រោងសំណង់អគារខ្ពស់ៗ សំណង់អគារពាណិជ្ជកម្ម និង សំណង់លំនៅដ្ឋានលក្ខណៈបុរី គឺកំពុងអភិវឌ្ឍខ្លាំងបំផុតជាមួយនឹងភាពជឿជាក់លើស្ថិរភាពនយោបាយនិងកំណើនសេដ្ឋកិច្ច៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
