គម្រោងអភិវឌ្ឍហេដ្ឋារចនាសម្ព័ន្ធខាងលើរបស់អាមេរិក ត្រូវបានសមាជិកព្រឹទ្ធសភាអាមេរិកតាក់តែង និងរៀបចំឡើងអស់រយៈពេលជាច្រើនខែមកហើយ ដោយគម្រោងនេះ ត្រូវបានគេមើលឃើញថា ជាគម្រោងធំបំផុតមួយមិនធ្លាប់មាននោះទេក្នុងរយៈពេល១០ឆ្នាំចុងក្រោយនេះ។
គម្រោងដដែលខាងលើ ក៏ត្រូវបានគេដឹងដែរថា ជាគម្រោងអាទិភាពខ្ពស់ជាងគេមួយ របស់រដ្ឋបាលលោកចូ បៃឌិន ដោយលោកបានឲ្យផ្តើមគិតគូរពីគម្រោងនេះ ចាប់តាំងពីលោកចូលកាន់តំណែងជាប្រធានាធិបតីសហរដ្ឋអាមេរិកមកម្ល៉េះ។
សេចក្តីព្រៀងរបស់គម្រោងដែលមានកម្រាស់ជាង ២.៧០០ទំព័រ មានរួមបញ្ចូលគ្រោងការណ៍អភិវឌ្ឍផ្លូវថ្នល់ ផ្លូវដែក និងទីតាំងបញ្ជូលអគ្គិសនីដល់រថយន្ត សម្រាប់រយៈពេល៥ឆ្នាំ ក្រោមខ្ទង់ចំណាយ ៥៥០ពាន់លានដុល្លារអាមេរិក បូករួមនឹងគម្រោងផ្លាស់ប្តូរប្រព័ន្ធបំពង់បង្ហូរទឹក ដែលគ្រោងចំណាយប្រាក់ប្រមាណ ៤៥០ពាន់លានដុល្លារបន្ថែមទៀត។
អត្ថបទគួរអាន
បើតាមសមាជិកព្រឹទ្ធសភាមកពីគណៈបក្សប្រជាធិបតេយ្យជាច្រើនរូបបានបង្ហាញសុទិដ្ឋិនិយមចំពោះគម្រោងនេះ ដោយសារតែវានឹងឈានទៅធ្វើទំនើបកម្មសម្រាប់ហេដ្ឋារចនាសម្ព័ន្ធនៅសហរដ្ឋអាមេរិក ដែលភាគច្រើនមានសភាពចាស់ទ្រុឌទ្រោម ហួសសម័យ និង លើសអាយុកាលប្រើប្រាស់។
គួរបញ្ជាក់ថា គម្រោងនេះត្រូវបានសមាជិកព្រឹទ្ធសភាពមកពីគណៈបក្សសាធារណៈរដ្ឋមួយចំនួនរិះគន់ថាជាគម្រោងដែលចាយប្រាក់អស់ច្រើនជ្រុលពេក។ ប្រការនេះ ធ្វើឲ្យគេ នៅមិនទាន់អាចដឹងបាននៅឡើយទេថា គម្រោងដ៏ធំសម្បើមមួយនេះ អាចនឹងឆ្លងផុតព្រឹទ្ធសភាអាមេរិកដែរ ឬយ៉ាងណា។
ប៉ុន្តែប្រសិនបើវាអាចឆ្លងផុតព្រឹទ្ធសភាពអាមេរិកមែន សេចក្តីព្រៀងគម្រោងនេះចាំបាច់ត្រូវឆ្លងកាត់ការអនុម័តពីសភាតំណាងរាស្ត្រអាមេរិកបន្ថែមទៀត ដែលនៅទីនោះ គេទំនងជាត្រូវការពេលយូរដើម្បីជជែកពិភាក្សា ដោយហេតុថា អាមេរិកនៅមានគម្រោងអភិវឌ្ឍធំៗជាច្រើនទៀត ដែលមិនទាន់បានអនុម័តនៅឡើយ។ ជាក់ស្តែងរួមមានគម្រោងអភិវឌ្ឍធនធានមនុស្ស អប់រំ ថែទាំកុមារ គម្រោងបម្រែបម្រួលអាកាសធាតុ និង គម្រេងជាអាទិភាពផ្សេងៗទៀត៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
