ទិន្នន័យដដែលនេះ បានឲ្យដឹងទៀតថា ក្នុងចំណោមទំហំពាណិជ្ជកម្មក្រៅប្រទេស ៦០០ពាន់លានដុល្លារ ដែលវៀតណាមសម្រេចបាននៅ១១ខែឆ្នាំនេះ ការនាំចេញមានប្រមាណ ៣០០ពាន់លានដុល្លារ កើនជាង១៧% ខណៈការនាំចូលវិញ មានប្រមាណ ៣០០ពាន់លានដុល្លារដូចគ្នា កើនឡើងជាង២៧%។ តាមតួលេខនេះ នាំឲ្យអតិរេកពាណិជ្ជកម្មរបស់វៀតណាម នៅ១១ខែឆ្នាំ២០២១នេះ សម្រេចបានគឺវៀតណាមសម្រេចបានត្រឹមតែ ២២៥លានដុល្លារអាមេរិកប៉ុណ្ណោះ ធៀបនឹងរយៈពេលដូចគ្នាកាលពីឆ្នាំមុនធ្លាប់មានដល់ទៅជាង ២០ពាន់លានដុល្លារ។
មានមុខទំនិញប្រមាណ៣៤មុខឯណោះ របស់វៀតណាម ដែលសម្រេចបានការនាំចេញក្នុងតម្លៃចាប់ពី១ពាន់លានដុល្លារអាមេរិកឡើងទៅក្នុងមួយមុខទំនិញ ដែលមានប្រមាណ ជាង៩៣% នៃផលិតផលនាំចេញសរុប។ ក្នុងនោះ ផលិតផលឧស្សាហកម្ម និងការកែច្នៃ គឺមានការនាំចេញច្រើនជាងគេបំផុត ដែលមានប្រមាណ ៨៩% នៃការនាំចេញសរុប និងមានតម្លៃសរុបប្រមាណជាង ២៦៦ពាន់លានដុល្លារអាមេរិក។
អត្ថបទគួរអាន
សហរដ្ឋអាមេរិក នៅតែជាទីផ្សារបញ្ជាទិញទំនិញពីវៀតណាមច្រើនជាងគេបំផុត ដោយបាននាំចូលទំនិញពីវៀតណាមជិត ៨៥ពាន់លានដុល្លារ កើនឡើងជាង២២% បន្ទាប់មកគឺប្រទេសចិន បាននាំចូលទំនិញពីវៀតណាម ជាង៥០ពាន់លានដុល្លារ អឺរ៉ុបជិត៣៦ពាន់លានដុល្លារ, អាស៊ានប្រមាណ២៦ពាន់លានដុល្លារ, កូរ៉េខាងត្បូង ២០ពាន់លានដុល្លារ និងជប៉ុន ១៨ពាន់លានដុល្លារ។
ដោយឡែក សម្រាប់ទីផ្សារនាំចូលវិញ វៀតណាម នាំចូលទំនិញច្រើនបំផុត គឺពីប្រទេសចិន ដែលមានតម្លៃប្រមាណជាង ៩៨ពាន់លានដុល្លារ កើនឡើង៣២% តាមពីក្រោយដោយកូរ៉េខាងត្បូង ជាង៥០ពាន់លានដុល្លារ និងអាស៊ាន ៣៧ពាន់លានដុល្លារ។ បន្ថែមពីនេះ វៀតណាមក៏បាននាំចូលទំនិញច្រើនទៀត ពីជប៉ុន អឺរ៉ុប និងអាមេរិកផងដែរ។
យោងតាមក្រសួងផែនការ និងវិនិយោគវៀតណាម បានព្យាករថា សេដ្ឋកិច្ចវៀតណាមនៅឆ្នាំ២០២១នេះ នឹងកើនឡើងចន្លោះពី ៣ ទៅ៣,៥ ភាគរយ ហើយនៅឆ្នាំ២០២២ រំពឹងកំណើន៦ ទៅ ៦,៥ភាគរយ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
