ថ្លែងក្នុងឱកាសអញ្ជើញពិនិត្យវឌ្ឍនភាពនៃការសាងសង់អាកាសយានដ្ឋានអន្តរជាតិសៀមរាប-អង្គរ នៅថ្ងៃទី៣ ខែមេសា សម្តេចតេជោ ហ៊ុន សែន បានចោទជាសំនួរយ៉ាងដូច្នេះថា តើមានភាពខុសគ្នាយ៉ាងណា រវាងព្រលានយន្តហោះទាំង៣ រួមមាន៖ ព្រលានយន្តហោះភ្នំពេញ,ព្រលានយន្តហោះព្រះសីហនុ និងព្រលានយន្តហោះសៀមរាប ដែលកំពុងមានការចូលរួមវិនិយោគពីក្រុមហ៊ុនបារាំង ជាមួយនឹងគម្រោងសាងសង់ព្រលានយន្តហោះសៀមរាបថ្មី ដែលចូលរួមវិនិយោគដោយក្រុមហ៊ុនចិន?
បើតាមសម្ដេច ហ៊ុន សែន ការសាងសង់ព្រលានយន្តហោះសៀមរាប-អង្គរថ្មីនេះ គឺជាការវិនិយោគដោយក្រុមហ៊ុនចិន ដោយមានតម្លៃវិនិយោគប្រមាណជិត១ពាន់លានដុល្លារ។ ហើយវា ទម្រង់នៃការវិនិយោគនេះ គឺ Build Operate Transfer (BOT) មានន័យថា សាងសង់ គ្រប់គ្រង ហើយផ្ទេរមកឲ្យរាជរដ្ឋាភិបាលគ្រប់គ្រងវិញ ពោលគឺវាដូចគ្នា នឹងទម្រ់នៃការវិនិយោគរបស់បារាំងលើព្រលានយន្តហោះទាំង៣ ដែលកំពុងដំណើរការបច្ចុប្បន្ននេះដែរ។
ក៏ប៉ុន្ដែ សម្តេចតេជោ បានគូសបញ្ជាក់ថា ការវិនិយោគដោយក្រុមហ៊ុនចិន គឺកម្ពុជាមានតែដីប៉ុណ្ណោះ ចំពោះថវិកា គឺវិនិយោគទាំងស្រុងដោយក្រុមហ៊ុនចិន។ សម្តេចបន្តទៀតថា ព្រលានយន្តហោះអន្តរជាតិសៀមរាប-អង្គរថ្មីនេះ ក្រុមហ៊ុនចិននឹងត្រូវគ្រប់គ្រង រយៈពេល៥៥ឆ្នាំ ផុតពី៥៥ឆ្នាំ ព្រលានយន្តហោះថ្មីនេះ ត្រូវប្រគល់ឲ្យរាជរដ្ឋាភិបាលកម្ពុជាគ្រប់គ្រងដាច់វិញតែម្តង។ ដោយឡែក សម្រាប់ការវិនិយោគលើព្រលានយន្ដហោះដែលកំពុងដំណើរការបច្ចុប្បន្ននេះ ដោយក្រុមហ៊ុនបារាំងវិញ គឺកម្ពុជាមានព្រលានយន្តហោះកំពុងដំណើរការរួចហើយ ពោលគឺកម្ពុជាមានចំណែកទុនធំរួចហើយ ប៉ុន្តែ យើងនៅខ្វះខាតទុនវិនិយោគបន្ថែម ដូច្នេះ រាជរដ្ឋាភិបាលក៏បានហៅក្រុមហ៊ុនបារាំង ឲ្យចូលរួមក្នុងការវិនិយោគ ពង្រឹងសមត្ថភាព ហើយកសាងនូវមូលដ្ឋាននៃព្រលានយន្ដហោះទាំងនេះ ដើម្បីបម្រើឲ្យការអភិវឌ្ឍន៍ប្រទេសរបស់កម្ពុជា។
