អាម៉េរិក ផ្អាកការនាំចេញរ៉ែកម្រទៅចិន ក្រោយសង្គ្រានពន្ធរវាងចិន និងអាម៉េរិក ឡើងកម្តៅដូចបាយពុះ

ក្រុមហ៊ុនជីករ៉ែ Shenghe ដែលគាំទ្រដោយក្រសួងហិរញ្ញវត្ថុរបស់ប្រទេសចិន បានសារភាពនៅក្នុងឯកសារមួយផ្ញើទៅកាន់ផ្សារហ៊ុនក្រុងសៀងហៃ កាលពីល្ងាចថ្ងៃអាទិត្យ សប្តាហ៍មុនថា ក្រុមហ៊ុនរុករករ៉ែ MP របស់អាម៉េរិក បានផ្អាកនាំចេញរ៉ែកម្រទៅប្រទេសចិន បណ្តោះអាសន្នដោយសារការដាក់ពន្ធបន្ថែមកាលពីពេលថ្មីៗក្នុងសង្គ្រាមពាណិជ្ជកម្មរវាងសហរដ្ឋអាម៉េរិក និងប្រទេសចិន។

ក្រុមហ៊ុនជីករ៉ែរបស់ចិន ខាងលើ ជាម្ចាស់ភាគហ៊ុនរបស់ក្រុមហ៊ុន MP របស់អាម៉េរិក។ ក្រុមហ៊ុនទាំងពីរនេះមានកិច្ចព្រមព្រៀងផ្តាច់មុខជាមួយគ្នា ដោយសាខាក្រុមហ៊ុន Shenghe នៅប្រទេសសិង្ហបុរីនឹងទិញយករ៉ែកម្ររបស់ក្រុមហ៊ុន MP ដើម្បីផ្គត់ផ្គង់អ្នកប្រើប្រាស់ចុងក្រោយនៅក្នុងប្រទេសចិនដីគោក។ កិច្ចព្រមព្រៀងដែលបានចូលជាធរមានជាថ្មីនៅក្នុងខែមករា ឆ្នាំ២០២៤ នេះមានសុពលភាពរយៈពេលពីរឆ្នាំ។

ក្រុមហ៊ុន MP បាននិយាយដោយឡែកនៅក្នុងសេចក្តីថ្លែងការណ៍មួយកាលពីថ្ងៃព្រហស្បតិ៍ថា ពួកគេបានបញ្ឈប់ការនាំចេញរ៉ែកម្រទៅកាន់ប្រទេសចិន ដើម្បីឆ្លើយតបទៅនឹងការដាក់ពន្ធសងសឹក និងការត្រួតពិនិត្យការនាំចេញរបស់ចិន។

ក្រុមហ៊ុននេះ បានលើកឡើងថា ការលក់ផលិតផលសំខាន់ៗរបស់ពួកគេនៅក្រោមពន្ធ១២៥% វាជារឿងមិនសមហេតុផល ឬស្របតាមផលប្រយោជន៍ជាតិរបស់អាម៉េរិកឡើយ។ ទីក្រុងប៉េកាំង បានបង្កើនការយកពន្ធរបស់ខ្លួនលើផលិតផលអាម៉េរិកទាំងអស់ដល់១២៥% បន្ទាប់ពីរដ្ឋការរបស់លោក ដូណាល់ ត្រាំ ប្រធានាធិបតីអាម៉េរិក បានដំឡើងពន្ធលើទំនិញរបស់ចិន រហូតដល់១៤៥% ហើយកាលពីពេលថ្មីៗអាម៉េរិក បានបង្កើតអត្រាពន្ធរហូតដល់២៤៥%៕

អត្ថបទ៖ សុខ មង្គល