ត្រូវបាន ដកស្រង់សម្ដី ដោយសារព័ត៌មាន Vietnam Express លោក ក្វៀន ជីដុង រដ្ឋមន្ត្រី ក្រសួងផែនការ និងការវិនិយោគវៀតណាម បានលើកឡើងថា ថ្វីដ្បិតតែ សេដ្ឋកិច្ចវៀតណាម នាប៉ុន្មានឆ្នាំចុងក្រោយនេះ សម្រេចបានសមិទ្ធផលល្អច្រើនក៏ដោយ ប៉ុន្ដែ វៀតណាមត្រូវខិតខំប្រឹងប្រែងថែមទៀត ដើម្បីបង្ខិតគម្លាតនៃចំណូលរបស់ពលរដ្ឋ ជាមួយនឹងប្រទេសជឿនលឿនផ្សេងៗទៀត។
ជាក់ស្ដែង ៣០ ឆ្នាំកន្លងមកនេះ វៀតណាមបានបង្កើនទំហំ ផលិតផលក្នុងស្រុកសរុបសម្រាប់ប្រជាជនម្នាក់ៗ រហូតដល់ ជាង ២៧ ដង ឯណោះ ពោលគិត ត្រឹមឆ្នាំ២០១៨ ពលរដ្ឋវៀតណាមម្នាក់ៗមានចំណូលរហូតដល់ជាង ២.៥០០ ដុល្លាអាមេរិក ខណៈដែលទំហំចំណូលនេះ ប្រទេសម៉ាឡេស៊ី បានសម្រេចរួចហើយ កាលពី ២០ឆ្នាំមុន ខណៈដែលប្រទេសថៃ សម្រេចបានកាលពី ១៥ឆ្នាំមុន និងឥណ្ឌូនេស៊ី សម្រេចបាននៅ ១០ឆ្នាំមុន។
អត្ថបទទាក់ទង!
ប្រភពព័ត៌មានបានឲ្យដឹងទៀតថា ដើមចមធំៗ ដែលកម្រិតមកលើសេដ្ឋកិច្ចរបស់វៀតណាម គឺដោយសារតែផលិតភាពការងារ ប្រសិទ្ធភាពសេដ្ឋកិច្ច និងការប្រកួតប្រជែងនៅមានទាប ហើយប្រទេសនេះ ក៏កំពុងតែប្រឈមនឹងហានិភ័យជាប់គាំងក្នុងអន្ទាក់ចំណូលមធ្យម ដែលពិបាកនឹងអាចងើបឡើងទៅជាប្រទេសចំណូលខ្ពស់បាន។
បន្ថែមពីនេះ នាពេលថ្មីៗនេះដែរ វៀតណាម ក៏កំពុងប្រឈមនឹងកត្តាប្រកួតប្រជែងមួយចំនួនទៀត ទាក់ទងនឹងសង្គ្រាមពាណិជ្ជកម្មរវាងសហរដ្ឋអាមេរិក និងចិនផងដែរ។
តាមរបាយការណ៍សេដ្ឋកិច្ចប្រចាំឆ្នាំ២០១៨ របស់ វៀតណាម បានឲ្យដឹងថា កម្មករនិយោជិត ដែលមានផលិតភាពការងារអាចរកប្រាក់ចំណូលជាមធ្យមប្រមាណ ២.៦០០ ដុល្លារអាមេរិក នៅឆ្នាំ២០១៧ ដែលចំនួននេះ គឺមានទាបជាងចំណូលរបស់កម្មករនិយោជិតនៅប្រទេសចិន ជប៉ុន ភីលីពីន ថៃ និងកម្ពុជាជាដើម។
គួរជម្រាបថា សេដ្ឋកិច្ចវៀតណាម មានកំណើនប្រមាណ ៦,៨% ក្នុងមួយឆ្នាំ អស់រយៈពេល ២០ឆ្នាំមកហើយ ហើយនៅឆ្នាំ២០១៨កន្លងទៅនេះ សេដ្ឋកិច្ចប្រទេសនេះ ត្រូវបានគេវាយតម្លៃថា មានកំណើនខ្ពស់បំផុតគិតត្រឹម ១ទសវត្សរ៍មកនេះ ដែលបានសម្រេចកំណើនដល់ ៧% ខណៈដែលទំហំសេដ្ឋកិច្ចមានរហូតដល់ ២៤៥ ពាន់លានដុល្លារអាមេរិក៕
None