អត្ថបទគួរអាន
យ៉ាងណាក៏ដោយចុះ សម្តេចតេជោ ហ៊ុន សែន ក៏បានគូសបញ្ជាក់ទៀតថា ក្នុងកិច្ចព្រមព្រៀងរវាងរាជរដ្ឋាភិបាលកម្ពុជាជាមួយក្រុមហ៊ុនបារាំង កាលណាដែលបារាំងដេញថ្លៃបាន បារាំងមានសិទ្ធិតាមគ្រប់គ្រងព្រលានយន្តហោះទាំងនៅរាជធានីភ្នំពេញ ខេត្តព្រះសីហនុ និងខេត្តសៀមរាប។ ដូច្នេះ កម្ពុជាត្រូវតែមានសំណងសមរម្យមួយ ទៅឲ្យក្រុមហ៊ុនបារាំង នៅក្រោយចប់កុងត្រាជាមួយគ្នា។ សម្តេចតេជោ សង្ឃឹមដែរថា បារាំង នឹងមិនទាមទារថ្លៃសំណងហួសហេតុនោះទេ បន្ទាប់ពីផុតពីការទទួលផលពីព្រលានយន្តហោះ ដ៏តូចនៅក្នុងខេត្តសៀមរាបដែលកំពុងដំណើរការនេះ។
សូមបញ្ជាក់ថា ក្រោមការគ្រប់គ្រងដោយក្រុមហ៊ុនបារាំង Vinci ដែលជាក្រុមហ៊ុនមេរបស់ក្រុមហ៊ុនអាកាសយានដ្ឋានកម្ពុជា (Cambodia Airport) ក្រុមហ៊ុននេះ បានទទួលការសិទ្ធក្នុងការអភិវឌ្ឍន៍ និងគ្រប់គ្រងព្រលានយន្ដហោះនៅក្នុងទីតាំងចំនួន៣នៅកម្ពុជា ដូចជានៅរាជធានីភ្នំពេញ សៀមរាប និងខេត្តព្រះសីហនុ តាំងពីឆ្នាំ១៩៩៥មកម្ល៉េះ ដោយមានកុងត្រារយៈពេល៤៥ឆ្នាំ ពោលគឺនៅឆ្នាំ២០៤០ ទើបចប់កុងត្រា ហើយក្រុមហ៊ុនបារាំងនឹងផ្ទេរការគ្រប់គ្រងព្រលានយន្ដហោះនេះមកឲ្យរាជរដ្ឋាភិបាលកម្ពុជាវិញ។ នេះបើតាមព័ត៌មានដែលបង្ហាញនៅក្នុងគេហទំព័រក្រុមហ៊ុន បារាំង Vinci។
ដោយឡែក សម្ដេច ហ៊ុន សែន បានបញ្ជាក់ទៀតថា ទាក់ទងនឹងគម្រោងវិនិយោគព្រលានយន្តហោះអន្តរជាតិសៀមរាប-អង្គរថ្មីនេះ ដែលវិនិយោគដោយក្រុមហ៊ុនចិនវិញ មានកុងត្រាគ្រប់គ្រង រយៈពេល៥៥ឆ្នាំ ហើយផុតពី៥៥ឆ្នាំ ព្រលានយន្តហោះថ្មីនេះ ត្រូវប្រគល់ឲ្យកម្ពុជា គ្រប់គ្រងដាច់វិញតែម្តង។ សូមបញ្ជាក់ថា ព្រលានយន្តហោះអន្តរជាតិសៀមរាប-អង្គរថ្មី សាងសង់ដោយក្រុមហ៊ុនចិន YUNAN DEVELOPMENT GROUP គ្រោងវិនិយោគនូវទឹកប្រាក់ជិត១ពាន់លានដុល្លារ នៅស្ថិតនៅក្នុងឃុំពពេល និងឃុំតាយ៉ែក ស្រុកសូទ្រនិគម ខេត្តសៀមរាប លើផ្ទៃដី៧០០ហិកតា៕
None
