វៀតណាម និងកូរ៉េខាងត្បូង ដាក់គោលដៅជំរុញពាណិជ្ជកម្មទ្វេភាគីឱ្យបាន ១០០ ពាន់លានដុល្លារនៅឆ្នាំក្រោយ

ការលើកឡើង ពីគោលដៅពង្រីកទំហំពាណិជ្ជកម្មទ្វេភាគីរវាងវៀតណាម និងកូរ៉េខាងត្បូងនេះ ធ្វើឡើងនៅក្នុងជំនួបរវាងនាយករដ្ឋមន្ត្រីនៃប្រទេសទាំងពីរ ជាមួយនឹងការប្តេជ្ញាចិត្តថា នឹងពង្រីកវិសាលភាពពាណិជ្ជកម្មបន្ថែមទៀតឱ្យបានដល់ ១៥០ ពាន់លានដុល្លារនៅត្រឹមឆ្នាំ ២០៣០ ផងដែរ។ នេះបើតាមការចុះផ្សាយសារព័ត៌មាន Bangkok Post។

បើយោងតាមសេចក្តីថ្លែងការណ៍របស់រដ្ឋាភិបាលវៀតណាមបាននិយាយថា ក្នុងអំឡុងកិច្ចប្រជុំតាមរយៈប្រព័ន្ធវីដេអូរវាងនាយករដ្ឋមន្ត្រីកូរ៉េខាងត្បូងលោក Han Duck soo និងសមភាគីវៀតណាមលោក Pham Minh Chinh កាលពីល្ងាចថ្ងៃអង្គារ ទី ៦ ខែ កក្កដា បានសម្រេចនូវកិច្ចព្រមព្រៀងគោលដៅពាណិជ្ជកម្មទ្វេភាគីសម្រាប់ប្រទេសទាំង២ ជាមួយនឹងបង្កើនការវិនិយោគបន្ថែមនាពេលខាងមុខ។ ទន្ទឹមនឹងនោះ នាយករដ្ឋមន្រ្តីកូរ៉េខាងត្បូងលោក Duck soo និង លោក Pham Minh Chinh ក៏បានព្រមព្រៀងគ្នាក្នុងការស្វែងរកវិធីកាត់បន្ថយគម្លាតទំហំពាណិជ្ជកម្មទ្វេភាគីផងដែរ។

សេចក្តីថ្លែងការណ៍បានគូសបញ្ចាក់ថា ក្នុងអំឡុងនៃកិច្ចប្រជុំនោះ លោក Duck soo និង លោក Pham Minh Chinh ក៏បានចែករំលែកទស្សនៈអំពីសារៈសំខាន់នៃការរក្សាសន្តិភាព និងស្ថិរភាព និង សុវត្ថិភាពដែនសមុទ្រ និងសេរីភាពនៅក្នុងសមុទ្រចិនខាងត្បូងផងដែ។

មែនទែនទៅ ប្រទេសកូរ៉េខាងត្បូង គឺជាដៃគូសេដ្ឋកិច្ចដ៏សំខាន់សម្រាប់វៀតណាម និង ជាប្រភពធំបំផុតនៃការវិនិយោគផ្ទាល់ពីបរទេស។ យោងតាមទិន្នន័យគយវៀតណាមបានឱ្យដឹងថា ប្រទេសវៀតណាមមានឱនភាពពាណិជ្ជកម្មចំនួន ៣៤ ពាន់លានដុល្លារជាមួយកូរ៉េខាងត្បូងកាលពីឆ្នាំមុន។ ការនាំចូលសំខាន់របស់វៀតណាមពីកូរ៉េខាងត្បូង រួមមានគ្រឿងអេឡិចត្រូនិក គ្រឿងម៉ាស៊ីន លោហធាតុ ប្លាស្ទិក ក្រណាត់ និងឥន្ធនៈ៕