ក្រុមហ៊ុន វីរៈប៊ុនថាំ អេចប្រេស បានបោះជំហានចូលទៅក្នុងវិស័យទេសចរណ៍មួយជំហានទៀតហើយ តាមរយៈការដាក់ឱ្យដំណើរការសាកល្បងកប៉ាល់ដឹកអ្នកដំណើរដ៏ទំនើបដំបូងគេ សម្រាប់ដឹកអ្នកដំណើរទៅមករវាងខេត្តកំពត និងកោះត្រល់ ឬកោះភូកុក។ អ្នកឧកញ៉ា សួរ វីរៈ អគ្គនាយកក្រុមហ៊ុន វីរៈប៊ុនថាំ បានគូសបញ្ជាក់ថា តាមរយៈការដាក់ឱ្យដំណើរការកប៉ាល់ដឹកជញ្ជូនអ្នកដំណើរនេះ អ្នកដំណើរអាចធ្វើដំណើរចេញពីកំពង់ផែទេសចរណ៍អន្តរជាតិ ខេត្តកំពត ទៅកាន់គោលដៅកោះត្រល់ ឬពីកោះត្រល់មកកាន់ខេត្តកំពត ដោយចំណាយពេលធ្វើដំណើរត្រឹមតែប្រមាណ៤០នាទីប៉ុណ្ណោះ ខណៈកន្លងមកអ្នកដំណើរត្រូវចំណាយពេលប្រមាណ៣ម៉ោងឯណោះ។
អ្នកជំនួញក្នុងវិស័យដឹកជញ្ជូន និងទេសចរណ៍ ដ៏ល្បីល្បាញរូបនេះជឿជាក់ថា តាមរយៈវត្តមានរបស់កប៉ាល់ដឹកអ្នកដំណើររវាងខេត្តកំពត និងកោះត្រល់ ដ៏ទំនើបនេះ វានឹងជួយជំរុញការទាក់ទាញភ្ញៀវទេសចរពីកោះត្រល់ឱ្យចូលមកកម្សាន្តនៅប្រទេសកម្ពុជា កាន់តែច្រើនថែមទៀត ដោយសារការធ្វើដំណើរតាមរយៈកប៉ាល់នេះមានរយៈពេលខ្លី គួបផ្សំកោះត្រល់ជាតំបន់ទេសចរណ៍ដំទាក់ទាញមួយនៅក្នុងតំបន់។
បើតាមការគូសបញ្ជាក់របស់អ្នកឧកញ៉ា សួរ វីរៈ កប៉ាល់ដឹកអ្នកដំណើរដ៏ទំនើបដែលក្រុមហ៊ុនខ្លួនទើបដាក់ឱ្យដំណើរការសម្រាប់ដឹកអ្នកដំណើរពីខេត្តកំពត ទៅកោះត្រល់នេះ គឺមានច្រើនប្រភេទខុសៗគ្នា ដោយកប៉ាល់នីមួយៗមានតម្លៃចាប់ពី៦០ម៉ឺន ដល់ជាង១លានដុល្លារក្នុង១គ្រឿង ជាមួយសមត្ថភាពអាចដឹកអ្នកដំណើរបានចាប់ពី១០០នាក់ ទៅដល់ជាង២០០នាក់ ក្នុង១ជើង។ ជាផែនការទៅថ្ងៃអនាគតអ្នកជំនួញរូបនេះគ្រោងនាំចូលកប៉ាល់ទេសចរណ៍បន្ថែមទៀត ដែលអាចដឹកអ្នកដំណើរបានរហូតដល់រង្វង់៥០០នាក់។
យ៉ាងណាមិញ ចំពោះតម្លៃសំបុត្រធ្វើដំណើរវិញ ថ្នាក់ដឹកនាំរូបនេះមិនទាន់បានកំណត់ជាក់លាក់នៅឡើយនោះទេ ដោយសារបច្ចុប្បន្ន គឺជាការបើកដំណើរការសាកល្បងប៉ុណ្ណោះ ហើយនៅពេលដាក់ឱ្យដំណើរការជាផ្លូវការនៅអំឡុងខែមីនា ឆ្នាំ២០២៥ខាងមុខ សំបុត្រធ្វើដំណើរម្នាក់អាចមានតម្លៃចន្លោះពី២៨ដុល្លារ ទៅ៣២ដុល្លារ៕
