មន្ត្រីជំនាញបានលើកឡើងថា កំណើននៃចំនួនក្រុមហ៊ុនចុះបញ្ជីថ្មីៗនេះ គឺជាសញ្ញាល្អសម្រាប់វិស័យអចលនទ្រព្យ ខណៈការអភិវឌ្ឍក៏បានបង្ហាញពីតួលេខស្នើសុំអភិវឌ្ឍន៍នៅបន្តមាន ដែលបាននិងកំពុងធ្វើឲ្យសកម្មភាពនៃការដោះដូរអចលនទ្រព្យ នៅតែមានច្រើនដោយកើនឡើងជាលំដាប់ និងបើពិនិត្យមើលពីតម្រូវការប្រើប្រាស់សេវាកម្មភ្នាក់ងារអចលនទ្រព្យក៏កើនឡើងជាងមុន នេះបើផ្អែកតាមរបាយការណ៍ទិញ លក់ និងជួលប្រចាំថ្ងៃ។
ឯកឧត្តម នង ពិសិដ្ឋ ប្រធាននាយកដ្ឋានគ្រប់គ្រងអាជីវកម្មអចលនវត្ថុ និងបញ្ចំា នៃក្រសួងសេដ្ឋកិច្ច និងហិរញ្ញវត្ថុបានលើកឡើងថា កំណើនចុះបញ្ជីក្រុមហ៊ុនវាយតម្លៃ និងភ្នាក់ងារគឺជាការឆ្លុះបញ្ចាំងពីទំនុកចិត្តនៃអ្នករកស៊ីនៅក្នុងវិស័យនេះ លើស្ថិរភាពសេដ្ឋកិច្ច និងនយោបាយ។ និងក៏ជាការបង្ហាញពីការកើនឡើងទីផ្សារអចលនទ្រព្យ និងសំណង់ ក្នុងឆ្នាំនេះ ក៏ដូចជាឆ្នាំខាងមុខ។ លោកថា តម្លៃដីធ្លីនៅតែមានហាងឆេងល្អនៅលើទីផ្សារ ពិសេសនៅទីប្រជុំជន និងតាមបណ្តាខេត្តសក្តានុពល និងខេត្តជាប់ព្រំដែន។
អត្ថបទទាក់ទង!
ប៉ុន្តែយ៉ាងណាក៏ដោយចុះ ការបើកផ្តល់សេវាកម្មភ្នាក់ងារអចលនទ្រព្យ គឺមិនខុសគ្នាទៅនឹងអាជីវកម្មផ្សេងៗទៀតឡើយ អ្នកខ្លះក៏ជោគជ័យ ខ្លះក៏បានប្រកាសបិទទ្វារវិញ។ ជាក់ស្តែង ក្នុងចំណោម ២២០ក្រុមហ៊ុនដែលបានចុះបញ្ជីនោះ គឺមានក្រុមហ៊ុនអចលនទ្រព្យចំនួន ១៩២ ក្រុមហ៊ុននៅដំណើរការ ចំណែក២៨ ក្រុមហ៊ុនផ្សេងទៀត បានបិទអាជីវកម្ម។
សូមជម្រាបដែរថា ការលើកទឹកចិត្ត និងបំពេញតម្រូវការខ្វះខាតផ្នែកជំនាញផ្តល់សេវាកម្មភ្នាក់ងារអចលនវត្ថុនេះដែរ កម្ពុជាក៏បាននឹងកំពុងបើកសាលាបង្រៀនវិជ្ជាជីវៈផ្នែកភ្នាក់ងារសម្រាប់អ្នកជំនាញ ដើម្បីពង្រឹងសមត្ថភាព គុណភាពជំនាញបន្ថែមឲ្យឆ្លើយតបតាមលក្ខខណ្ឌតម្រូវនៃការស្នើសុំចុះបញ្ជីនៃភ្នាក់ងារក្រុមហ៊ុនម្នាក់ៗ។
អ្នកជំនាញនៅក្នុងវិស័យអចលនទ្រព្យ ធ្លាប់លើកឡើងថា ទីផ្សារនៃការផ្តល់សេវាកម្មនៅកម្ពុជានៅទូលាយខ្លាំងបើធៀបនឹងចំនួនប្រជាជនជាង១៥លាននាក់ មានភ្នាក់ងារដែលស្របច្បាប់ត្រឹមជាង ២ម៉ឺនាក់គឺមិនគ្រប់គ្រាន់ឡើយ ដែលត្រូវការបន្ថែមភ្នាក់ងារច្រើនជាង ១០០ដងទៀតក៏នៅមិនទាន់គ្រប់គ្រាន់សម្រាប់ទីផ្សារអលនទ្រព្យនៅកម្ពុជាដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
