យោងតាមក្រសួងឧស្សាហកម្ម និងពាណិជ្ជកម្មវៀតណាម បានឱ្យដឹងថា ការនាំចូលសាច់ជ្រូកកើនឡើងនេះ បណ្តាលមកពីកង្វះការផ្គត់ផ្គង់ក្នុងស្រុក ដែលបណ្តាលមកពីជំងឺកូវីដ១៩ និងជំងឺប៉េស្តជ្រូកអាហ្វ្រិក។ ជាក់ស្ដែង បើតាមសារព័ត៌មានរ៉យទ័រផ្សាយថ្មីៗនេះថា នៅឆ្នាំនេះ ការផ្ទុះជំងឺប៉េស្តជ្រូកអាហ្វ្រិកកំពុងរីករាលដាលយ៉ាងខ្លាំងជាង២ពាន់តំបន់ ក្នុងចំណោមខេត្ត-ក្រុង ចំនួន៥៧ របស់ប្រទេសវៀតណាម ដែលកំពុងប៉ះពាល់ដល់ឧស្សាហកម្មចិញ្ចឹមជ្រូកក្នុងស្រុក ហើយបានបង្ខំឱ្យអាជ្ញាធរវៀតណាមសម្រេចចិត្តសម្លាប់ជ្រូកចោលរហូតជាង ២៣ម៉ឺនក្បាលហើយគិតមកទល់ពេលនេះ ដើម្បីទប់ស្កាត់ការឆ្លងរាលដាលនូវជំងឺនេះ។
ប្រការនេះហើយ ទើបវៀតណាមបង្កើនការនាំចូលសាច់ជ្រូកពីក្រៅប្រទេស ដើម្បីផ្គត់ផ្គង់ទីផ្សារក្នុងស្រុក។ ទោះយ៉ាងណាមិញ ក្រៅតែពីសាច់ជ្រូក វៀតណាមក៏បាននាំចូលសាច់គោចំនួន ៥ម៉ឺនតោនផងដែរ ដែលមានតម្លៃ ២២០ លានដុល្លារ ហើយពាក់កណ្តាលនៃនាំចូលនេះ គឺមកពីប្រទេសអូស្ត្រាលី។
សូមជម្រាបថា អ្នកផ្គត់ផ្គង់សាច់ជ្រូកធំជាងគេទាំងប្រាំរបស់វៀតណាមមានដូចជា រុស្ស៊ី អាល្លឺម៉ង់ ប្រេស៊ីល ហូឡង់ និងកាណាដា។ ខណៈប្រទេសប្រេស៊ីលគឺ ជាអ្នកផ្គត់ផ្គង់សាច់ជ្រូកដ៏ធំបំផុតដែលស្មើនឹង ជាង ២៤% នៃតម្លៃនាំចូលសាច់ជ្រូកសរុប បន្ទាប់មក គឺប្រទេសរុស្ស៊ីដែលមាន ២៤%។ បើយោងតាមក្រសួងកសិកម្ម និងអភិវឌ្ឍន៍ជនបទបានឱ្យដឹងថា មានសហគ្រាសជាង ៨០០ មកពីទីផ្សារចំនួន ១៩ប្រទេស ត្រូវបានអនុញ្ញាតឱ្យនាំចេញសាច់ជ្រូកចូលទៅប្រទេសវៀតណាម៕
អត្ថបទ៖ ស៊ើង និមល់
