ឆ្នាំ២០២០ឱនភាពពាណិជ្ជកម្មអាមេរិកហក់ឡើងខ្ពស់បំផុតនៅក្នុងរយៈពេល ១២ឆ្នាំ​ កន្លងមក

ក្រសួងពាណិជ្ជកម្មអាមេរិក កាលពីថ្ងៃសុក្រសប្ដាហ៍មុន បានបញ្ជាក់ថា ឱនភាពពាណិជ្ជកម្មរបស់អាមេរិក នៅឆ្នាំ២០២០ បានហក់ឡើងដល់ទៅ ជិត១៨% ដោយមានក្នុងទំហំទឹកប្រាក់ប្រមាណជិត៦៨០ ពាន់លានដុល្លារអាមេរិក ដែលជាកម្រិតមួយខ្ពស់បំផុតគិតតាំងពីឆ្នាំ២០០៨មក។

ការនាំចេញទំនិញ និងសេវាកម្មបានធ្លាក់ចុះ ជិត១៦% ដែលជាកម្រិតមួយទាបបំផុតមិនធ្លាប់មាន តាំងពីឆ្នាំ២០១០មក។ ការនាំចូលទំនិញ និងសេវាកម្មវិញ ក៏បានធ្លាក់ចុះជិត ១០% ផងដែរ ជាកម្រិតមួយទាបបំផុតក្នុងរយៈពេល ៤ឆ្នាំកន្លមកនេះ។

ការធ្លាក់ចុះនៃការនាំចេញបានធ្វើឲ្យសេដ្ឋកិច្ចរបស់អាមេរិករួញទំហំប្រមាណ ៣,៥% កាលពីឆ្នាំ២០២០ ធ្វើឲ្យមានការធ្លាក់ចុះនូវផលិតផលក្នុងស្រុកសរុបខ្លាំងបំផុតមិនធ្លាប់មានតាំងពីឆ្នាំ១៩៤៦មក។ 

ទោះយ៉ាងណា លំហូរពាណិជ្ជកម្មអាមេរិក បានចាប់ផ្ដើមមានភាពល្អប្រសើរឡើងវិញជាបណ្ដើរៗហើយ ពោលគឺនៅខែធ្នូឆ្នាំ២០២០ ឱនភាពពាណិជ្ជកម្មអាមេរិកបានរួមតូចមកវិញ ៣,៥% មកនៅប្រមាណ ជាង៦៦ពាន់លានដុល្លារ៕