តើវិស័យអចលនទ្រព្យរបស់មហាយក្សចិននឹងស្ទុះងើបឡើងវិញ ឬក៏បន្តដាំក្បាលចុះនៅឆ្នាំ២០២៥?
ទីផ្សារអចលនទ្រព្យក្នុងប្រទេសចិន ដែលជាមហាអំណាចសេដ្ឋកិច្ចធំបំផុតទី២របស់ពិភពលោកត្រូវបានព្យាករថា នឹងនៅតែបន្តដាំក្បាលចុះក្នុងឆ្នាំ២០២៥ ខាងមុខន…
ក្រុមហ៊ុនហុងដា នៅដើមសប្តាហ៍នេះ បានប្រកាសថា ខ្លួននឹងទិញយកភាគហ៊ុន ដែលបានបោះផ្សាយលក់កន្លងមកត្រឡប់មកវិញចំនួន២៤% នៅត្រឹមថ្ងៃទី២៣ ខែធ្នូ ឆ្នាំ២០២៥។ ការប្រកាសរបស់ក្រុមហ៊ុនហុងដានេះ បានជំរុញឱ្យតម្លៃភាគហ៊ុនរបស់ក្រុមហ៊ុននេះកើនឡើងជាង១៥% ដែលជាចំនួនខ្ពស់បំផុតមិនធ្លាប់មានចាប់តាំងពីខែតុលា ឆ្នាំ២០០៨ មក។
ផែនការទិញភាគហ៊ុនរបស់ក្រុមហ៊ុនហុងដានេះ បានធ្វើឡើងចំពេលក្រុមហ៊ុននេះ បានចាប់ផ្ដើមកិច្ចចរចាជាផ្លូវការអំពីការដាក់បញ្ចូលគ្នាជាមួយនឹងក្រុមហ៊ុននីសាន់ ឱ្យទៅជាក្រុមហ៊ុនកាន់កាប់ភាគហ៊ុនថ្មីមួយនៅត្រឹមពាក់កណ្ដាលឆ្នាំ២០២៦ ដែលអាចនឹងធ្វើឱ្យពួកគេក្លាយជាក្រុមហ៊ុនផលិតរថយន្តធំបំផុតទីបីនៅលើពិភពលោក។
លោក តូស៊ីហ៊ីរ៉ូ មីបេ (Toshihiro Mibe) នាយកប្រតិបត្តិក្រុមហ៊ុន Honda បាននិយាយថា កិច្ចព្រមព្រៀង Honda-Nissan នឹងផ្តោតលើការចែករំលែកចំណេះដឹង និងធនធាន ការបង្កើនទំហំសេដ្ឋកិច្ច និងការបង្កើតកិច្ចសហការគ្នា។ ក្រុមហ៊ុនកាន់កាប់ភាគហ៊ុនថ្មីមួយនឹងត្រូវបានបង្កើតឡើង ដែលជាក្រុមហ៊ុនមេរបស់ក្រុមហ៊ុន Honda និងក្រុមហ៊ុន Nissan ហើយនឹងត្រូវចុះបញ្ជីនៅក្នុងផ្សារហ៊ុនក្រុងតូក្យូ។
ចំណែកលោក ហាកាន ដូហ្គូ (Hakan Dogu) ប្រធានក្រុមហ៊ុន Alagan Mobility Solutions បានប្រាប់ប្រព័ន្ធផ្សព្វផ្សាយ CNBC នៅថ្ងៃអង្គារនេះថា ក្រុមហ៊ុនទាំងពីរនេះកំពុងប្រតិបត្តិការនៅក្នុងទីផ្សារតែមួយ ហើយពួកគេមានរូបម៉ាកយីហោស្រដៀងគ្នាបំផុត ហើយថែមទាំងមានផលិតផលស្រដៀងគ្នាទៀតផង។ លោកបានបន្ថែមថា ក្រុមហ៊ុនកាន់កាប់ភាគហ៊ុនថ្មីនេះមានបញ្ហាប្រឈមធំមួយនៅក្នុងការបែងចែកផលិតផលឱ្យខុសគ្នា និងការពង្រីកអាជីវកម្មផងដែរ៕
អត្ថបទ៖ សុខ មង្គល
