រដ្ឋាភិបាលវៀតណាមចេញនូវយន្តការផ្ដល់នូវប្រាក់កម្ចីងាយស្រួល សម្រាប់ជួយដល់ក្រមហ៊ុនសហគ្រាសក្នុងការបើកប្រាក់ខែដល់កម្មករនិយោជិត ដែលកំពុងបន្តការងារ និងធ្វើឱ្យអាជីវកម្មរបស់ពួកគេរស់ឡើងវិញ។ ប៉ុន្ដែ ដើម្បីអាចទទួលបានប្រាក់កម្ចីទាំងនេះបាន ក្រុមហ៊ុនសហគ្រាសទាំងនោះ ត្រូវគោរពតាមលក្ខខណ្ឌដែលបានកំណត់។ លក្ខខណ្ឌនោះ ពួកគេត្រូវឱ្យបង់ពន្ធសម្រាប់ឆ្នាំ ២០២០ ខណៈ បទបញ្ជានៃការបង់ពន្ធអនុញ្ញាតឱ្យពួកគេអាចបង់ក្នុងរង្វង់រយៈពេល ៣ ទៅ ៥ ឆ្នាំ។
ទន្ទឹមនេះ ក្រុមប្រឹក្សាស្រាវជ្រាវការអភិវឌ្ឍសេដ្ឋកិច្ចឯកជនរបស់រដ្ឋាភិបាលថ្មីៗនេះ បានសរសេរលិខិតដាក់ទៅកាន់នាយករដ្ឋមន្ត្រីវៀតណាម លោក ផាម មីញឈីញ (Pham Minh Chinh) ដើម្បីបង្អុលបញ្ជាក់ថា លក្ខខណ្ឌកំណត់ដោយរដ្ឋាភិបាលនេះ គឺមិនសមហេតុផលនោះទេ។ ក្រុមប្រឹក្សាស្រាវជ្រាវការអភិវឌ្ឍសេដ្ឋកិច្ចឯកជនរបស់រដ្ឋាភិបាលបាននិយាយថា អាជីវកម្មជាច្រើនជួបបញ្ហាផ្នែកហិរញ្ញវត្ថុដោយសារជំងឺកូវីដចាប់តាំងពីឆ្នាំ២០២០ ហើយដូច្នេះ ការរំពឹងថា ពួកគេនឹងបង់ពន្ធសម្រាប់ឆ្នាំ ២០២០ គឺមិនយុត្តិធម៌ទេ ហើយរដ្ឋាភិបាលគួរតែពិចារណាដកចេញនូវលក្ខខណ្ឌទាក់ទងនឹងពន្ធលើប្រាក់ចំណូលនេះផងដែរ។ លក្ខខណ្ឌបែបនេះ កំពុងធ្វើឱ្យក្រុមហ៊ុនភាគច្រើនមិនអាចទទួលយកនូវប្រាក់កម្ចីពីរដ្ឋាភិបាលបានទេ។
អត្ថបទទាក់ទង
តែយ៉ាងណាមិញ នៅថ្ងៃទី ២៥ ខែកក្កដារដ្ឋមន្ត្រីក្រសួងការងារ ទទួលបន្ទុកផ្នែក យុទ្ធជនពិការ និងសង្គមកិច្ច លោក ដាវ ងុចដុង (Dao Ngoc Dung) បានរាយការណ៍ទៅរដ្ឋសភាថា ក្នុងសប្តាហ៍ទី ១ អាជីវកម្មចំនួន ៦២ ដែលមាននិយោជិតជាង ១ម៉ឺន៣ពាន់នាក់ បានទទួលប្រាក់កម្ចីដែលមានតម្លៃជាង២លានដុល្លារអាមេរិក។
ទន្ទឹមនេះ ក្រុមប្រឹក្សាស្រាវជ្រាវការអភិវឌ្ឍសេដ្ឋកិច្ចឯកជនរបស់រដ្ឋាភិបាល ក៏បានផ្តល់អនុសាសន៍រដល់រដ្ឋាភិបាលគួរតែបែងចែកវ៉ាក់សាំងបន្ថែមទៀតដល់ទីក្រុងនិងខេត្តភាគខាងត្បូងប្រទេសដែលកំពុងរាតត្បាតខ្លាំង ដែលជាមជ្ឈមណ្ឌលឧស្សាហកម្មរបស់ប្រទេសដូចជានៅ ក្រុងហូជីមិញ, ប៊ីនឌួង និងដុងណៃ។ ទន្ទឹមនឹងនេះ វិស័យឯកជន ក៏បន្តស្នើទៅរដ្ឋាភិបាល ដើម្បីសុំការអនុញ្ញាតទិញឧបករណ៍ធ្វើតេស្តរកមេរោគកូវីដ ១៩ និងដើម្បីធ្វើតេស្តដោយខ្លួនឯង៕
អត្ថបទ៖ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
